Cul
svicinâsi dal prin di Otubar – date fissade des autoritâts de
Catalogne par davuelzi il referendum su la indipendence – e cres
simpri plui a fuart la repression des autoritâts di Madrid. Cun chê
di impedî il vôt si à metût in at chel che diviers mieçs di
comunicazion catalans a àn definît un vêr “colp di stât” a
dam dal guvier de Catalogne.
Ai 20 di Setembar l’esecutîf spagnûl
al à cjapât in man la gjestion des financis catalanis, gjavantji
duncje intai fats la autonomie ae Comunitât de Catalogne. Cheste
espropriazion e je stade compagnade di une operazion di polizie che e
à puartât al arest di cuindis funzionaris dal guvier catalan, pe
plui part impegnâts in setôrs leâts ae organizazion de
consultazion, e ae percuisizion di diviers dipartiments dal guvier,
ma ancje di aziendis, studis legâi e abitazions privadis. La polizie
spagnole e à ancje cirût di jentrâ cu la fuarce e cence mandât
inte sede de CUP, moviment politic che al met adun la aree libertarie
e radicâl dal indipendentisim catalan: une azion impedide di un vêr
mûr uman formât di centenârs di citadins. Lis protestis par chescj
colps di man a àn puartât in place miârs di catalans che a àn
inviât mobilitazions continuadis massime denant di sîts simbolics,
tant che il comissariât là che a jerin stâts puartâts i arestâts.
Protestis e mobilitazions si son davueltis però ancje in altris
parts dai Paîs Catalans, intal Paîs Basc e fintremai in Castilie,
cence considerâ lis condanis e i invîts rivâts al guvier di Madrid
de bande di europarlamentârs, guviers regjonâi e aministradôrs
locâi di dute Europe par che al meti fin ae repression. Invîts
colâts par cumò tal vueit viodût che, se ai 22 di Setembar ancje i
ultins arestâts a son stâts metûts in libertât provisorie (cu lis
acusis di disubidience, abûs e malversazion), la procure gjenerâl
di stât e à denunciât par sedizion i dirigjents des dôs
organizazions di riferiment dal indipendentisim catalan (ANC e Òmnium
Cultural). Ai 23 di Setembar invezit,
simpri su sburt des autoritâts di Madrid, la procure superiôr de
Catalogne e à ordenât ae polizie catalane (Mossos
d’Esquadra) di metisi sot dal comant
dal ministeri pal interni spagnûl, coordenât dal colonel de Guardia
Civil Diego Pérez de los Cobos. Une
azion che, al à dite il responsabil pal interni catalan Joaquim
Forn, no sarà acetade ni dal guvier catalan e nancje dai comants dai
Mossos.
Font:
VilaWeb, 18-23/09/17;
El Punt Avui, 18-23/09/17;
Naiz:, 18-23/09/17
Nessun commento:
Posta un commento