Cu
lis elezions anticipadis clamadis dongje ai 8 di Jugn, la prime
ministre britaniche Theresa May e veve chê di infuartî la sô
posizion cuntune maiorance ancjemò plui largje tal Parlament di
Westminster. La sô prevision si à però mostrade dal dut falade,
dal moment che i citadins dal Ream Unît i àn assegnât une
maiorance di 318 deputâts, 13 in mancul di chei che e veve e 8 in
mancul di chei che a coventin pe maiorance assolude in Parlament. I
Conservadôrs, cul 42,4% dai consens, a restin duncje il prin partît
dal Ream Unît, ma a sintin sul cuel il flât dai Laburiscj che, cul
40% dai vôts e 262 parlamentârs (30 in plui di chei che a vevin), a
àn vût un recupar di là des previsions. Tra i partîts a dimension
statâl i unics altris rapresentâts inte Assemblee a son i Liberâi
Democratics cun 12 deputâts e i Verts cuntun sôl rapresentant.
Par
guviernâ i Conservadôrs a contin duncje sui 10 parlamentârs dal
Democratic Unionist Party
(2 in plui di chei che al veve): une aleance che e ven però judicade
une vore pericolose no dome pe tignude dal procès di pâs in Irlande
dal Nord, viodût il pês contratuâl che i unioniscj si cjataressin
a vê, ma ancje de ale plui liberâl dai Tories,
in primis chei scozês. Propit par chel che al rivuarde la Irlande
dal Nord, chestis elezions a àn
lassât cence rapresentance parlamentâr ducj i partîts fale il DUP
sul front unionist e il Sinn Féin
su chel nazionalist: i republicans irlandês a àn otignût il lôr
risultât miôr di simpri tes elezions politichis britanichis cun 7
elets, 3 in plui di chei che a vevin. In Scozie
invezit il Partît Nazionâl Scozês (SNP) al reste il plui votât,
ma al passe di 59 a 31 deputâts: cundut che ducj a savevin che al
sarès stât impussibil rivâ a confermâ il sucès straordenari de
volte stade, la pierdite e je stade pesante e i da un colp une vore
dûr aes sperancis di podê imbastî un secont referendum su la
indipendence. In Gales
risultât positîf dai nazionalitaris dal Plaid
Cymru che a àn cressût la lôr
rapresentance a Londre di 3 a 4 parlamentârs.
Font:
BBC,
09-12/06/17;
The Guardian, 09-12/06/17
Nessun commento:
Posta un commento