23/06/17

France: nazionalitaris cors in evidence tes politichis

Se lis presidenziâls dai 7 di Mai a vevin puartât ae elezion di Emmanuel Macron, lis politichis dai 11 e dai 18 di Jugn i àn garantît une maiorance clare te Assemblee francese. Chestis elezions a son stadis segnadis massime di doi elements: il nivel di astensionisim une vore alt e la maiorance assolude otignude di Republique En Marche, il moviment che si à metût adun in cuatri e cuatri vot ator di Macron, che in plui dai siei 308 deputâts al pues contâ sui 42 elets dal MoDem.
Par chel che al inten lis comunitâts minorizadis dal stât francês, cundut che il dopli turni in circoscrizions uninominâls al rapresente un pidiment pardabon dificil di superâ, lis elezions a àn dât risultâts pardabon interessants. Il plui impuartant al è chel otignût in Corsiche là che i candidâts di Pé a Corsica a àn vinçût in trê des cuatri circoscrizions de isule, intant che te cuarte a àn mancjât il passaç al secont turni juste par cutuardis vôts. Cussì, pe prime volte, la Assemblee francese i darà acet a trê deputâts nazionalitaris cors, o sei Jean Félix Acquaviva (elet cul 63,05% dai vôts), Michel Castellani (60,81%) e Paul André Colombani (55,22%). Un candidât nazionalitari al à rivât a passâ al secont turni ancje intune des circoscrizions eletorâls de Alsazie, si trate dl Gérard Simler di Unser Land, che però al secont turni si à fermât al 45,86% dai vôts. In Bretagne, invezit, Christian Troadec di Oui la Bretagne nol à rivât a passâ al secont turni par un pêl e cul so 13,88% di vôts al à otignût il risultât miôr tra i nazionalitaris bretons. Un altri candidât breton leât ae Federazion des regjons e dai popui solidaris che si presentave però sot de etichete «divers gauche» – Jean-Luc Bleunven – al à passât il prin turni ma no je à fate tal secont. Intal Paîs Basc francês la presince di circoscrizions che no tegnin cont des comunitâts minorizadis e à penalizât i candidâts nazionalitaris. Chel istès la liste Euskal Herria Bai e je cressude par vôts e par percentuâls, plaçantsi al tierç puest inte aree basche cuntune medie dal 10,42% di consens.
Font: France Bleu, 12-19/06/17; Le Monde, 12-19/06/17; Naiz:, 12/06/17

Nessun commento: