27/04/18

Paîs Catalans: gnovis crepis te strategjie repressive spagnole

Lis autoritâts spagnolis a van dilunc cu la repression dal indipendentisim catalan ma si cjatin a frontâ critichis simpri plui marcadis sul plan internazionâl e fintremai contrascj internis che a gjavin inmò plui credibilitât ae lôr azion. Dongje de ofensive judiziarie, la repression si palese ancje cui atacs dal guvier Madrid aes istituzions catalanis e ai siei funzionaris. Par mieç dal control diret su la Catalogne che si à cjapât cu la metude in vore dal articul 155 de Costituzion spagnole, l’esecutîf vuidât di Mariano Rajoy al va indenant a parâ fûr des istituzions catalanis ducj i funzionaris che al stime masse leâts al indipendentisim: i ultins a jessi parâts vie a son la diretore dal servizi pes relazions internazionâls dal guvier catalan, Marina Borrell, e il diretôr de scuele de aministrazion publiche de Catalogne, Agustí Colomines. Par justificâ la lôr destituzion il guvier di Madrid al à dome dite che «i lôr compuartaments no son compatibii cu la incarghe che a davuelzin».
Intant il president dal Parlament catalan, Roger Torrent, si à cjatât a Gjinevre cun rapresentants dal alt comissariât de ONU pai dirits umans e, dongje di denunciâ la violazion dai dirits e des libertâts che si cjatisi denant in Catalogne, al à domandât un intervent des Nazions Unidis par cjatâ une soluzion al scuintri in at. Intal stât francês, invezit, il Consei dipartimentâl dai Pireneus orientâi (che al cjape dentri la Catalogne setentrionâl) si à dât dongje par domandâ in maniere uficiâl la fin des violencis de polizie, la liberazion dai rapresentants indipendentiscj impresonâts, la pussibilitât pai esiliâts di tornâ a cjase e il dialic tra lis istituzions catalanis e chês spagnolis.
Dut câs il colp plui dûr ae costruzion acusatorie cuintri dal indipendentisim catalan e rive, a sorprese, dal stes guvier spagnûl. Cun di fat, la uniche acuse che e veve cjatât un ciert acet sul plan internazionâl – o sei chê di malversazion leade aes spesis che il guvier catalan al varès fat par inmaneâ il referendum dal prin di Otubar – e ven smentide dal stes ministri spagnûl pe economie, Cristóbal Montoro, che al à declarât plui di une volte che pal referendum catalan no si à spindût nancje un franc di bêçs publics. Un tant al va duncje a sdrumâ la acuse fate indenant dal judiç Pablo Llarena su la fonde dai rapuarts de guardia civil e al vierç un scuintri istituzionâl no di pôc dentri des stessis istituzions spagnolis.
Font: Ara, 18-20/04/18; VilaWeb, 18-20/04/18; Naiz:, 18-20/04/18

Nessun commento: