Irlande: a cressin i fonts par Foras na Gaeilge

Il guvier irlandês al à decidût di incressi di un milion di euros i fonts pe agjenzie pe lenghe gaeliche irlandese Foras na Gaeilge. La gnove e je stade cjapade cun sodisfazion di Conradh na Gaeilge, organizazion in prime linie te bataie pai dirits linguistics. Cun di fat, a spieghin, cheste decision e mostre che il guvier al à tacât a invertî i tais aes politichis linguistichis metûts in at intai ultins agns. La organizazion e invide però l’esecutîf a no fermâsi alì e a finanziâ il plan di invistiment proponût di uns otante realtâts associativis impegnadis pal gaelic che, in plui di aumentâ lis pussibilitâts di ûs sociâl de lenghe, al crearès passe un miâr di puescj di vore.

Font: CnaG, 15/12/16

Paîs Catalans: il procès sovranist catalan no si ferme

Il tribunâl costituzionâl spagnûl al à decidude la sospension cautelâr di dôs risoluzions fatis buinis in Otubar dal Parlament catalan che a metevin lis fondis par celebrâ un referendum su la indipendence tal 2017. L’orghin judiziari al à ancje difidât la presidence dal Parlament e l’esecutîf catalan dal meti in vore cualsisei at che nol tegni cont de sospension.

Macedonie: albanês decisîfs pal gnûf guvier

Dopo des elezions politichis dai 11 di Dicembar in Macedonie, la formazion dal gnûf guvier e je tes mans dai partîts de minorance albanese. La diestre nazionaliste vuidade di Nikola Gruevski (VMRO DPMNE) e reste ancjemò il partît di maiorance relative cun 51 elets, intant che i Sociâi Democratics (SDSM) a ‘nd àn 49. Par controlâ il Parlament a coventin però almancul 61 deputâts e duncje a deventin decisîfs i parlamentârs dai diviers partîts espression de minorance albanese: la Union Democratiche pe Integrazion (DUI) che e à pierdût une vore di consens, ma e à rivât a otignî 10 elets; BESA cun 5 deputâts; la Aleance pai Albanês cun 3; e il Partît Democratic dai Albanês cun 2. Tai ultins vot agns la Macedonie e je stade guviernade de diestre nazionaliste cu la poie de DUI, ma nol è par nuie scontât che cheste aleance e torni a proponisi. Cun di fat, buine part de comunitât albanese e calcole Gruevski di responsabil dai atacs cuintri de minorance, par chest la Union e à pierdût cetancj vôts e se e ves di continuâ a poiâ un guvier vuidât di Gruevski e riscje di pierdint inmò di plui. Par formâ un guvier, invezit, ai Sociâi Democratics no ur baste une aleance dome cu la Union o cui trê partîts albanês plui piçui. Dificil però che un dai trê al sedi disponibil a stâ intal stes guvier cu la Union, acusade di vê permetût a Gruevski di meti sot atac la comunitât albanese. Se dentri dai 16 di Fevrâr no si rivarà a saltâ fûr di chest pantan, al coventarà meti sù un guvier tecnic che al compagni la Macedonie a gnovis elezions.

Font: Balkan Insight, 14-15/12/16

Europe: gnove risoluzion dal Parlament sui dirits di fonde

Ai 13 di Dicembar il Parlament european al à fate buine une risoluzion sui dirits di fonde te Union Europeane cun 456 vôts a pro, 138 cuintri e 104 astignûts. Il test al fronte temis tant che i dirits des minorancis, chei dai fruts e lis politichis tal cjamp des migrazions condanant il cressi dal nivel di asse cuintri dai migrants saborât di partîts politics, mieçs di comunicazion e fintremai istituzions. Par chel che al rivuarde lis comunitâts minorizadis, la risoluzion e cjape dentri une sezion di pueste formade di nûf ponts, là che si invide a fissâ dai standards minims di tutele in ducj i stâts de Union, a infuartî lis azions par promovi l’ûs e l’insegnament des lenghis minorizadis, a scambiâsi lis buinis pratichis in vore su chescj temis, a sburtâ la avualiance des lenghis in ducj i cjamps e a eliminâ i pidiments che in dì di vuê no lu permetin, a fâ in maniere che ducj i siei membris a ratifichin la Cjarte des lenghis regjonâls o minoritariis e la Convenzion cuadri pe protezion des minorancis nazionâls. Il document al ricuarde ancje che lis politichis di riorganizazion aministrative inviadis in diviers stâts no àn di vê efiets negatîfs su lis comunitâts di minorance.

Font: Parlament European, 13/12/16

Turchie: centenârs di arescj tra i curdis dal HDP

In Turchie e va dilunc a cressi la spirâl di violence e di repression che e viôt protagonistis lis autoritâts turchis e la comunitât curde. Intal mês di Novembar a jerin stâts arestâts Selahattin Demirtaş, Figen Yüksekdağ (copresidents) e altris vot parlamentârs dal Partît Democratic dal Popul (HDP), la formazion politiche di riferiment de comunitât curde che tal stât turc e conte passe 22 milions di personis. A jerin dome i ultins di une lungje rie di politics, aministradôrs locâi, insegnants, gjornaliscj e militants curdis impresonâts, intant che l’esercit e lis fuarcis di polizie turchis a strenzevin te smuarse de repression paîs e citâts dal Kurdistan lassantsi daûr disinis di muarts. Tes regjons a maiorance curde a scuintrâsi cun militârs e polizais a son massime i militants dal PKK (Partît dai Lavoradôrs dal Kurdistan), a colpî cun atentâts intes citâts turchis invezit a son i oms dal TAK (Falcons de Libertât dal Kurdistan), nassût de separazion de ale plui radicâl dal PKK. E sarès propite cheste ultime formazion la responsabile di trê atacs puartâts a cjaval tra i 11 e i 17 di Dicembar e che in dut a àn causât passe cuarante muarts, pe plui part soldâts e polizais. Come ritorsion, ai 12 di Dicembar, lis autoritâts turchis a àn arestât dôs parlamentârs e passe 230 militants dal HDP, intant che altris azions repressivis a son stadis siguradis pes zornadis seguitivis.

Font: Ekurd Daily, 13/12/16

Paîs Basc: si propon une comission unitarie pal euskara

La coalizion nazionalitarie Euskal Herria Bildu e propon la nassite di un comission unitarie pal svilup di politichis in stât di favorî la normalizazion de lenghe basche di là dai confins aministratîfs che in dì di vuê a dividin il Paîs Basc. Ta cheste comission a varessin di jessi dentri rapresentants de Comunitât Autonome Basche e des sôs trê provinciis, de Navare, de federazion provinciâl dal Paîs Basc francês, des diviersis associazions dai comuns bascs e des capitâls provinciâls. La propueste e sarà cumò presentade pe discussion e pe aprovazion intai Parlaments de Comunitât Autonome Basche e de Navare, e tai comuns principâi dal paîs.

Font: Diario de Navarra, 13/12/16

Ongjarie: fonts pes scuelis de infanzie magjaris in Romanie

Il guvier de Ongjarie al à metût a belanç 4 milions e 800 mil euros par sostignî lis scuelis de infanzie de minorance di lenghe ongjarese che e vîf in Transilvanie. La gnove e je stade comunicade dal segretari di stât magjâr Árpád Potápi a Sepsiszentgyörgy / Sfantu Gheorghe te suaze de fieste pai 25 agns de Associazion dai insegnants ongjarês de Romanie (RMPSZ). Ancje in gracie dal impegn di cheste associazion in dì di vuê la lenghe ongjarese e je insegnade in 1.400 istitûts scolastics de Romanie là che a lavorin 10 mil insegnants magjârs.

Font: Politics.hu, 12/12/16

Crimee: Russie acusade di crimins politics sui tatars

E cres la preocupazion framieç des associazions pai dirits umans pe repression metude in vore des autoritâts russis cuintri dai militants tatars de Crimee. Dopo che la regjon e je stade separade de Ucraine par jessi glotude de Federazion Russe, chê tatare no je stade la uniche minorance tibiade, ma – a disin i rapresentants di Amnesty International – si cjate a jessi chê cul nivel plui alt di repression par vie che e je la plui compate tal manifestâ la sô oposizion al guvier rus. Cheste comunitât, che e rapresente il 13% de popolazion de penisule, e à podût tornâ in Crimee dome tal 1989 dopo che par ordin di Stalin e jere stade depuartade in Asie centrâl ae fin de seconde vuere mondiâl. La repression però si è tornade a fâ sintî cun fuarce ancje dopo de anession: buine part dai rapresentants principâi de comunitât si cjatin in esili in Ucraine, altris a son sot procès o fintremai sot osservazion psichiatriche, e si àn ancje segnalazions di militants fermâts de polizie e po disparîts. Cun di plui, i mieçs di comunicazion indipendents a son stâts sierâts, propit a partî de television tatare ATR.

Font: The Guardian, 12/12/16

Romanie: il PSD al vinç lis politichis, ben i ongjarês de UDMR

Lis elezions politichis in Romanie si son sieradis cu la vitorie dai Sociâi Democratics (PSD) che a àn otignût il 45,9% dai vôts, intant che il Partît Nazionâl Liberâl (PNL) al è colât jù al 20%. Rispiet aes previsions de vilie, la sorprese principâl e rive de Union par Salvâ la Romanie (USR), nassude sì e no sîs mês prime des elezions, che e à cjapât il 9% dai consens. Cuart par numar di vôts al è il partît di riferiment de minorance ongjarese, o sei la Union Democratiche dai Magjârs de Romanie (UDMR), cul 6,2%. Parsore dal soiâr par jentrâ tal Parlament a son ancje la Aleance dai Liberâi e Democratics (ALDE) cul 5,5% e il Moviment Popolâr dal ex president Traian Basescu cul 5,2%. Gjavâts i ongjarês, chês altris formazions politichis espression di minorancis no àn invezit rivât a passâ il soiâr eletorâl. Il prossim guvier al varès di nassi de coalizion formade di PSD e ALDE, ancje se a son inmò dai dubis sul non dal prin ministri incjariât di formâ l’esecutîf.

Font: Balkan Insight, 11-12/12/16

Corsiche: il setemanâl Arritti al finìs 50 agns

Ai 10 di Dicembar il setemanâl Arritti al à celebrât, cu la partecipazion des diviersis animis dal nazionalisim cors, il so mieç secul di vite. Il gjornâl al à compagnât il moviment nazionâl sei tai siei moments dramatics, tant che i fats di Aleria cuant che al à ancje riscjât di jessi sierât des autoritâts francesis, sei tai moments di sucès, come chei che lu viodin cumò ae vuide dal esecutîf e de Assemblee de Corsiche. Arritti al à vivût in prime persone lis divisions internis al nazionalisim cors, ancje chel armât, e il scuintri cul stât centrâl, al pont che intal 1977 la sô stamparie e jere stade fate saltâ cul esplosîf. In dì di vuê al jes ogni setemane cun 2 mil copiis e al à tant che diretôr François Alfonsi, membri dal Partît de Nazion Corse, za deputât european e president de Aleance Libare Europeane.

Font: France 3 Corse ViaStella, 11/12/16

Irlande: e cres la popolaritât des scuelis gaelichis

Daûr dai dâts presentâts intal rapuart anuâl su la educazion inte Republiche di Irlande, al ven fûr che la valutazion su la cualitât des scuelis secondariis gaelichis e va dilunc a cressi. Cundut che tra i 735 istitûts secondaris ricognossûts dal ministeri pe educazion dome 48 a àn il gaelic irlandês come lenghe curicolâr, al è propit un di chescj (Coláiste na Coiribe di Gaillimh / Galway) a ocupâ il prin puest inte classifiche gjenerâl su la cualitât des scuelis, intant che altris doi istitûts gaelics si cjatin tra lis primis dîs posizions. Se si cjale invezit dome aes scuelis publichis, tra i prins dîs a ‘nd è cuatri là che l’insegnament al è dut par gaelic. In plui des valutazions positivis a cressi a son ancje i students: tal an scolastic 2015/2016 a jerin 23.768 e chest an a son 900 in plui. Lis secondariis cul gaelic curicolâr a son il 6,5% dal totâl, lis primariis a son il 8%.

Font: Irish Times, 06/12/16

Paîs Basc: gnûfs servizis digjitâi par euskara

Cui 3 di Dicembar, in ocasion de Zornade internazionâl dal euskara, la fondazion PuntuEus e à metût a disposizion doi gnûfs imprescj informatics in lenghe basche svilupâts cun codiç viert e disponibil par ducj. Di une bande si à “labur.eus” che al permet di scurtâ e di personalizâ lis direzions dai sîts internet, di chê altre si à la version par euskara dal servizi “whois” che al permet di vê informazions sui dominis e di capî se a son disponibii o pûr no. Intal zîr di doi agns la fondazion PuntuEus e à permetût il svilup di une comunitât di passe 6 mil sîts internet caraterizâts di une fuarte identitât nazionâl e linguistiche basche e dal ûs dal domini .eus.

Font: EiTB, 02/12/16

Paîs Basc: prins pas di PNV e PSE pe propueste di autoguvier

Dopo dal pat che ju puartarà a guviernâ adun inte gnove legjislature che si è a pene inviade, il Partît Nazionalist Basc (PNV) e i socialiscj (PSE-EE) a àn presentât une propueste par meti adun un test che al fasi di fonde pe riforme dal Statût de Comunitât Autonome Basche. Si intint duncje di meti jù i principis e lis fondis concretis par incressi par mieç di une riforme statutarie il nivel di autoguvier de Comunitât cence però lâ fûr de suaze legjislative dal stât spagnûl. Sul plan operatîf si fevele di un an par tirâ dongje lis propuestis di riforme fatis indenant di dutis lis fuarcis rapresentadis intal Parlament basc, di altris vot mês par cirî di meti jù une uniche propueste di sintesi che e tacarà po il so percors parlamentâr che si stime che al podarès rivâ insom tal 2020, juste sul finî de legjislature.

Font: Naiz:, 29/11/16

Ocitanie: campagne par rivendicâ la integritât teritoriâl

La organizazion Iniciativa per Occitània e à inviât une campagne par rivendicâ la ocitanitât di ducj i dipartiments e di dutis lis regjons storichis de nazion cence stât plui grande de Europe. Un tant al nas dopo che intal stât francês si à metût sù une gnove regjon aministrative batiade Ocitanie, ma che e cjape dentri dome un toc di cheste comunitât. A son stadis cussì prontadis diviersis targhis – di doprâ in primis su lis rêts di comunicazion sociâl – dulà che il non dal teritori al è peât ae sô partignince storiche, par esempli “ancje achì in Alvernie e je Ocitanie” o “ancje achì te contee di Nize e je Ocitanie”. Ogni scrite, proponude te varietât locâl di ocitan, e je compagnade de steme storiche di chel teritori e de traduzion dal sproc ancje par francês.

Font: Jornalet, 28/11/16

Ucraine: dirits linguistics des minorancis sot atac

Intun incuintri che si è tignût ai 24 di Novembar alì dal Parlament european, une delegazion formade di rapresentants de FUEN (Union Federâl des Nazionalitâts Europeanis) e de Union Culturâl dai Ongjarês de Transcarpazie (KMKSZ) e à denunciât i tentatîfs in at in Ucraine par limitâ i dirits des comunitâts minorizadis. Par esempli e je in discussion une mende ae leç su la educazion che e limite il dirit dai membris di une comunitât minorizade ricognossude a vê une istruzion te lôr lenghe proprie cul permeti l’insegnament te lôr lenghe dome tes areis là che la presince di cheste comunitât e je plui fuarte e dome te scuele de infanzie e tes superiôrs. Cun di plui si vûl limitâ chest dirit dome a chês lenghis che a son uficiâls dentri de Union Europeane. Une altre iniziative, cheste volte judiziarie, e ponte invezit a gjavâ il dirit di doprâ la lenghe proprie cu lis aministrazions publichis ancje tes areis là che la comunitât minorizade e rapresente almancul il 10% de popolazion totâl. Si trate, a disin i delegâts de FUEN e de minorance ongjarese, di une situazion une vore pericolose par vie che e je daûr a stiçâ gnovis tensions etnichis intun stât che za si cjate a vivi la pierdite de Crimee e il conflit intes regjons sudorientâls russofonis.

Font: FUEN, 25/11/16

Paîs Catalans: personalitâts in cjamp pe dopleadure par catalan

Passe setante rapresentants di prin plan dal setôr culturâl a àn za aderît al manifest dât fûr de associazion dai atôrs e dai diretôrs professionâi de Catalogne là che si domande ae politiche di meti fin par mieç di une azion legjislative al disecuilibri grandon che la lenghe catalane si cjate ancjemò a patî tun cjamp di consum massîf come chel des produzions audiovisivis. E je la rispueste a ciertis vôs che a sburtin par limitâ lis dopleaduris par catalan che, invezit, a àn une funzion centrâl pe tignude e pe promozion de lenghe in Catalogne.

Font: El Periodico, 22/11/16

Bulgarie: lenghis minorizadis bandidis des elezions

La FUEN (Union Federâl des Nazionalitâts Europeanis), organizazion di riferiment par cetantis realtâts che a partegnin a comunitâts minorizadis, e je intervignude par domandâ al guvier de Bulgarie di mendâ la leç che e proibìs l’ûs des lenghis minorizadis intant de campagne eletorâl. Il bant di dutis lis lenghis che no sedin il bulgar no dome al va cuintri dai acuardis internazionâi sui dirits umans che la Bulgarie si è impegnade a rispietâ, ma nol ufrìs nancje chê garanzie di avualiance previodude de Costituzion statâl. Il teme al è stât puartât ancje ae atenzion dal Parlament european par che al intervegni cuintri di cheste discriminazion.

Font: FUEN, 21/11/16

Ocitanie: proteste par rivendicâ l’ocitan al MUCEM

Ai 17 di Dicembar i militants ocitans a àn programât une azion di proteste denant dal MUCEM, il Museu des civilizazions de Europe e dal Mediterani di Marsilie. Al centri de proteste si varà un strisson cul articul 14 de Declarazion universâl dai dirits dal om voltât par ocitan. Cun di fat si vûl protestâ pal fat che intal museu il test di chest articul si pues leilu in siet lenghis (francês, inglês, todesc, talian, spagnûl, grêc e arap), ma no te lenghe storiche dal lûc, o sei l’ocitan. L’istitût al volarès jessi un sît di cognossince e di ricercje sui rapuarts tra lis diviersis civiltâts che a àn segnât la aree mediteranie, ma lu fâs cuntune logjiche di stamp statâl che no ten cont des nazionalitâts e des lenghis di cheste aree che no àn un stât daûr.

Font: Jornalet, 21/11/16

Galizie: za 250 milions di peraulis voltadis cun Gaio

Dal Setembar dal 2015 – o sei di cuant che la agjenzie pe modernizazion tecnologjiche e la segretarie gjenerâl di politiche linguistiche de comunitât galiziane lu àn metût a disposizion dal public - a son passe 250 milions lis peraulis voltadis cun Gaio, il servizi di traduzion automatiche di tescj par e dal galizian. Il tradutôr – che in plui dal spagnûl si rapuarte ancje cun portughês, inglês, francês e catalan – al pues jessi personalizât cun 16 mil lemis dividûts in repertoris specialistics e di toponomastiche. Cul mês di Jugn al è acessibil ancje par mieç di une aplicazion par sistemis Android e iOS.

Font: Lingua.gal, 20/11/16

Paîs Basc: gnove entitât pal euskara in Ipar Euskal Herria

Lis organizazions Euskaltzaindia e Euskal Konfederazioa si son dadis dongje par meti in pîts Euskal Elkargoa, une gnove istituzion che cul mês di Zenâr e deventarà il pont di riferiment pe politiche linguistiche in Ipar Euskal Herria, o sei il Paîs Basc setentrionâl cjapât dentri intal stât francês. Intal 2006 si veve tacât a imbastî une politiche linguistiche istituzionalizade par mieç dal Ufici public pe lenghe basche (Euskararen Erakunde Publikoa) e di gnovis misuris legjislativis, ma si à viodût che al covente fat di plui. Dal 1996 al 2011, di fat, i citadins bilengâi a son passâts dal 26,4% al 21,4% e dome un 7% de popolazion al à il basc tant che prime lenghe. Tra lis iniziativis che si vûl puartâ indenant si à in primis il ricognossiment de uficialitât de lenghe come in Corsiche e la creazion di une vôs di belanç specifiche pe politiche linguistiche.

Font: Noticias de Gipuzkoa, 20/11/16

Paîs Basc: campagne par miorâ la imagjin dal euskara in Navare

Tra la fin di Novembar e i prins di Dicembar il guvier de Navare al à svilupât une campagne comunicative par miorâ la imagjin e la considerazion sociâl de lenghe basche, massime framieç di chê part de popolazion che no le cognòs. La iniziative si poie sul slogan «cence dal basc, la Navare no si capìs» compagnât di nons o di peraulis par euskara doprâts ogni dì ancje di cui che nol fevele cheste lenghe. La campagne, finanziade cun 70 mil euros, e cjape dentri cuotidians e periodics locâi, messaçs radiofonics e spazis publicitaris sui traspuarts publics de Navare. Cun di plui, la iniziative e compagne i apontaments in program pai 3 di Dicembar, Zornade internazionâl dal euskara che pe prime volte e ven celebrade in maniere uficiâl ancje dal guvier navarês.

Font: 20 minutos, 18/11/16

Europe: ai 17 di Dicembar si presente il Protocol di Donostia

Si tignarà ai 17 di Dicembar a Donostia, intal Paîs Basc, la presentazion uficiâl dal Protocol par garantî i dirits linguistics. La iniziative e veve tacât a movi i siei prins pas ancjemò tal Març dal 2015 e e à permetût di meti jù une serie di azions concretis par dâi sostance ai principis fissâts de Declarazion universâl dai dirits linguistics di Barcelone. Il document finâl al propon 180 misuris che a varessin di jessi metudis in vore par garantî il rispiet plen dai dirits linguistics. Dopo che il comitât sientific dal Protocol di Donostia al veve stazât lis propuestis rivadis vie pe Vierte e pal Astât di dute Europe e dopo dal vie libare dal comitât organizadôr, intal mês di Novembar il document al è stât sotscrit di disinis e disinis di realtâts sociâls espression des comunitâts minorizadis. La iniziative, a àn spiegât i rapresentants dal coordenament basc Kontseilua e dal program Donostia Capitâl Europeane de Culture 2016, e à ancje permetût di infuartî la rêt dai rapuarts tra lis organizazions impegnadis pai dirits linguistics.

Font: Protokoloa.eus, 11/16

Paîs Catalans: a cressin i utents dal web par catalan

Daûr dal rapuart su la politiche linguistiche intal 2015 presentât ai 16 di Novembar, il 54,5% de popolazion de Catalogne che e à consultât Internet lu à fat visitant pagjinis par catalan, un dât in cressite di siet ponts rispiet al an prime. Tra i sîts plui frecuentâts, ducj cun versions ancje par catalan, o vin chei des grandis aziendis dal setôr informatic, dai mieçs di comunicazion e di programs par mandâsi messaçs. In aument al è ancje il consum par catalan di spetacui (cuasi il 60%) e di libris (26,5%). Si son sbassâts invezit i catalans che a lein cuotidians su cjarte (57,1% in câl di doi ponts) o che a cjalin programs televisîfs (51,8% in câl di cuasi doi ponts e mieç) te lôr lenghe proprie. Il mieç di comunicazion par catalan cun plui sucès al reste però chel radiofonic, cul 61,4%. Dut chest a front di une popolazion che pal 94,3% e capìs il catalan e pal 80,4% e je in stât di fevelâlu.

Font: El País, 16/11/16

Scozie: inchieste sul impat dai media par gaelic

Il Bòrd na Gàidhlig, organisim di riferiment pe lenghe gaeliche de Scozie, e MG Alba a àn inviât une inchieste che si propon di indagâ la influence dai mieçs di comunicazion par gaelic sul aprendiment de lenghe. Par chest si à svilupât trê schedis di ricercje diviersis: une par chei che la lenghe le doprin in maniere regolâr, une par chei che a son daûr a imparâle e une par chei che invezit a son interessâts a imparâle plui indenant. E je la prime volte che si puarte indenant une inchieste di cheste fate. Cognossi la funzion davuelte dai media intal svilup des competencis linguistichis par gaelic, di cuant che si è fruts insù, al coventarà par planificâ miôr lis azions di politiche linguistiche ta chest cjamp.

Font: BBC, 14/11/16

Paîs Basc: gnove App par sburtâ l’ûs juridic dal euskara

Il guvier de Comunitât Autonome Basche al à svilupât une gnove aplicazion pe telefonie celulâr indreçade massime ai professioniscj di lenghe basche che a lavorin tant che avocats, magjistrâts o nodârs cun chê di sburtâ l’ûs dal euskara intal cjamp de justizie. La App “Auzia Euskaraz” e ufrìs la plui grande base di dâts juridiche in lenghe basche, cun passe 400 mil traduzions disponibilis, ma ancje formularis juridics bilengâi, une liste dai professioniscj dal setôr che a doprin l’euskara e la pussibilitât di vê consulencis personalizadis. La aplicazion, buine pai sistemis Android e iOS, si pues discjariâle sore nuie.

Font: La Vanguardia, 14/11/16

Paîs Catalans: in cressi i fonts pal catalan tes Baleârs

Il ministri pe culture, pal patrimoni e pal sport dal guvier des Baleârs, Francesc Miralles, al à fat savê che intal 2017 il so dipartiment al varà a disposizion 26,3 milions di euros, o sei un 0,5% in plui dai bêçs che a jerin in belanç par chest an. Ta chestis risorsis si cjatin ancje i 2,4 milions che a compagnaran il plan strategjic pal finanziament de culture e pe promozion de lenghe catalane. Rispiet al 2016, i fonts par cheste vôs a son stâts cressûts dal 14%.

Font: La Vanguardia, 14/11/16

Irlande: istituzions, pas indaûr pal gaelic intal Nord

Il dipartiment pe educazion de Irlande dal Nord, vuidât cumò dal ministri Peter Weir dal DUP (Partît Unionist Democratic), al à comunicât che di cumò indenant al doprarà dome le lenghe inglese. Fintremai che ae sô vuide si vevin rapresentants dal Sinn Féin, il partît republican irlandês, la intestazion, lis comunicazions cul public e lis publicazions dal dipartiment a jerin ancje par gaelic irlandês e pe varietât di scots fevelade ta cheste part de isule. Cheste inversion radicâl des politichis linguistichis ministeriâls si compagne ancje al dinei di vierzi gnovis scuelis pe infanzie cul gaelic veicolâr intes citâts di Doire / Derry e Iúr Cinn Tráchta / Newry. Chestis decisions a àn tornât a alçâ la tension cu lis comunitâts nazionalistis e republicanis dal Nord, ma ancje cun chei membris de comunitât unioniste che a fevelin gaelic. Il ministri Weir al à dineât di puartâ indenant politichis anti irlandesis e al à specificât che i citadins a podaran lâ indenant a scrivi al dipartiment par gaelic o par scots, ma che lis rispuestis a saran dome par inglês.

Font: Irish News, 11/11/16

Paîs Basc: scuintri judiziari in Navare sui puescj par bascofons

Il guvier de Navare al à fat savê che al impugnarà la sentence dal tribunâl superiôr di justizie in vore ta cheste comunitât autonome che e anule i puescj metûts a disposizion dai professôrs di lenghe basche tal ultin bant par personâl public. Si fevele di sù par jù cent puescj che a coventavin par infuartî la presince dal euskara dentri dal sisteme scolastic de Navare. Pes autoritâts politichis de comunitât autonome la sentence no dome e va a tratâ in maniere prejudiziâl une des dôs lenghis uficiâls de Navare, ma e va fintremai cuintri di altris ats dâts fûr dal stes tribunâl.

Font: Naiz:, 11/11/16

Paîs Catalans: relazions internis plui fuartis a pro de lenghe

I diretôrs gjenerâi pe politiche linguistiche dal guvier de Catalogne, Ester Franquesa, dal esecutîf valenzian, Rubén Trenzano, e di chel des Baleârs, Marta Fuxà, si son cjatâts ai 9 di Novembar par condividi lis strategjiis par sburtâ l’ûs dal catalan. Prin di dut si à concuardât di lavorâ adun par garantî la coerence, la trasparence e la massime informazion sui sistemis di certificazion linguistiche des trê comunitâts. E je po la volontât di rivâ a di une version uniche des traduzions des leçs dal stât, de normative europeane e di altris tescj legâi e aministratîfs comuns, e di unî lis risorsis finanziariis impleadis par chest fin. Si lavorarà adun ancje par condividi lis pratichis miôr par promovi il catalan intai diviers setôrs de societât e par fâi cuintri aes azions dal stât centrâl che a puartin prejudizi ae lenghe comune. Intant de riunion la rapresentante dal guvier valenzian e à comunicât la adesion di cheste comunitât al protocol di colaborazion za in vore tra Galizie, Comunitât Autonome Basche, Catalogne e Baleârs. Doi dîs plui tart la diretore gjenerâl pe politiche linguistiche de Catalogne si è cjatade ancje cul vicesindic dal Alguer, Antonello Usai, cun chê di infuartî lis relazions cu la citât sarde di lenghe catalane e di svilupâ gnovis formis di colaborazion par sburtâ l’ûs de lenghe proprie.

Font: Generalitat de Catalunya, 09 e 11/11/16

Galizie: A Mesa e sburte i partîts a impegnâsi pe lenghe

La organizazion A Mesa pola Normalización Lingüistica e à invidât dutis lis fuarcis politichis rapresentadis intal Parlament de Galizie, rignuvît cul vôt dai 25 di Setembar, a impegnâsi intai prossims cuatri agns de legjislature par eliminâ i pidiments che a impedissin la normalizazion dal galizian e a rispietâ i impegns che si vevin cjapâts ancjemò tal Astât dal 2015 cu la firme de “Declarazion di unitât a pro de lenghe galiziane”. Par lâ indenant par chê strade, A Mesa e à ricuardât che za intant de campagne eletorâl ducj i partîts a vevin ricevût il document che al proponeve sîs azions urgjentis di meti in vore tai cjamps de educazion e des ativitâts pai fruts, de aministrazion publiche, dai finanziaments, de radiotelevision publiche e dai traspuarts.

Font: Galicia Confidencial, 10/11/16

Cossovo: fiscâts a Klokot i segnâi stradâi bilengâi

La segnaletiche stradâl bilengâl, par albanês e par serp, che e jere stade metude fûr intal comun di Klokot / Kllokot, in Cossovo, e je stade tirade jù di citadins che a partegnin ae maiorance di lenghe albanese che e vîf ta chel comun. I autôrs di cheste azion a àn ancje fat savê al sindic, che al parten ae comunitât serbe, che se la aministrazion e ves di tornâ a metiju fûr a tornaressin a tirâju jù. Un tant par vie che no si ricognossin tai nons dâts aes stradis e parcè che a lamentin di no jessi stâts sintûts cuant che si jere daûr a decidi su la toponomastiche stradâl. Il vicesindic dal comun, ancje lui membri de maiorance albanese, al à invezit sclarît che a jerin stâts inmaneâts diviers incuintris publics su la gnove segnaletiche ma che chei che cumò si lamentin no si vevin fats viodi.

Font: Balkan Insight, 08/11/16

Turchie: arestâts 11 deputâts dal HDP, media curdis sierâts

Vie pe gnot tra i 3 e i 4 di Novembar la polizie turche e à impresonât Selahattin Demirtaş e Figen Yüksekdağ, i doi copresidents dal Partît Democratic dal Popul (HDP), la formazion politiche di riferiment de comunitât curde che tal stât turc e conte passe 22 milions di personis. La operazion, che e à tocjât diviersis citâts dal Kurdistan turc e i uficis dal partît a Ankara, e à puartât a arestâ une disine di parlamentârs dal HDP, il tierç partît par numar di deputâts dentri dal Parlament turc e la fuarce principâl di oposizion al regjim dal president turc Recep Tayyip Erdoğan. La azion di polizie e je stade compagnade dal bloc cuasi totâl des rêts di comunicazion sociâl plui impuartantis tant che Twitter, Facebook e YouTube.

Paîs Catalans: bants par sburtâ l’ûs dal catalan tes Baleârs

Il guvier des isulis Baleârs al à publicât un bant par promovi e par slargjâ l’ûs sociâl de lenghe catalane che al à une disponibilitât di 200 mil euros. Il proviodiment si indrece aes realtâts associativis e ai ents cence finalitâts di vuadagn ma ancje aes aministrazions locâls cun mancul di 20 mil abitants. Il bant al permet di finanziâ azions di integrazion linguistiche o di formazion specialistiche, campagnis di sensibilizazion, produzion di materiâi par catalan e ûs de lenghe in ativitâts ricreativis.

Font: La Vanguardia, 02/11/16

Corsiche: scuele par cors, convenzion Stât – CTC

Ai 2 di Novembar il president dal esecutîf de Comunitât Teritoriâl Corse, Gilles Simeoni, il delegât pe lenghe, Xavier Luciani, il prefet de isule, Bernard Schmeltz, e il retôr de Academie de Corsiche, Philippe Lacombe, a àn firmâ la convenzion jenfri stât e comunitât teritoriâl sul plan di svilup dal insegnament de lenghe corse 2016-2021. Il document al previôt di slargjâ in maniere progressive in ducj i istitûts de isule l’insegnament bilengâl a partî de scuele de infanzie e di inserî la presince de lenghe e de culture corse in ducj i nivei scolastics e di formazion. I cinc agns di durade dal acuardi a son cuvierts cun 17 milions di euros che a saran metûts a miezis di Stât e Comunitât Teritoriâl. Tra lis novitâts de convenzion si à un plan straordenari di formazion che al permetarà a 700 insegnants, o sei la metât di chei in servizi tes scuelis primariis de isule, di garantî il slargjament dal insegnament bilengâl.

Font: Corse Net Infos, 02/11/16; Alta Frequenza, 03/11/16

Ream Unît: gnovis regulis linguistichis pai dipendents publics

Cui 21 di Novembar al jentrarà in vore in Ingletiere e in Gales il gnûf codiç linguistic pai dipendents publics fat bon dal guvier britanic in Lui e che si insuaze intes misuris plui strentis par regolâ la imigrazion. I nivei di competence linguistiche domandâts a dipendaran di fatôrs tant che la frecuence, la lungjece e la nature de interazion orâl e scrite cui citadins. Il codiç al vâl pai dipendents statâi e par chei des aministrazions locâls, de sanitât publiche, des scuelis e des agjenziis publichis, de polizie e des fuarcis armadis. I nivei di competence linguistiche a saran domandâts ancje ai lavoradôrs metûts a disposizion di agjenziis privadis par davuelzi ativitâts di relazion cui citadins in struturis publichis. Par chel che al rivuarde il Gales, la competence linguistiche e varà di jessi garantide sei par inglês che par galês.

Font: Personnel Today, 02/11/16

Serbie: minorance albanese inmò cence libris di tescj

I prins ministris di Serbie e Albanie si son cjatâts cui rapresentants de minorance albanese che e vîf te aree di Bujanovac, Medveđa e Preševo / Presheva cun chê di saltâ fûr dal berdei sui materiâi scolastics pes scuelis de minorance. Zaromai di agns i fruts di cheste aree si ricjatin cuntun numar no suficient di tescj scolastics par albanês e ancje chei che a àn a son aromai vieris. L’an passât il ministeri pe educazion dal Cossovo al veve inviât passe 100 mil libris di test che a jerin però stâts blocâts des autoritâts serbis par vie che a vevin contignûts di nature storiche e politiche che il guvier di Belgrât nol podeve acetâ. Intant dal incuintri l’esecutîf serp al à dite di vê metût un milion di euros par cjoli tescj gnûfs di divignince albanese, ma dut si à tornât a blocâ dopo che i rapresentants de minorance a àn insistût par vê de Albanie ancje libris di gjeografie e di storie cun contignûts contestâts de Serbie.

Font: Balkan Insight, 31/10/16

Paîs Catalans: 2,7 milions sui bants pal catalan valenzian

Il guvier de Comunitât Valenziane al à dât fûr i gnûf bants pe promozion de lenghe catalane. Un al è indreçât aes realtâts associativis e al à a disposizion un milion e 700 mil euros, a front dai a pene 100 mil euros metûts l’an prime. Il secont bant, invezit, si indrece ai ents locâi e al à une dotazion di un milion di euros. Cun di plui, pe prime volte, a puedin partecipâ ancje lis trê aministrazions comunâls dal Carche, o sei la aree de Murcia là che si fevele par catalan inte sô variante valenziane.

Font: La Vanguardia, 31/10/16

Cornualie: gnovis protestis cuintri dal “Devonwall”

E va indenant in Cornualie la mobilitazion cuintri de propueste di leç che par mudâ i confins des circoscrizions eletorâls. La comission clamade a fissâ la gnove gjeografie dal vôt e à di fat proponût une gnove circoscrizion miste tra Devon e Cornualie – za batiade “Devonwall” – che no ten cont dai confins storics, culturâi e aministratîfs tra la contee inglese e la plui piçule tra lis nazions celtichis dal Ream Unît. Ai 30 di Otubar i manifestants a àn ocupât par un pôc un dai puints sul flum Tamar che al segne il confin tra Cornualie e Ingletiere: iniziative che, a disin i organizadôrs, e podarès ripetisi cun plui frecuence e cun plui viamence se di Londre no rivaran buinis gnovis. Sul plan parlamentâr il deputât dal Plaid Cymru, Jonathan Edwards, al è presentât une mozion di oposizion a cheste circoscrizion miste che però, fûr dai parlamentârs nazionalitaris galês e scozês, e à cjatât la poie dome di doi deputâts inglês. Par chest si à inviât ancje une campagne di pression sui parlamentârs par che a riviodin la lôr posizion, a partî di chei conservadôrs che a jerin stâts elets in Cornualie. Di là des resons storichis e culturâls, la circoscrizion miste e larès ancje cuintri dal ricognossiment dai cornics tant che minorance nazionâl.

Font: Mebyon Kernow, 30/10/16

Irlande: presentât il plan plurienâl pe educazion tal Gaeltacht

Il guvier irlandês al à presentât il plan 2017 – 2022 pe educazion intal Gaeltacht, o sei lis areis là che si à ancjemò une buine presince de lenghe irlandese. Si trate di un progjet ambiziôs che, tra lis altris misuris, al proviôt che par otignî il ricognossiment e i vantaçs garantîts aes scuelis gaelicofonis, i istitûts a vedin di doprâ in dut e par dut l’irlandês tant che lenghe veicolâr. Par rivâ a di un tant a son in program ancje jutoris specifics. Il plan al è indotât di un milion di euros pal prin an di metude in vore, par cressi po a man a man fintremai i siet milions ad an. Il document al à cjatât un bon acet de bande de organizazion di riferiment pe lenghe irlandese, Conradh na Gaeilge, che però e ricuarde che par tornâ a dâi vivôr ae lenghe no baste la scuele, ma al covente garantî ancje lis ocasions pal so ûs sociâl. Par chest si invide l’esecutîf a riviodi la sô posizion sul plan di invistiment proponût des realtâts associativis impegnadis pal gaelic che, te leç finanziarie pal 2017, no i è stât assegnât nancje un euro.

Font: CnaG, 28/10/16

Paîs Basc: inviade une bancje dâts sul cine par euskara

Ai 27 di Otubar al è stât presentât a Donostia il progjet Ganbara (cjast) che si propon di deventâ la bancje dâts in linie dal cine in lenghe basche. La iniziative, svilupade de cjase di produzion Zinea Sortzen e dal portâl Zinea.eus cu la poie dal guvier de Comunitât Autonome Basche e de provincie de Gipuzkoa, e je za in vore e fin cumò e à metût a disposizion lis schedis di 200 films, 400 professioniscj e 50 impresis dal setôr. L’intindiment al è chel di censî dute la produzion cinematografiche par euskara che, dal prin documentari “Gure sorlekua” (Là che o sin nassûts) a vuê, e conte tra i 700 e il miâr di titui. L’archivi virtuâl si insiorarà in curt ancje cu lis informazions sui cines dopleâts o sottitulâts par basc là che, a vuê, a son stâts za censîts uns 2.500 titui.

