Ai
3 di Mai, alì de fondazion Henry Durant di Gjinevre, la organizazion
armade basche ETA e à fat cognossi la sô ultime declarazion là che
e conferme il dismantelament de sô struture e la sô dissoluzion
definitive. La declarazion che e met fin ai 60 agns de organizazion e
je stade compagnade dal video là che doi dai siei ex militants –
Josu Urrutikoetxea e Marisol Iparraguirre – le lein par basc e par
castilian. La decision e rive sù par jù a un an di distance de
consegne dal so arsenâl e a plui di sîs agns de fin de sô ativitât
armade.
“Al è un moment storic par dute la Europe par vie che al
segne la fin dal ultin grup armât dal continent” a àn comentât i
rapresentants internazionâi impegnâts inte risoluzion dal conflit
che si son dâts adun la dì dopo a vile Arnaga, te localitât basche
francese di Kanbo / Cambo-les-Bains. Pe ocasion, il grup
internazionâl – formât di personalitâts za impegnadis in procès
di riconciliazion tant che il sudafrican Brian Currin, i irlandês
Bertie Ahern e Gerry Adams, il britanic Jonathan Powell e il messican
Cuauthémoc Cárdenas – al à dât fûr une declarazion là che,
dongje di dâi il bon acet ae decision di ETA, al ricuarde i pas
indenant fats intai ultins agns par superâ il conflit massime de
bande de societât e des istituzions baschis ma ancje la inazion
totâl mostrade dal guvier spagnûl. Al zonte po che “a restin
ancjemò di risolvi temis impuartants tant che chel dai presonîrs e
des personis che si cjatin dispatriadis o in clandestinitât” e che
al è inmò cetant di fâ sul plan de riconciliazion “par curâ lis
feridis e par tornâ a fâ sù une comunitât condividude”. Il grup
internazionâl al ricuarde ai stâts cjapâts dentri tal conflit che
par rivâ pardabon ae pâs “al covente un dialic politic tra ducj i
atôrs principâi” e che al è une vore dificil rivâi dome cul
doprâ la preson o altris misuris repressivis.
Font:
Naiz:,
03-05/05/18;
EiTB, 03-05/05/18
Nessun commento:
Posta un commento