24/12/18

Cossovo: l’esercit al divît inmò di plui serps e cossovans

Ai 14 di Dicembar il Parlament cossovan, cun 105 vôts su 120, al à fate buine la leç che i assegne ae fuarce di sigurece dal Cossovo lis carateristichis e lis competencis di un esercit vêr e no plui chês di un cuarp di polizie. Chest cambi al è stât fat cuntune leç ordenarie e cence di un mudament costituzionâl in maniere di no vê bisugne de poie ancje di doi tierçs dai vincj deputâts assegnâts aes comunitâts minoritariis dal Cossovo. Il vôt al è stât boicotât de Srpska Lista, il moviment di racuelte de minorance serbe che di bessôl al conte dîs parlamentârs e che, fin cumò, al veve rivât a impedî ogni tentatîf di meti in pîts un esercit cossovan par vie costituzionâl. Il puartevôs dal moviment, Goran Rakić, al à fat savê che la leç e sarà impugnade denant de cort costituzionâl. Al à ancje fat capî che se cualchi repart di chest esercit al ves di provâ a jentrâ tes areis a maiorance serbe al sarà calcolât di fuarce di ocupazion ilegâl. La uniche poie, sul plan internazionâl, e je rivade dai Stâts Unîts, intant che sei la UE che la NATO a àn judicât in maniere negative la iniziative, massime pal fat di no vêle concuardade cu lis minorancis, in primis chê serbe.
Font: Balkan Insight, 14/12/18

Corsiche: al è muart Edmond Simeoni, “l’om di Aleria”

Ai 14 di Dicembar al è muart, ae etât di 84 agns, Edmond Simeoni. Considerât un dai paris dal nazionalisim cors contemporani, intal 1967 al jere stât un dai fondadôrs dal moviment Azion Regjonaliste Corse deventade po, sîs agns plui tart, Azzione per a Rinascita di a Corsica (ARC). La sô partecipazion ai fats di Aleria intal Avost dal 1975, anticipâts di un so discors di fûc cualchi zornade prime, a puartin a considerâlu l’om di ponte dal gnûf nazionalisim cors e i costin un an e sîs mês di preson. Intal 1977 al partecipe ae creazion de Unione di u Populu Corsu (UPC) che, tes sôs filis, al sarà po elet intal 1982 inte prime Assemblee de Corsiche. Cinc agns plui tart al cjape lis distancis de lote armade puartade indenant di une part dal moviment nazionâl cors par sostignî l’autoguvier de isule dome par vie politiche. Tai agns ’90 e tai prins agns dal secul gnûf al va dilunc cul so impegn politic ancje par mieç di coalizions – tant che Corsica Nazione e Unione Naziunale – che a cirin di meti adun lis diviersis animis dal nazionalitarisim cors. Un percors che i permetarà po propit a so fi, Gilles Simeoni, di deventâ il prin president nazionalist dal guvier cors. Miedi di mistîr, Edmond Simeoni al è stât in prime linie ancje in cetantis bataiis pe difese ambientâl de isule e cuintri dal razisim.
Font: France 3 Corse ViaStella, 14/12/18

Gales: simpri plui a risi la emitence radiofoniche galese

La gnove che une emitente dute par inglês e cjaparà la concession de frecuence assegnade fin cumò a Radio Ceredigion e à tornât a impiâ lis protestis des organizazions galesis impegnadis pai dirits linguistics. Ce che si domande e je la devoluzion ae Assemblee Nazionâl dal Gales des competencis su la emitence radiotelevisive che cumò a vegnin gjestidis di Londre. In dì di vuê, di fat, i galês no àn nissune pussibilitât di dî la lôr su cheste tematiche. Cun di plui, si riscje che la situazion e ledi ancjemò in piês dal moment che il guvier britanic al è daûr a pensâ a liberalizâ inmò di plui il setôr cul risi che lis radio comerciâls che a operin in Gales no vedin nissun oblic di garantî une presince ancje minime de lenghe galese o di notiziaris che a fevelin di ce che al sucêt in Gales.
Font: Cymdeithas yr Iaith, 13/12/18

Europe: ELEN sui dams de Brexit pes lenghis celtichis

ELEN – Rêt Europeane pe Avualiance Linguistiche che e ten adun 150 organizazions di 45 comunitâts minorizadis de Europe – e à dât fûr un document uficiâl che, in acuardi cui siei membris galês, scozês, irlandês e cornics, al segnale i efiets une vore negatîfs che l’acuardi su la jessude dal Ream Unît de Union Europeane al riscje di vê su lis lenghis celtichis feveladis intes isulis. Dongje de pierdite di finanziaments direts par mieç di programs tant che Erasmus Plus, Creative Europe o Horizon 2020, a van calcolât ancje i efiets su lis comunitâts che inmò a fevelin chestis lenghis e che, dispès, a son centradis intes areis rurâls o plui disvantazadis. Cun di fat, la mancjance di misuris di jutori par ativitâts tant che agriculture, pescje o turisim che a rivavin de UE a menacin la tignude economiche di chestis comunitâts cul risi che la int e vedi di lâ vie fiscant cussì i ultins lûcs là che chestis lenghis a jerin ancjemò dopradis in maniere cuotidiane e vivarose. Un tant al vâl pes areis rurâls dal Gales là che la jessude de suaze des politichis europeanis e menace di meti in crisi cetantis aziendis agriculis, o pes isulis scozesis cuntune economie leade ae pescje e al turisim. Un câs particolâr al è po chel de Irlande là che la jessude de UE e riscje di fâ saltâ ancje ducj i finanziaments transfrontalîrs e i progjets di cooperazion che ta chescj agns a vevin zovât ancje ae lenghe irlandese. Di chi duncje l’apel a no cjapâ une strade che e menace efiets cussì disastrôs pes comunitâts di lenghe galese, irlandese, gaeliche e corniche.
Font: ELEN, 13/12/18

Bretagne: ancje 19 parlamentârs a sburtin pe riunificazion

Disenûf parlamentârs bretons a àn firmât une letare vierte là che a domandin al consei dipartimentâl de Loire Atlantiche di imbastî une consultazion popolâr su la union di chest dipartiment al rest de Bretagne intune uniche regjon aministrative. Tredis deputâts e sîs senatôrs a àn invidât i conseîrs a dâi une rispueste positive ae petizion fate indenant de organizazion Breizh Unvan / Bretagne Réunie e sotscrite in pocjis setemanis di passe 100 mil eletôrs de Loire Atlantiche, o sei sù par jù il 10% dal cuarp eletorâl dal dipartiment. Chê sul referendum pe riunificazion de Bretagne storiche e je la plui grande racuelte di firmis mai vude fin cumò intun singul dipartiment dal stât francês. Intun moment là che i citadins si sintin simpri plui lontans des istituzions – a ricuardin i parlamentârs che a àn firmât l’apel – al sarès pecjât mortâl impedî cheste volontât di partecipazion.
Font: Agence Bretagne Presse, 13/12/18

Paîs Catalans: dossier su lis violazions dai dirits linguistics

Une delegazion dal comitât di esperts dal Consei de Europe che al viôt dal rispiet de Cjarte europeane des lenghis regjonâls o minoritariis si à cjatade ai 12 di Dicembar cui rapresentants de direzion gjenerâl di politiche linguistiche dal guvier catalan. E je stade la ocasion par presentâur lis violazions dai dirits linguistics metudis in at des autoritâts statâls. Tra lis principâls si à la mancjance de cognossince dal catalan e dal ocitan aranês tra il personâl dai tribunâi cul efiet di pidimentâ l’ûs di chestis lenghis intai procediments judiziaris. La mancjance de cognossince des lenghis couficiâls si le cjate ancje framieç de plui part dal personâl dai uficis e dai servizis statâi che a operin in Catalogne, tai sîts internet di chestis istituzions e tai modui pal public. Si àn po cetantis normativis statâls che a pretindin l’ûs dal castilian cence tignî cont di chês altris lenghis couficiâls, che i si zontin i intervents statâi par pidimentâ o fintremai par anulâ lis normativis sui ûs linguistics fatis buinis in Catalogne. Par finî, dal stât centrâl a rivin ancje limitazions su le emission e la ricezion di programs radiotelevisîfs tra lis Comunitâts che a condividin la stesse lenghe proprie e il dinei a domandâ l’ûs uficiâl dal catalan intes istituzions europeanis.
Font: Generalitat de Catalunya, 12/12/18

Paîs Catalans: al cres il catalan tai mieçs di comunicazion

In gracie di un acuardi cul guvier catalan la plateforme digjitâl Movistar+ e za à proviodût a sottitulâ par catalan 250 cines e 60 seriis televisivis cun chê di slargjâ simpri di plui la ufierte di contignûts audiovisîfs ta cheste lenghe, in particolâr par mieç di produzions in lenghe origjinâl cui sottitui. Novitâts positivis a rivin però ancje de plateforme par messaçs Telegram che e à metût il catalan tra lis sôs opzions linguistichis, che fin cumò a contavin dome altris cundis lenghis. La opzion e je za disponibile par dispositîfs Android, iOS, TDesktop e macOS.
Font: Europa Press, 10/12/18; Generalitat de Catalunya, 11/12/18

Aragon: sì de universitât di Zaragoza ae catedre di aragonês

Il senât academic de universitât di Zaragoza al à decidût di inviâ la specialitât di lenghe aragonese intai cors di lauree par formâ insegnants pes scuelis de infanzie e pes primariis. Nol è tant che si à ufiert la pussibilitât di studiâ l’aragonês tai prins agns di scuele: in dì di vuê i fruts che lu studiin a son uns 1.200 e i professôrs che lu insegnin une vincjine, ma par lôr fin cumò nol esisteve un percors di formazion specific. Par jentrâ in vore la misure e à di vê il vie libare sei dal guvier dal Aragon, sei di chel spagnûl. Se lis autorizazions a saran dadis avonde in curt si podarà partî cu la gnove catedre za cul an academic 2019-2020.
Font: Heraldo, 10/12/18

Paîs Basc: indenant a cressi il personâl euskaldun te sanitât

A cuindis agns di distance di cuant che si à inviât il procès di normalizazion linguistiche ancje dentri di Osakidetza – o sei il sisteme sanitari public de Comunitât Autonome Basche – i risultâts a son une vore positîfs. A dîlu al è stât il conseîr cun deleghe pe sanitât, Jon Darpón, che al à ricuardât cemût che dal 2003 indenant il personâl sanitari in linie cul profîl linguistic previodût pe sô incarghe al è passât dal 7,6% al 46,6%. L’an passât si à inviât ancje il regjistri di preference linguistiche dai pazients che al à puartât za 240 mil personis a indicâ l’euskara tant che lenghe miôr par jessi seguidis dal personâl sanitari, cuntun nivel di sodisfazion sul ûs e su la presince de lenghe basche che al è di 6,4 suntune scjale di 10.
Font: Europa Press, 03/12/18

Gales: prin toc par galês disore dal milion di scoltis su Spotify

Gwenwyn” (tuessin) dal grup Alffa e je la prime cjançon in lenghe galese a passâ il milion di scoltis su Spotify. Un risultât che il cjantant e ghitarist Dion Jones e il baterist Sion Land no si spietavin par nuie ancje se il lôr talent ju veve za puartâts a jessi selezionâts pal progjet “Horizons Artists” inmaneât de BBC dal Gales par promovi la gnove musiche galese. I doi fantats, che nol è tant che a àn finît di scuele, a son stâts ancje scriturâts de etichete Recordiau Côsh che e ponte une vore su di lôr par mostrâ che, cu la buine musiche, lis bariduris linguistichis si rivin a sdrumâ.
Font: BBC, 03/12/18; The Guardian, 07/12/18

Irlande: la cognossince dal gaelic e reste debule

Un scandai puartât indenant de agjenzie di ricercje e statistiche de Irlande dal Nord al stime tor dal 15% la popolazion des sîs conteis setentrionâls de isule che e à une cualchi cognossince dal gaelic irlandês. Dut câs dome il 4% al dopre la lenghe ogni dì o une vore dispès in cjase o tes relazions sociâls. Pal rest, tra chei che a àn declarât di cognossi la lenghe, dome il 5% al à un nivel alt di competence che i permet di capî discors complès, intant che il 46% al cognòs dome pocjis frasis semplicis di interazion sociâl. Il dât al marche duncje la urgjence di une leç organiche pal irlandês che e ven invezit contrastade cun fuarce dai partîts unioniscj nordirlandês.
Font: Belfast Telegraph, 29/11/18

13/12/18

Gales: Aled Roberts al sarà il prossim comissari pe lenghe

Il guvier dal Gales al à ratificât la nomine di Aled Roberts tant che gnûf comissari pe lenghe galese. Intal Març dal 2019 Roberts, che al è stât deputât inte Assemblee Nazionâl dal Gales dal 2011 al 2016 tra lis filis dai Liberâi Democratics, al cjaparà il puest di Meri Huws che e à davuelt cheste incarghe tai ultins agns. Il comissari pe lenghe al coordene un ufici che si propon di promovi l’ûs de lenghe galese e di difindi i dirits di cui che le fevele. Il guvier in cjarie al ponte a sostituî cheste incarghe cuntune gnove struture prime dal 2021. Chel istès al jere tignût a fâ la nomine par evitâ un vueit istituzionâl.
Font: BBC, 27/11/18

Europe: si ferme par cumò il percors dal Minority Safepack

La FUEN (Union Federâl des Nazionalitâts Europeanis) e à decidût di suspindi par cumò la iniziative citadine Minority Safepack, inviade cun chê di incressi lis misuris di tutele des personis che a partegnin a minorancis linguistichis e nazionâls e di infuartî la diversitât linguistiche e culturâl dentri de Union Europeane. Par sostignîle, a cjaval jenfri 2017 e 2018, a son stadis racueltis ator pe Europe passe un milion e 215 mil firmis: cifre plui che suficiente par impegnâ la Comission Europeane a cjapâ in man la cuistion. Dopo dai prins contats istituzionâi, la FUEN e stime però che la Comission Europeane, cemût che e je componude cumò, no dedi masse garanziis di tratâ il teme in maniere corete. Di chi, duncje, la decision di tignî dut fer in spiete che la composizion de Comission e vegni rignuvide.
Font: Jornalet, 27/11/18

Cossovo: dimissions e protestis dai sindics serps

Il sindic de part di Mitrovica a maiorance serbe, Goran Rakić, al à decidût di dimetisi par protestâ cuintri dai dazis metûts dal guvier cossovan su dutis lis marcjanziis che a rivin de Serbie e cuintri des violazions dai dirits de minorance serbe che e vîf dentri dai confins dal Cossovo. La stesse strade e je stade anticipade ancje di altris aministradôrs de comunitât serbe che a àn za sierât ogni linie di comunicazion cu lis istituzions cossovanis. Intune situazion za une vore tirade, la decision cjapade dal guvier di Pristina ai 21 di Novembar di incressi i dazis dal 10 al 100% e à esasperât ancjemò di plui il scuintri tra la minorance serbe e lis istituzions cossovanis di une bande e tra il guvier di Pristina e chel di Belgrât di chê altre.
Font: Balkan Insight, 27/11/18

Irlande: prins pas pal plan linguistic di Galway

Il consei comunâl di Gaillimh / Galway al à assegnât a doi esperts la incarghe di meti jù un plan plurienâl par incressi l’ûs de lenghe irlandese in citât. I doi, cul jutori di un grup di altris sîs operadôrs dal setôr, a varan di planificâ lis politichis linguistichis pe dade che e va dal 2019 al 2026. Galway e sarà la prime grande citât de Irlande a indotâsi di un plan di cheste fate che al larà a infuartî la sô funzion di riferiment e di servizi pes areis dal Gaeltacht, ven a dî chês comunitâts là che la lenghe proprie e à ancjemò un ûs sociâl significatîf. Tra i prins pas in program si à une ricercje su lis pratichis positivis pal bilinguisim za in vore inaltrò, un confront su lis dibisugnis e su lis propuestis des realtâts za ativis in citât sul plan dal ûs e de promozion dal irlandês, e une audizion cui operadôrs dai servizis di utilitât publiche.
Font: The Irish Times, 26/11/18

Asturiis: il Parlament al dîs di no ae uficialitât dal asturian

Il Parlament des Asturiis al à boçât la iniziative di leç fate indenant di Podemos e Izquierda Unida par mendâ il Statût di autonomie in maniere di ricognossi al asturian il status di lenghe uficiâl intune cul castilian. I doi partîts, di fat, si son ricjatâts di bessôi a votâ a pro dal proviodiment. La diestre stataliste e regjonaliste – o sei PP, Ciudadanos e Foro – e à votât cence dubis cuintri de uficialitât, intant che il PSOE al à ricognossût che tal so interni a son tancj chei che a saressin dacuardi ma che, dal moment che tal program eletorâl no si fevelave di uficialitât, al è plui impuartant restâ in linie cul program. La oposizion plui dure ae uficialitât e je stade inmò une volte chê dal PP che zaromai di timp al sparnice la pôre che, cu la uficialitât, i coscj a cressaressin in maniere spropositade e che ducj i dipendents publics si cjataressin obleâts a imparâ l’asturian: prospetivis che no son veris, ma che a àn rivât a semenâ il dubi framieç di diviers di lôr.
Font: El Comercio, 23/11/18

Paîs Catalans: discriminazions linguistichis inmò "struturâls"

Ai 23 di Novembar la organizazion Plataforma per la Llengua e à lançât la sô campagne “Prou de catalanofòbia” (vonde cu la catalanofobie) par fâi cuintri aes discriminazions linguistichis che cui che al fevele par catalan si cjate ancjemò a patî. La organizazion e à ricevût intal ultin an 155 denunciis di discriminazions de bande di personis che, pal fat di fevelâ par catalan, si son viodudis a dineâ servizis che a vevin dirit di vê o ben a àn patît ofesis, menacis e fintremai agressions. Magari cussì no, a disin i rapresentants de Plataforma, i episodis denunciâts a son dome la part plui evidente di un fenomen che nol è isolât ma, al contrari, struturâl dentri dal stât spagnûl. Par fâi cuintri a cheste situazion, la organizazion e invide ducj i guviers implicâts a intervignî cun fuarce. Al esecutîf spagnûl si domandin indreçaments specifics ai cuarps periferics dal stât par che a rispietin i dirits linguistics dai catalans e une modifiche de Costituzion che e meti dutis lis lenghis ricognossudis sul stes plan dal castilian in maniere di evitâ che si puedin vê spazis di impunitât. Al guvier catalan si domande invezit une gnove leç cuintri des discriminazions linguistichis che e previodi ancje sanzions dal moment che, se la pedagogjie e reste la strade principâl, cuant che no son alternativis al covente punî. Ae Comunitât Valenziane si domande di garantî la presince di personâl bilengâl intes aministrazions locâls e, tal câs des Baleârs, un intervent similâr inte sanitât publiche. Al esecutîf aragonês, invezit, si domande di ricognossi la uficialitât dal catalan intes areis là che al è fevelât (Franja de Ponent).
Font: Plataforma per la Llengua, 23/11/18

Paîs Basc: in 200 mil impegnâts cun Euskaraldia

E je stade la citât di Baiona / Bayonne a dâi acet, ai 22 di Novembar, al prin at di Euskaraldia, la iniziative che si propon di sburtâ l’ûs sociâl de lenghe basche. Fintremai i 3 di Dicembar, par 11 zornadis a dilunc, lis aministrazions locâls, lis realtâts associativis e i citadins che a àn aderît ae campagne si son impegnâts par doprâ la lenghe basche in ogni ocasion pussibile. La adesion framieç de popolazion de Comunitât Autonome Basche, de Navare e dal Paîs Basc sot aministrazion francese (Ipar Euskal Herria) e je stade une vore alte cun cuasi 200 mil iscrits dividûts in dôs categoriis, ven a dî ahobizi, che ta chestis zornadis a àn butât a ducj la peraule par basc e a àn doprât la lenghe cun chei che le capivin, e belarriprest che, cun distintîfs di pueste, a àn segnalât a ducj di fevelâur simpri par euskara. Tra lis personis che a àn aderît a Euskaraldia, la grande maiorance e veve mancul di 55 agns, trê cuarts a jerin centradis intes provinciis di Gipuzkoa e Bizkaia, e il 63% a jerin feminis.
Font: Naiz:, 23/11/18

Bretagne: sì de justizie francese al “ñ” te onomastiche

Si à vût di spietâ sù par jù un an ma ae fin la cort di apel e à ribaltât la sentence dal tribunâl di Kemper / Quimper che l’an passât e veve dineât a di une cubie la trascrizion dal non par breton “Fañch” che a vevin sielzût par lôr fi. Il prin grât di judizi al jere stât motivât cul fat che “il principi che al ricognòs ai gjenitôrs il dirit di sielzi il non dai lôr fîs” al sarès limitât de decision di “doprâ une ortografie là che a son segns diacritics no ricognossûts de lenghe francese”. Il dut su la fonde di une circolâr dal ministeri de justizie francês dal 2014 che no ricognòs l’ene cul tilde tra lis letaris autorizadis. La gnove sentence e dinee invezit chestis conclusions e, intai fats, e rapresente une vitorie par chei bretons che a vuelin doprâ la lôr lenghe proprie ancje te onomastiche.
Font: Euronews, 22/11/18

Gales: poie dal guvier ae promozion de musiche par galês

Il guvier galês al à decidût di poiâ sul plan finanziari un gnûf servizi di promozion e di distribuzion digjitâl de musiche in lenghe galese. Lis risorsis a permetaran ae societât PYST Cyfyngedig di incressi lis sôs ativitâts di distribudôr digjitâl – il prin di cheste fate in Gales e il prin a ocupâsi in maniere specifiche de industrie musicâl par galês – ma ancje di promovi lis produzions musicâls galesis sui canâi miôr par incressi la lôr visibilitât e di meti sù une figure professionâl di pueste par cjatâ fûr ocasions, dentri e fûr dal Gales, dulà fâ sunâ i musiciscj galês.
Font: Business News Wales, 22/11/18

Paîs Basc: rêt sociâl gratuite par comunicâ par euskara

Diviersis realtâts impegnadis a pro de lenghe basche, e tra chestis la fondazion PuntuEUS, a àn inviât une rêt sociâl gratuite similâr a Twitter indreçade a ducj chei che a vuelin comunicâ par euskara. La rêt – che e à non mastodon.eus – si poie su la plateforme indipendente e decentralizade mastodon.social inviade tal 2016 e che e à za plui di doi milions di utents. Ogni comunitât di utents e pues definî in maniere autonome lis regulis di ûs che, ta chest câs, a previodin l’ûs esclusîf de lenghe basche, messaçs cuntune lungjece fin a cinccent peraulis e la pussibilitât di publicâ contignûts multimediâi.
Font: EiTB, 21/11/18

20/11/18

Bretagne: za 95 mil firmis pe riunificazion bretone

Il dipartiment de Loire Atlantiche al è part dal teritori storic de Bretagne ma al è fûr de regjon aministrative che e puarte chest non. La lote par tornâ a meti dongje chest dipartiment cun chei altris cuatri che za a fasin part de regjon bretone e va indenant zaromai di agns ma no a cjatât ancjemò une rispueste positive de bande dal guvier francês. La organizazion Breizh Unvan / Bretagne Réunie e à duncje inviât une racuelte di firmis par sburtâ il consei dipartimentâl a imbastî une consultazion popolâr su chest teme. La iniziative e à permetût di tirâ sù za 95 mil firmis racueltis framieç dai citadins cun dirit di vôt che a son a stâ intal dipartiment. Si trate de plui grande racuelte di firmis mai vude fin cumò intun singul dipartiment dal stât francês. I organizadôrs a àn domandât al president dal consei dipartimentâl di dâ un segnâl di buine volontât cul meti il teme de consultazion intal ordin dal dì de riunion in program ai 17 di Dicembar. In ogni câs, cun altris 5 mil firmis il consei al sarà obleât par leç a frontâ la cuistion.
Font: Agence Bretagne Presse, 14/11/18

Ocitanie: ricognossiment uficiâl pai ents ocitans de Catalogne

E je stade publicade sul boletin uficiâl dal guvier catalan la prime liste des realtâts associativis cuntune funzion primarie intal promovi l’aranês, la varietât ocitane fevelade inte Val di Aran e che di cualchi an e gjolt di un statût di uficialitât in dute la Catalogne. Par cumò la liste e cjape dentri la associazion culturâl Institut Aranés di Lleida, la Associacion entara Difusion d’Occitània en Catalonha (ADÒC) di Barcelone, il Cercle d’Agermanament Occitano-Català (CAOC) di Barcelone, e l’associazion Es Paums de Val di Aran. Tra lis altris robis, chest ricognossiment al permet a cui che ur fâs donazions di vê une deduzion dal 15% inte declarazion dai redits dal an dopo.
Font: Generalitat de Catalunya, 13/11/18

Irlande: ancje ELEN e domande une leç pal irlandês tal Nord

A son diviersis lis risoluzions fatis buinis intant de assemblee gjenerâl de ELEN – la Rêt Europeane pe Avualiance Linguistiche – che si è tignude a Dublin tra i 2 e i 4 di Novembar. Tra lis altris, il coordenament – che al ten adun 150 organizazions che a rapresentin 45 comunitâts minorizadis sparniçadis in 23 stâts de Europe – al à aprovât ae unanimitât ancje une risoluzion che e poie la aprovazion di une leç par tutelâ e par promovi la lenghe gaeliche irlandese in Irlande dal Nord. Une altre risoluzion fate buine intant de assemblee e denuncie la violazion penze dai dirits civîi in at in Catalogne e lis cetantis iregolaritâts juridichis che si àn viodudis intai procediments penâi cuintri dai dirigjents e dai militants indipendentiscj impresonâts.
Font: CnaG, 12/11/18

Gales: scuintri tra polizie e avocats sul ûs dal galês

Daûr dai criteris fissâts dal comissari pe lenghe galese la polizie e je tignude a garantî une traduzion simultanie tal câs che i agjents che a son daûr a interogâ une persone no sedin in stât di fâlu par galês. In dì di vuê invezit la polizie e ufrìs une traduzion seguitive che, tra lis altris robis, e slungje i timps dal interogatori. Un comitât di avocats al à domandât duncje ae polizie dal Gales di rispietâ i criteris linguistics in vore tal paîs ma si à sintût a rispuindi che, garantî une traduzion simultanie, al domandarès une spese une vore grande e al puartarès a ingredeâ il lavôr di investigazion. Un element, chest ultin, che pai avocats al è dificil di cjapâ par bon dal moment che la traduzion simultanie e je za in vore intes aulis judiziariis cun risultâts une vore positîfs.
Font: BBC, 12/11/18

Paîs Catalans: catalan prime lenghe sui programs par messaçs

Daûr de inchieste teritoriâl bienâl promovude dal Istitût di Statistiche de Catalogne al ven fûr che il 72% dai utents di sistemis di messagjarie mobile (Sms, Whatsapp e v.i.) al dopre il catalan e, plui in detai, il 51,3% cuasi simpri e il 20,7% in alternance cul castilian. La presince de lenghe e je plui alte te fasse di etât tra i 16 e i 24 agns, là che e rive al 82,8%. Par chel che al rivuarde invezit lis rêts sociâls tant che Facebook, Twitter e Instagram, a doprâ il catalan al è il 66,7% dai utents. La percentuâl di ûs de lenghe e je invezit dal 63,2% su chats e forums. Par chel che al tocje il computer, il 46,4% dai utents al dopre un sisteme operatîf configurât par catalan. La percentuâl e je un tic plui basse tal câs dai celulârs là che e je dal 45,7%.
Font: Generalitat de Catalunya, 12/11/18

Aragon: plateforme par condividi informazions sul aragonês

La direzion gjenerâl di politiche linguistiche dal guvier dal Aragon e à inviât une plateforme web cun chê di fâle deventâ un pont di incuintri e di scambi tra ducj i sogjets istituzionâi, associatîfs e imprenditoriâi che a àn aderît al program “Agora x l’aragonés” inviât l’an passât par slargjâ e infuartî l’ûs di cheste lenghe. Intal sît a cjatin spazi dutis lis gnovis leadis ae promozion dal aragonês e lis ativitâts a pro de lenghe svilupadis des realtâts ativis sul teritori.
Font: EFE, 11/11/18

Paîs Catalans: in 10 mil in place a Perpignan pal autoguvier

Ai 10 di Novembar, in ocasion de fieste nazionâl de Catalogne Nord, dîs mil personis a àn manifestât pes stradis di Perpignan par rivendicâ il dirit ae autodeterminazion dai Paîs Catalans e par domandâ la liberazion dai presonîrs politics sierâts intes presons spagnolis e la pussibilitât pai esiliâts di tornâ in patrie cence il risi di jessi arestâts. Prime de partence de manifestazion grups di militants a àn inmaneât un presidi denant de sede dal consolât spagnûl de citât par denunciâ la repression in at intal ream di Spagne cuintri dai indipendentiscj catalans.
Font: Jornalet, 10/11/18

Cossovo/Serbie: alte tension ancje tal incuintri di Bruxelles

Nancje la mediazion europeane e je stade buine fin cumò di cuietâ lis tensions in vore jenfri Cossovo e Serbie. Cun di fat nol è durât nancje une ore l’incuintri tra il president serp Aleksandar Vučić e chel cossovan Hashim Thaci che si è tignût a Bruxelles ai 8 di Novembar. Il rapresentant serp al à bandonât la riunion e al à fat savê che no si varan altris incuintris fintremai che il Cossovo nol gjavarà i dazis dal 10% metûts su dutis lis marcjanziis che a rivin de Serbie e de Bosgne. Par Vučić lis tarifis a son une violazion palese dal acuardi sul libar cumierç inte aree centrieuropeane (CEFTA). A violâ i acuardis in vore al sarès po ancje il progjet di meti sù un esercit cossovan e di logânt une part intes areis a maiorance serbe. Chescj elements di scuintri si son zontâts aes tensions nassudis za chest Astât par vie dai ritarts inte aprovazion dal statût de Zajednica, la Associazion dai Comuns Serps dal Cossovo, e des declarazions rivadis des istituzions cossovanis suntun pussibil scambi di teritori tra i doi paîs par ridusi il numar de minorance serbe in Cossovo e di chê albanese in Serbie.
Font: Balkan Insight, 08/11/18; RFE RL, 09/11/18

Galizie/León: in cressi i students di galizian intal Bierzo

La comission che i sta daûr al program di promozion dal galizian intal Bierzo e in Sanabria – areis di lenghe galiziane che si cjatin inte comunitât di Castilie e León – e à fat savê che, pûr se minime, ancje chest an si à vude une incressite dai fruts che a studiin il e par galizian a scuele. Plui in detai, si fevele di 1.112 students a front dai 1.101 dal an scolastic 2017/2018 e dai 980 dal 2016/2017. L’insegnament al è disponibil in 19 tra centris scolastics infantîi, primaris e secondaris. La iniziative e je pussibile in gracie di un acuardi tra il guvier de Galizie e chel di Castilie e León. In plui di fâ il pont su la situazion, la comission e à decidût di inviâ une campagne par promovi il program framieç des fameis dal teritori.
Font: Lingua.gal, 07/11/18

Asturiis: asturian veicolâr a scuele, sperimentazion positive

Plui dal 83% des fameis che i lôr fîs a àn partecipât al plan sperimentâl pe promozion e pal ûs dal asturian intal an scolastic 2017/2018 a judichin une vore positive la esperience e le racomandin par ducj i students. Il plan – inviât pe prime volte l’an passât – al previodeve che tes classis cuartis di sîs scuelis primariis (logadis a Avilés, Carbayín, Grau, Lieres, L’Entregu e Mieres), dongje des oris di lenghe e di leterature asturiane, si sperimentàs l’ûs veicolâr dal asturian par insegnâ une altre materie di sielzi tra siencis sociâls, siencis naturâls, educazion fisiche o educazion artistiche. Par puartâ indenant lis lezions par asturian si à sielzût personâl cu la abilitazion linguistiche juste e za in servizi ta chei istitûts in maniere che no si àn vûts coscj in plui. I insegnants che a àn aderît al progjet a àn valutât in maniere positive la lôr esperience ma a àn marcât la dibisugne di svilupâ materiâi didatics di pueste par asturian. Dai 105 fruts che a àn partecipât ae sperimentazion, rispiet ai risultâts vûts l’an prime te stesse materie insegnade par castilian, il 41,59% al à miorât i siei vôts e il 42,57% ju à confermâts. Chest an al si à tornât a proponi il plan simpri tai sîs istitûts là che si veve za vude la sperimentazion ma, in cuatri di lôr, aes classis cuartis si àn zontadis ancje lis cuintis.
Font: La Voz, 06/11/18

Paîs Catalans: aument progressîf dal catalan te UV

Vie pal an academic 2019/2020 la Universitât di València (UV) e garantirà almancul il 46% des lezions par catalan. L’aument de presince di cheste lenghe tai percors di studi e larà po indenant a cressi par rivâ, dentri dal 2022, al 50%. I grups di insegnament monolengâi a saran sostituîts in maniere progressive di grups plurilengâi in maniere di garantî ai students che si laurein une competence academiche par catalan, par castilian e intune lenghe foreste. Lis gnovis liniis a son stadis decidudis ai 6 di Novembar dal senât academic de universitât valenziane.
Font: Levante, 06/11/18

13/11/18

Galizie: A Mesa e denuncie la violazion dai dirits linguistics

Ai 30 di Otubar A Mesa pola Normalización Lingüística e à presentât il rapuart su la situazion dal galizian metût jù pe segretarie de Cjarte europeane des lenghis regjonâls o minoritariis dal Consei de Europe. La organizazion e denuncie violazions dai dirits linguistics de bande dal stât centrâl e dal guvier galizian in ducj i cjamps di lôr competence. Par esempli, par chel che al rivuarde lis scuelis, l’esecutîf galizian al manten operatîf il decret sul plurilinguisim cundut des critichis za rivadis propit dal Consei de Europe e nol garantìs ad in plen l’insegnament dal galizian. La television publiche galiziane (TVG) e ufrìs une presince minime de lenghe proprie e e je la uniche, tra chês des nazionalitâts ricognossudis, a no vê un canâl di pueste pai fruts. Si àn po problemis pe distribuzion dal cine galizian, intant che a calin i invistiments su lis dopleaduris di produzions audiovisivis. Par chel che al rivuarde lis aministrazions publichis, la lenghe proprie e à fat pas indaûr intai ents locâi ancje par vie de mancjance dal oblic pai funzionaris di cognossi il galizian. I dirits linguistics dai galizians a son po violâts dai uficis decentrâts de aministrazion statâl, dai servizis publics esternalizâts e ancje de aministrazion judiziarie.
Font: A Mesa, 30/10/18

Albanie: tension alte cu la comunitât greghe

Il sassinament di un membri de comunitât greghe de Albanie de bande de polizie e à tornât a piâ lis tensions tra i doi paîs e tra lis istituzions albanesis e la minorance greghe formade sù par jù di uns 25 mil personis. Ai 28 di Otubar poliziots albanês a àn copât Kostandinos Kacifa dopo che al veve trat cuintri di un machine de polizie. Il fat al è capitât tal paîs di Bularat, inte aree là che e vîf la minorance greghe, intune zornade là che la comunitât locâl e jere daûr a celebrâ une fieste nazionâl greghe. La int dal paîs e à declarât che tal moment dai fats la machine de polizie e jere vueide e che Kacifa nol veve chê di ferî o di copâ nissun. Par Vangjel Dule – parlamentâr di riferiment de minorance greghe – il compuartament dai poliziots al è stât disproporzionât e no professionâl. Chest episodi al torne duncje a piâ lis tensions dopo che tai ultins agns i rapuarts tra Albanie e Grecie a jerin lâts in miôr e il Parlament di Tirane al veve fate buine une leç che e ricognòs la tutele dal grêc intai comuns là che almancul il 20% de popolazion al parten a cheste comunitât.
Font: Balkan Insight, 29-30/10/18

Ocitanie: Montpellier al rivendiche l’ocitan te radiotv publiche

Cuntune mozion votade dal consei comunâl ancje la aministrazion di Montpelhièr / Montpellier e à decidût di sostignî la campagne puartade indenant de organizazion Collectiu Occitan par incressi la presince de lenghe ocitane intai mieçs di comunicazion publics. A son za diviers i comuns o lis associazions di ents locâi che, cun mozions, letaris o altris cjoltis di posizion uficiâls, a àn aderît ae iniziative. Il Collectiu Occitan, che al ten adun lis realtâts politichis e associativis plui rapresentativis de Ocitanie, al domande une presince cuotidiane e cualificade de lenghe ocitane te cjadene de television publiche regjonâl France 3 e tes rêts locâls de radio France Bleu. In dì di vuê la television publiche e ufrìs a pene 17 oris di emissions par ocitan intun an, ven a dî mancul di une ore e mieze al mês.
Font: Jornalet, 29/10/18

Paîs Basc: in miârs in place pal basc uficiâl in dute la Navare

Ai 27 di Otubar miârs di personis a àn partecipât ae manifestazion clamade dongje de organizazion Kontseilua a Iruñea / Pamplona par domandâ che si ricognossi la uficialitât de lenghe basche in dute la Navare. Ae iniziative a àn aderît une otantine di realtâts sociâls e, tra chestis, ancje i partîts Geroa Bai e EH Bildu e i sindacâts ELA e LAB. Prime di dâsi adun par un moment di fieste e di rivendicazion, i manifestants a son partîts di trê ponts diferents de citât, ognidun daûr di un strisson che al proponeve une peraule clâf leade ae uficialitât dal euskara, ven a dî avualiance (berdintasuna), coesion (kohesioa) e justizie (justizia). Propite la varietât di citadins e di sogjets che a àn partecipât, che e va ben plui innà des organizazions impegnadis pe lenghe, e palese la poie che la uficialitât de lenghe basche e cjate framieç de societât. Si à duncje domandât al Parlament de Navare che al fasi buine dentri de fin de legjislature une gnove leç di politiche linguistiche che e slargji la uficialitât dal euskara e, cun chê, la pussibilitât di doprâlu ad in plen in dut il teritori de Comunitât.
Font: EiTB, 27/10/18

Moldove: istruzion par rumen, scuintri cu la Transnistrie

Lis autoritâts de Moldove, ancje su la fonde di une sentence de cort europeane pai dirits umans, a acusin chês de Transnistrie di pidimentâ l’acès dai students aes scuelis in lenghe rumene. La cussì clamade Republiche moldave dal Dniester, regjon a maiorance russe che e à otignût une indipendence di fat intal 1992 dopo cuatri mês di conflit, e à sierât in maniere progressive la plui part des scuelis di lenghe rumene e si calcole che dome tai ultins sîs agns i iscrits di chescj istitûts a sedin calâts dal 35% par vie des politichis metudis in at des autoritâts di Tiraspol. La prime ministre vicjarie de Moldove, Cristina Lesnic, dongje di criticâ chestis politichis e à invidât il guvier de Transnistrie a autorizâ i students di chest teritori a frecuentâ lis scuelis moldavis di lenghe rumene su la fonde di une tessare di studi che e eviti i berdeis burocratics che in dì di vuê a discoragjin lis fameis di lenghe rumene che a vivin par di là dal Dniester a cjapâ cheste strade.
Font: Balkan Insight, 25/10/18

Macedonie: braç di fier sul albanês inte costituzion

Doi dai partîts de minorance albanese de Macedonie, ven a dî il moviment BESA e la Aleance pai Albanês a àn fat savê che no laran indenant a poiâ il procès di riforme costituzionâl par meti in vore l’acuardi cjatât cu la Grecie sul non de Republiche ex jugoslave se no si acetarà di meti dentri te Costituzion ancje il ricognossiment de uficialitât de lenghe albanese in dut il teritori statâl. La Aleance pai Albanês e volarès che si mendàs ancje la jentrade de cjarte costituzionâl par zontâ i albanês ai macedons tant che popolazion costitutive dal paîs. I doi partîts a contin dome cuatri dai 120 deputâts dal Parlament de Macedonie ma a son decisîfs par rivâ ae maiorance di doi tierçs che e covente par aprovâ lis modifichis costituzionâls. Dopo di un prin vôt parlamentâr sul cambiament dal non a coventin ancjemò altris dôs votazions par puartâ insom il procès e, cence di chescj cuatri deputâts, si riscje di no vê avonde vôts. La Union Democratiche pe Integrazion, il partît plui votât de comunitât albanese, al à dite invezit che nol intint di meti in pericul il procès di cambiament dal non dopo che a àn coventât 17 agns par cjatâ un acuardi in proposit cu la Grecie.
Font: Balkan Insight, 25/10/18

Paîs Catalans: confermât il procès pai dirigjents indipendentiscj

Ai 25 di Otubar il tribunâl suprem spagnûl al à confermât la conclusion de istrutorie cuintri dai dirigjents indipendentiscj catalans e la decision di rinviâju ducj a procès. La date no je stade ancjemò fissade ma, cun dute probabilitât, la prime udience e varès di tignîsi sul prin tacâ di chest an che al ven. Ta chê ocasion a saran clamâts a rispuindi pai reâts di ribelion e di malversazion Oriol Junqueras (vicepresident destituît), Joaquim Forn (conseîr pal interni destituît), Jordi Turull (conseîr pe presidence destituît), Raül Romeva (conseîr pai forescj destituît), Josep Rull (conseîr pal teritori destituît) e Dolors Bassa (conseire pes politichis sociâls destituide); par ribelion Jordi Sànchez (ex president de ANC), Jordi Cuixart (president dal Òmnium Cultural) e Carme Forcadell (za presidente dal Parlament catalan); par disubidience e malversazion Meritxell Borràs (conseire pal guvier destituide), Carles Mundó (conseîr pe justizie destituît) e Santi Vila (conseîr pes ativitâts economichis destituît); e par disubidience Lluís Corominas (za membri de presidence dal Parlament), Lluís Guinó (za membri de presidence dal Parlament), Anna Simó (za membri de presidence dal Parlament), Ramona Barrufet (za membri de presidence dal Parlament), Joan Josep Nuet (za membri de presidence dal Parlament) e Mireia Boya (za deputade de CUP). Dal procediment invezit, almancul par cumò, a restin fûr i dirigjents indipendentiscj che si cjatin in esili.

Galizie: prins pas par une associazion dai ents locâi pe lenghe

A van indenant in Galizie i lavôrs par meti in pîts la Associazion dai ents locâi pe lenghe (Asociación de Entidades Locais pola Lingua). Ai 25 di Otubar a S. Jacum di Galizie si son dâts adun i responsabii de politiche linguistiche di une vincjine di comuns che a àn metût jù un stampon di statût e si son impegnâts a meti sù il gnûf sogjet dentri di cualchi mês. L’obietîf al è chel di rivâ a di une gjestion plui eficace dai progjets comuns a pro de lenghe galiziane. La intenzion e je ancje di tirâ dongje a man a man ancje chei altris ents che a svilupin politichis linguistichis ativis pal galizian. Tra i comuns che a son daûr ae iniziative o cjatìn ancje chei di A Coruña / La Coruña, Ferrol, Ourense / Orense e Pontevedra.
Font: santiagodecompostela.gal, 25/10/18

Paîs Catalans: model scolastic, si vierç une taule di confront

Ai 24 di Otubar i rapresentants de organizazion Plataforma per la Llengua si son cjatâts cuntune delegazion dal dipartiment pe istruzion dal guvier catalan par confrontâsi su la modifiche dal model scolastic. Pai funzionaris dal dipartiment si trate di adatâ il model aes gnovis realtâts sociolinguistichis che si àn in Catalogne. La organizazion e je però preocupade che l’intervent al puedi pesâ in maniere negative su lis competencis linguistichis par catalan di une part dai students. Pe Plataforma per la Llengua, se si vûl che il catalan al sedi la lenghe comune e di coesion sociâl, al covente infuartî e no ridusi l’insegnament de lenghe tes areis là che e je plui debule. Lis parts si son lassadis cul acuardi di tornâ a cjatâsi ator di une taule di negoziazion là che, ca di cualchi setemane, la organizazion e presentarà lis sôs propuestis di modifiche al test imbastît dal guvier.
Font: Plataforma per la llengua, 24/10/18

Asturiis: maiorance dai zovins a pro de uficialitât dal asturian

Ai 23 di Otubar a son stâts presentâts i risultâts di une inchieste sociolinguistiche metude adun dal Consei pai zovins dal principât des Asturiis e de Academie pe lenghe asturiane. Il scandai si è davuelt vie pal mês di Setembar e al à cjapât dentri un campion significatîf di fantats asturians tra i 16 e i 19 agns. La ande dai zovins tai confronts de lenghe e je positive, a àn dite intant de presentazion, e chest al puarte a viodi in maniere plui positive ancje l’avignî dal asturian. Sul plan dai ûs linguistics, il 49% dai intervistâts al dîs di doprâ par solit il castilian, il 7,8% l’asturian e il 42,5% dutis e dôs lis lenghis. Par chel che al rivuarde il valôr dal asturian, il 67% dal campion lu calcole util sei in famee che tai rapuarts sociâi. I risultâts plui positîfs si ju à però cuant che si tocje il cjamp des politichis linguistichis. Cun di fat, il 72% dai fantats al è dacuardi che si dopri l’asturian come lenghe veicolâr intes scuelis e l’80% al volarès che al fos plui presint intai mieçs di comunicazion. In mert al so ricognossiment come lenghe uficiâl des Asturiis, il 57% al è dacuardi ad in plen e il 28% avonde dacuardi: la misure e je duncje poiade dal 85% dai zovins intervistâts.
Font: El Comercio, 24/10/18

Gales: plan par sburtâ la inovazion tecnologjiche par galês

Il guvier dal Gales al à imbastît un plan di azion pe inovazion tecnologjiche in lenghe proprie. Une des prioritâts e je chê di svilupâ implants di inteligjence artificiâl in stât di capî il galês fevelât. Cun di fat, il slargjâsi di imprescj domestics che a rispuindin a comants vocâi al puarte a introdusi l’ûs dal inglês fintremai tes cjasis des fameis là che si fevelave dome par galês. Altris liniis di azion dal plan a previodin il svilup di programs automatics di traduzion e il miorament dai contignûts in lenghe galese di aplicazions e di imprescj informatics.
Font: BBC, 23/10/18

08/11/18

Paîs Catalans: i avocats a sburtin par cressi il catalan te justizie

Il consei dai avocats de Catalogne si mostre preocupât pal stât de lenghe catalane tal cjamp de justizie. Tai ultins agns si à vude une riduzion progressive des sentencis scritis par catalan che tal 2017 a son stadis a pene il 8,2% dal totâl. A nivel locâl si è lâts dal 16% de provincie di Girona al 3,6% di chê di Tarragona. In dì di vuê la leç e previôt la cognossince obligatorie dal catalan dome pal personâl no judiziari dai tribunâi. Il consei dai avocats al domande duncje che la cognossince de lenghe e deventi un element obleât e no dome un mert ancje pai judiçs e pai publics ministeris. Vuê come vuê, di fat, denant di judiçs o pm che no cognossin la lenghe i avocats si cjatin dispès a vê di passâ al castilian par sveltî la procedure ma, ta cheste maniere, si ricjatin a gjavâi naturalitât al esercizi de difese.
Font: VilaWeb, 19/10/18

Stât francês: grup parlamentâr autonom pai nazionalitaris

Uns cuindis deputâts elets inte Assemblee francese a àn decidût di dâsi dongje intun grup parlamentâr autonom batiât “Libertâts e teritoris” là che a son dentri ancje i cuatri deputâts de Federazion des regjons e dai popui solidaris che e met adun moviments politics de Alsazie, de Bretagne, de Corsiche, de Ocitanie, de Savoie, dal Paîs Basc e dai Paîs Catalans francês. Plui in detai si fevele dal parlamentâr breton Paul Molac e di chei cors Jean-Félix Acquaviva, Michel Castellani e Paul-André Colombani. La nassite dal grup ur darà la pussibilitât di gjoldi di plui timp e di plui modalitâts di intervent dentri de Assemblee.
Font: Fédération RPS, 18/10/18

Irlande: tal Nord a cressin i sportei linguistics pal gaelic

Cul mês di Otubar tes aministrazions locâls de Irlande dal Nord a àn tacât a lavorâ cinc gnûfs operadôrs linguistics pal gaelic irlandês che si zontin ai cuatri che za a jerin. Plui in detai, trê a son jentrâts in vore tai conseis distretuâi di Fear Manach / Fermanagh, An Ómaigh / Omagh e An Srath Bán / Strabane e doi tai conseis comunâi di Béal Feirste / Belfast e Doire / Derry. I sportei linguistics gjestîts di chescj operadôrs a viodin di cors di formazion linguistiche e consulencis pai funzionaris de aministrazion locâl, de organizazion di events culturâi, de traduzion di materiâi internis e pal public. La viertidure dai sportei e rispuint a di une incressite dal interès dai citadins pe lenghe e pe culture irlandese e e ufrìs une oportunitât di superament des tensions ancjemò vivis tra lis comunitâts nordirlandesis.
Font: Foras na Gaeilge, 17/10/18

Paîs Basc: propueste par garantî l’aprendiment gratuit dal basc

Il Statût de Comunitât Autonome Basche al previôt che ducj i citadins a vedin il dirit di cognossi e di comunicâ par euskara. Dut câs la presince de lenghe basche te educazion publiche no garantìs simpri chest dirit e i percors di aprendiment par adults a àn un cost che no ducj a puedin permetisi. Par chest EH Bildu al à presentât une propueste di leç intal Parlament de Comunitât in maniere di garantî che ducj a puedin imparâ in maniere gratuite l’euskara almancul fin al nivel B2 dal cuadri comun european di riferiment pes lenghis.
Font: El Diario, 17/10/18

Gales: plan par fâi cuintri ae emigrazion dai zovins galesofons

La emigrazion dai galês fûr dal lôr paîs in plui che pe economie locâl al è un dam ancje pe lenghe, massime se si pense che la plui part di lôr e va vie propit des comunitâts là che il galês al è ancjemò maioritari. Tai ultins dîs agns, par esempli, si stime che a sedin stâts plui di 100 mil i zovins che a àn bandonât lis regjons di Ynys Môn, Gwynedd, Ceredigion e Sir Gâr / Carmarthenshire. Par chest la organizazion pe lenghe Cymdeithas yr Iaith e à dât fûr une propueste cun dodis misuris che si proponin di intervignî sul plan economic par fermâ cheste emoragjie. Par esempli si propon di trasferî centenârs di puescj dal setôr public fûr de citât di Caerdydd / Cardiff, di taiâ i coscj par cui che al reste a studiâ in Gales, di inviâ cors universitaris pal personâl sanitari tes citâts là che il galês al è plui vivarôs, e di inviâ des cassis di sparagn sostignudis cui fonts pensionistics par finanziâ i piçui progjets locâi e di utilitât sociâl.
Font: Cymdeithas, 16/10/18

Paîs Catalans: si infuartissin i servizis digjitâi par catalan

Il catalan al è tra lis cuarante lenghis sielzudis di Google pe gnove aplicazion che, par mieç di auricolârs di pueste, e garantìs la traduzion automatiche di ce che si dîs intune di chês altris lenghis selezionadis. Il catalan al è l’unic tra lis lenghis minorizadis de Europe dentri de liste. La multinazionâl americane e je daûr a colaborâ cul guvier de Catalogne ancje suntun model acustic pe sintesi statistiche parametriche dal lengaç, o sei une vôs parametrizade in catalan di alte cualitât. Colaborazions istituzionâls a son in vore ancje par svilupâ programs di ricognossiment vocâl sei dentri di Mozilla, sei cun software libar.
Font: Plataforma per la Llengua, 16/10/18; Generalitat de Catalunya, 19/10/18

Asturiis: gnovis iniziativis par sburtâ la uficialitât dal asturian

Il president de Academie de Lenghe Asturiane, Xosé Antón Gonzalez Riaño, si à cjatât cul president dal intergrup des lenghis minoritariis dal Parlament european, Nils Torvalds, par presentâi la situazion dal asturian e la dibisugne che al vegni ricognossût tant che lenghe uficiâl des Asturiis, intune cul castilian. Cheste azion di dâi visibilitât al asturian a nivel european si cubie cu lis iniziativis puartadis indenant in patrie. In chest câs e je la Xunta pola Defensa de la Llingua che e torne a domandâ ai deputâts asturians di fâ buine la riforme dal Statût di autonomie in maniere di ricognossi la uficialitât de lenghe proprie. Par mendâ il Statût al covente il vôt a pro di trê cuints dal Parlament. Une percentuâl di deputâts che, almancul su la cjarte, cumò e sarès. Cun di fat, se il PP al va dilunc a jessi contrari, Podemos e Izquierda Xunida a son za di agns a pro de uficialitât; ancje il Partît Socialist si à declarât a pro ma un pôcs dai siei rapresentants, compagn di chei dal Foro, a pensin che nol sedi ancjemò il moment just par meti in vore cheste riforme.
Font: La Nueva España, 15/10/18; El Comercio, 16/10/18

Paîs Basc: cun Novembar i plans linguistics gnûfs in Navare

Dentri de fin dal an, probabil za cun Novembar, il guvier de Navare al fasarà bogns i gnûfs plans sul ûs de lenghe basche inte aministrazion publiche. Ta chestis zornadis Euskarabidea – l’istitût pe lenghe basche de Navare – al à fat indenant lis sôs propuestis in proposit. L’esecutîf al larà a tamesâlis e, se dal câs, a mendâlis su la fonde dai risultâts de ricognizion che si è daûr a fâ su la disponibilitât di personâl bon di doprâ l’euskara e sui uficis e i servizis là che si à di intervignî par prins. Su la fonde di chescj criteris di prioritât si larà po a riviodi i organics e i plans linguistics di meti in vore.
Font: Noticias de Navarra, 12/10/18

Galizie: rêt par infuartî lis relazions galizianis - portughesis

Ai 12 di Otubar a Pontevedra si à presentade la Rede de Galilusofonía, une rêt che e met adun uns cuindis entitâts galizianis e portughesis che, cul meti dongje ideis e fuarcis, si proponin di slargjâ la cognossince de musiche e des produzions culturâls che a rivin di chestis dôs areis e, in particolâr, di svicinâ la lenghe e la culture galiziane aes comunitâts che a àn il portughês tant che lenghe uficiâl. La rêt e à ancje chê di svilupâ progjets origjinâi a partî dal patrimoni linguistic condividût.
Font: Galicia Confidencial, 11/10/18

Irlande: a cressin ma no avonde i fonts pal gaelic

Conradh na Gaeilge e à preseât la decision dal guvier irlandês di meti 3 milions di euros inte manovre finanziarie pal 2019 par meti in vore un pocjis des misuris previodudis dal plan trienâl svilupât de organizazion e poiadis di une novantine di realtâts associativis impegnadis pe lenghe e pes comunitâts gaelichis. Chel istès no à platât un ciert marum pal fat che cetantis altris misuris proponudis a son restadis cence finanziament. Il plan, di fat, al previôt un invistiment complessîf di 18 milions – 9 di meti te finanziarie di chest – e al ponte a creâ 1.190 puescj di vore centrâts pe plui part intal Gaeltacht, o sei lis areis là che l’irlandês al è ancjemò fevelât in maniere significative. Conradh na Gaeilge e à duncje invidât il prin ministri irlandês, Leo Varadkar, a riviodi il progjet de finanziarie e a cjatâ fûr ancje i 6 milions che a mancjin par sostignî dutis lis misuris previodudis intal plan e a invertî in maniere clare i tais metûts in at dal 2008 incà ai fonts pe lenghe irlandese e pes areis gaelichis.
Font: CnaG, 09/10/18

Paîs Catalans: acuardi sorestatâl sui certificâts linguistics

Il guvier catalan e chel di Andorra a àn decidût di firmâ un acuardi di colaborazion par un ricognossiment mutuâl dai diplomis e dai atestâts che a certifichin il nivel di cognossince de lenghe catalane. Ta cheste maniere si larà a facilitâ la mobilitât des personis intal cjamp lavoratîf, tai percors scolastics e tal acès ae aministrazion publiche. Il sisteme di increditament linguistic pal catalan al è in vore dal 1979 intal principât di Catalogne e dal 1999 in Andorra.
Font: La Vanguardia, 09/10/18

Bretagne: inchieste par svilupâ politichis linguistichis gnovis

Dai 7 di Jugn ai 3 di Lui plui di 8 mil personis dai cinc dipartiments de Bretagne storiche (duncje ancje chel de Loire Atlantiche che al parten a di une altre regjon aministrative) a son stadis sintudis intune inchieste che, a vuê, e je la plui grande sul plan dai ûs linguistics dai bretons. La aministrazion regjonâl de Bretagne, che e à comissionât chest scandai, e à comunicât i prins dâts elaborâts su la fonde de inchieste. Al ven fûr che a fevelâ par breton al è il 5,5% de popolazion, o sei sù par jù 213 mil personis, intant che un 3,5% lu capìs ben ma nol è in stât di fevelâlu e un 31% al declare di jessi bon di paronâ dome cualchi frase. Par chel che al rivuarde la trasmission de lenghe, il 90% dai fantats tra i 15 e i 24 agns che le cognossin e il 53% di chei tra i 25 e i 39 agns le àn imparade a scuele, a dimostrazion de funzion centrâl che a davuelzin lis scuelis bilengâls o a imersion bretonis. In proposit, il 73% dai intervistâts al domande di infuartî l’insegnament de lenghe te educazion publiche e il 55% di cressi la presince dal breton te radiotelevision. I elements tirâts sù intant de inchieste a saran doprâts dal guvier de Bretagne par fissâ lis liniis di azion dai prossims plans di politiche linguistiche che a varessin di jessi fats bogns tor de metât di Dicembar.

08/10/18

Irlande: campagne par incressi i fonts pal gaelic

Une novantine di realtâts associativis impegnadis pe lenghe e pes comunitâts gaelichis si son dadis adun ai 3 di Otubar a Dublin, dongje dal Parlament, par sburtâ i deputâts de Republiche a poiâ il plan di invistiments pe lenghe irlandese metût jù de organizazion Conradh na Gaeilge. Il plan al ponte a creâ 1.190 puescj di vore centrâts pe plui part intal Gaeltacht, o sei lis areis là che l’irlandês al è ancjemò fevelât in maniere significative, e al previôt un invistiment trienâl di 18 milions di euros: 9 di meti te finanziarie di chest an e il rest dividût tra 2019 e 2020. Il progjet al cjate la poie ancje di Foras na Gaeilge, la organizazion publiche che i sta daûr ae promozion dal irlandês, e di Udarás na Gaeltachta, la agjenzie di stât responsabile pal svilup economic des areis gaelichis. Propit cheste ultime, tal zîr di dîs agns, si à ricjatade cuntun tai dal 70% dai finanziaments che le àn pidimentade te sô capacitât di sburtâ la incressite economiche e ocupazionâl dal Gaeltacht e duncje di evitâ la dispersion des comunitâts di lenghe gaeliche.
Font: Irish Times, 03/10/18

Paîs Basc: impegn dal Osasuna par promovi l’euskara

I dirigjents dal Osasuna, societât che e gjestìs la scuadre di balon di Iruñea / Pamplona, e de AEK, organizazion di promozion de lenghe basche, a àn sotscrit un acuardi par infuartî la presince dal euskara dentri de societât sportive. In plui di un plan di traduzion dai materiâi informatîfs e di comunicazion, l’acuardi al previôt intervents di sensibilizazion e cors di lenghe basche pal personâl de societât e pai zuiadôrs. Intal statût dal Osasuna za si ricognòs la paritât jenfri euskara e castilian.
Font: Diario de Navarra, 03/10/18

Galizie: aument lizêr dai libris publicâts par galizian

Daûr de panoramiche anuâl su la editorie intal stât spagnûl publicade dal ministeri pe culture al ven fûr che vie pal 2017 i libris par galizian a son cressûts sù par jù dal 6% cun 1.288 titui publicâts a front dai 1.211 dal an prime. Si trate di un segnâl in cuintritindince dopo che dal 2014 incà lis publicazions a jerin ladis simpri in calâ. Chest aument nol tocje invezit lis traduzions. Cun di fat, i titui voltâts intal 2017 a son stâts dome 42 cuintri dai 54 dal 2016. Intal cuadri dal stât spagnûl, i titui jessûts par galizian a rapresentin plui o mancul l’1,5% dal totâl.
Font: Consello da Cultura Galega, 02/10/18

Irlande: materiâi pai fruts de diaspore gaeliche

La organizazion Conradh na Gaeilge e à slargjât a nivel internazionâl il progjet Cultúr Club che al met a disposizion sore nuie libris e materiâi par ativitâts culturâls in lenghe irlandese pai fruts de diaspore. I materiâi a son svilupâts par trê fassis di etât, o sei 6-8 agns, 9-12 agns e 13-16 agns. L’intindiment al è chel di meti a disposizion imprescj di lavôr pes fameis di divignince irlandese che, ancje se ator pal mont, a vuelin che i lôr fruts a puedin cjapâ sù la culture e la lenghe gaeliche. Il progjet al previôt ancje ativitâts sperimentâls par testâ i risultâts che a divegnin dal ûs di chescj materiâi in Australie, in Gnove Zelande e intal Ream Unît.
Font: CnaG, 02/10/18

Europe: progjet de ELEN pe avualiance linguistiche digjitâl

ELEN – la Rêt Europeane pe Avualiance Linguistiche – e à presentât denant dal Parlament european il so progjet su la diversitât linguistiche digjitâl. La Union Europeane no pues intervignî in maniere direte tes politichis linguistichis dai stâts membris ma e pues svilupâ des liniis di intervent che a garantissin la avualiance des lenghis, ancje chês minorizadis o regjonâls, intal setôr digjitâl. Di fat, se chestis lenghis a vessin di jessi margjinalizadis o metudis fûr dai mecanisims di une societât che e je simpri plui digjitalizade, si riscje che cui che lis fevele si ricjati pes mans une bombe a timp pronte a dâ un colp mortâl aes lôr lenghis. L’apel par intervignî su chest cjamp cun politichis ativis e finanziaments di pueste al è stât indreçât ancje ae Comission europeane.
Font: ELEN, 02/10/18

Paîs Catalans: mobilitazions e tensions pal inovâl dal 1-O

A un an di distance dal referendum su la indipendence e des violencis poliziâls che lu àn compagnât, a son stadis cetantis lis azions e lis manifestazions che si son davueltis il prin di Otubar ator pe Catalogne. La buinore e je stade segnade des interuzions di stradis e feroviis metudis in at, massime a Barcelone e a Girona, dai Comitâts di Difese de Republiche (CDR) e dal siopar proclamât de plateforme des Universitâts pe Republiche che e à puartât in place miârs di students. La manifestazion plui gruesse si le à vude però intal tart dopodimisdì a Barcelone là che plui di cent mil personis a àn sfilât di Plaça de Catalunya al parc là che si cjate il Parlament par stiçâ i deputâts a rispietâ il mandât popolâr jessût dal vôt referendari dal an prime.

Bretagne: gnove manifestazion a Nantes pe riunificazion

Sabide ai 29 di Setembar si à tignude a Naoned / Nantes une gnove manifestazion pe riunificazion de Bretagne. I organizadôrs a àn fevelât di une partecipazion di uns cuatri mil personis intant che pe polizie la adesion e je stade di mancul de metât. Al centri de iniziative e je la domande di tornâ a meti adun il dipartiment de Loire Atlantiche cul rest de Bretagne intune regjon aministrative uniche. Une domande che, daûr dai sondaçs, e je condividude di plui di doi tierçs dai residents de Loire Atlantiche.
Font: ABP, 29/09/18

Paîs Catalans: catalan in cressi tes aplicazions plui dopradis

La ufierte dal catalan intes aplicazions cun messazarie istantanie plui dopradis in Catalogne e je daûr a cressi. Daûr de ultime inchieste dedicade al setôr digjitâl curade de associazion pe ricercje sui mieçs di comunicazion al ven fûr che la lenghe catalane e je disponibile su siet des dîs aplicazions plui dopradis, ven a dî WhatsApp, Skype, Snapchat, Google Hangouts, Facebook Messanger, Telegram e Yahoo. La direzion gjenerâl di politiche linguistiche dal guvier catalan e met a disposizion liniis di finanziament di pueste pes aziendis che a metin il catalan tra lis lenghis disponibilis su apps e altris imprescj digjitâi.
Font: Generalitat de Catalunya, 27/09/18

Paîs Basc: progjet pal bilinguisim intai ents locâi de Navare

Il Parlament de Navare al è daûr a davuelzi une rie di audizions inte prospetive di meti jù une gnove leç di politiche linguistiche. Tra i contribûts che a àn fat discuti di plui si à chel presentât de Rêt dai tecnics municipâi dal euskara che al va te direzion di rindi uficiâl la lenghe basche in dute la Navare, a front de tripartizion linguistiche in vore in dì di vuê. La Rêt e stime che, al plui tart intal zîr di cincuante agns, ducj i ents locâi de Navare a podaressin jessi ad in plen bilengâi. Il plan presentât al propon di dividi il teritori de Comunitât in cuatri areis dulà meti in vore misuris progressivis di introduzion dal basc daûr dal nivel di cognossince de lenghe. Te aree là che plui dal 70% de popolazion e fevele za par basc lis misuris a puedin jentrâ in vore daurman, ta chê là che la percentuâl dai euskalduns e je tra il 40 e il 70% si stime di rivâ al bilinguisim efetîf in vincj agns, ta chê tra il 10 e il 40% in vincjecinc agns, e ta chê sot dal 10% in cincuante agns. Dut câs, chê di slargjâ la uficialitât dal euskara in dute la Navare, e je une ipotesi che e cjate la oposizion totâl de diestre spagnoliste e regjonaliste (PP e UPN), la contrarietât plui sfumade dal PSN e di Izquierda-Ezkerra e i dubis dai nazionaliscj moderâts di Geroa Bai; a declarâsi a pro di chest progjet a son invezit i progressiscj di Podemos-Orain Bai e dai nazionalitaris di EH Bildu.
Font: Diario de Navarra, 26/09/18 e 04/10/18

Finlande/Norvegje: Consei Sami critic cu la ferovie artiche

Il Consei Sami – organizazion no governative che e promôf i dirits e i interès des comunitâts sami – al è intervignût sul progjet di une ferovie artiche che e scjavaci lis regjons plui setentrionâls de Finlande e de Norvegje par peâ il rest de rêt feroviarie cul Mâr di Barents, plui o mancul tra Rovaniemi e Kirkenes. Pal Consei Sami, di là de sielte di percors che si fasarà, cheste linie e taiarà areis di passon e trois migratoris fondamentâi pes renis dant un colp une vore dûr ae economie tradizionâl e ae culture des popolazions locâls. Cun di plui, cul lassâ fûr lis comunitâts sami dal procès di svilup dal progjet, si za à violât i dirits di fonde de popolazion native di chestis tieris. La presidente dal Consei, Åsa Larsson Blind, e crôt ancje che daûr de ferovie a rivaran altris realtâts industriâls che a laran a incressi i problemis pal ambient, pes ativitâts e pe culture sami. Come prin pas, il Consei al domande ai guviers finlandês e norvegjês di inviâ daurman une consultazion di dutis lis realtâts rapresentativis des comunitâts nativis e di coinvolzilis in ducj i passaçs decisionâi leâts al progjet.
Font: The Barents Observer, 24/09/18