Font: EiTB, 27/10/16

Aragon: al cres il numar dai fruts che a studiin l’aragonês

I fruts che a studiin l’aragonês a scuele a son passâts di 625 a 782, cuntun aument dal 25% rispiet al an prime, intant che il numar di chei che a studiin il catalan si manten tor dai 4.500 scuelârs. Lis cifris a son stadis riferidis dal diretôr gjenerâl pe politiche linguistiche, José Ignacio López Susín, intant di une audizion denant dal Parlament dal Aragon là che al à ancje fevelât des risorsis in program inte prossime manovre di belanç par meti sù la gnove academie clamade a definî un standard unitari pal aragonês. Cheste lenghe – fevelade massime te aree pirenaiche, cence une grafie unitarie e lassade par agns cence une politiche di tutele e di promozion – e je une des plui a risi in Europe. Il guvier dal Aragon al à in pîts une convenzion cu la universitât di Zaragoza par inviâ un progjet pilote pal ûs veicolâr de lenghe proprie intes scuelis logadis là che l’aragonês al à ancjemò une cierte presince, ma lis azions metudis in vore dal gnûf esecutîf progressist si cjatin denant de oposizion dure de diestre spagnoliste (PP e Ciudadanos) e regjonaliste (PAR) che e va dilunc a pidimentâ ogni iniziative a pro dal aragonês e dal catalan fevelât te cussì clamade Franja de ponent.

Font: El Periodico de Aragon, 26/10/16

Gjermanie: prins segnâi par frison tal Schleswig-Holstein

Dilunc de stradis statâls de Frisie setentrionâl, intal Schleswig – Holstein, a son stâts screâts i prins segnâi stradâi bilengâi par todesc e par frison. La metude in vore de segnaletiche gnove e je tacade de Bundesstrasse 5, ma e cjaparà dentri in maniere progressive dute la provincie de Frisie setentrionâl. Pe operazion, tra 2016 e 2017, a son a disposizion 300 mil euros metûts dal guvier federâl. I gnûfs segnâi bilengâi a àn chê di palesâ la ricjece linguistiche e culturâl dal Schleswig – Holstein, là che dongje de maiorance todescje a vivin ancje frisons e danês, e la volontât dal guvier di tutelâ chest patrimoni, al à declarât intant de scree il ministri pai traspuarts Reinhard Meyer (SPD).

Font: NDR, 26/10/16

Paîs Basc: confront viert in Navare sul plan strategjic pe lenghe

Il guvier de Navare al à vierzût la consultazion publiche sul plan strategjic di politiche linguistiche 2016-2019. Fintremai i 19 di Novembar i citadins di cheste comunitât a podaran duncje proponi considerazions e propuestis sul test di fonde par promovi la cognossince e l’ûs sociâl de lenghe basche. Par compagnâ chest procès a son in program ancje apontaments par presentâ e par discuti il document in diviersis localitâts de Navare. Un dai prins obietîfs dal plan al è chel di sburtâ a fevelâ par euskara chei che za lu capissin, ma che par solit no lu doprin. Tra lis liniis di indreçament principâls o cjatìn po: favorî l’acès di ducj al aprendiment de lenghe, incressi la ufierte culturâl par basc, l’ûs regolâr de lenghe tes aministrazions publichis, aumentâ la sô presince tai servizis e tes impresis. Si ponte ancje a svilupâ il potenziâl dal euskara come motôr economic, peant il so valôr unic come patrimoni imateriâl tai setôrs produtîfs, tecnologjics e di inovazion de Navare.

Font: Naiz:, 21/10/16

Scozie: stampon par un secont vôt su la indipendence

Joibe ai 20 di Otubar il guvier scozês al à presentât il stampon de leç par imbastî un secont referendum su la indipendence. Il test al previôt une consultazion sul model di chê che si veve tignude intal 2014, duncje cence soiâr minim di partecipazion pe validitât dal referendum e cu la pussibilitât di votâ sei pai fantats di 16 e di 17 agns, sei pai citadins de UE che a àn la residence in Scozie. Fintremai i 11 di Zenâr dal 2017 i citadins a varan la pussibilitât di dî la lôr sul stampon, prime di tacâ l’iter parlamentâr là che si à za une maiorance formade di SNP e Verts pronte a votâlu.

Polonie: no al ricognossiment dai slesians come minorance

Ai 19 di Otubar il Parlament de Polonie al à boçât la propueste di leç che e proponeve di ricognossi i slesians tant che minorance etniche. Cundut che intal ultin censiment cuasi un milion di citadins si vevin declarâts slesians e no polacs, pai partîts che a poin il guvier conservadôr in cjarie, ma ancje par diviers di chei di oposizion, i abitants de Slesie a partegnin in dut e par dut ae comunitât nazionâl polache. La mancjance dal ricognossiment e impedìs la pussibilitât di gjoldi des misuris legjislativis previodudis par tutelâ lis lenghis e lis culturis des comunitâts minorizadis.

Font: EFA, 20/10/16

Scozie: inviade la sperimentazion di e-Sgoil

E je partide intun istitût di Aberdeen / Obar Dheathain, in Scozie, la sperimentazion dal progjet e-Sgoil che al propon la incressite des materiis curicolârs par gaelic par mieç di lezions davueltis online. La iniziative e je stade finanziade dal Bòrd na Gàidhlig, l’organisim di riferiment pe lenghe gaeliche, cun 150 mil sterlinis. Par cumò si à tacât cun lezions davueltis trê dîs par setemane e la rispueste dai students, dal personâl scolastic e ancje des fameis e je une vore positive. Chest progjet pilote si propon di meti ae prove i nivei formatîfs e lis tecnologjiis a disposizion par definî dai modei di insegnament specifics. No si trate di sostituî l’insegnament tradizionâl cul insegnant in classe, ma di slargjâ la ufierte par gaelic ancje ta chês scuelis là che no si à la disponibilitât di professôrs in stât di garantî chest servizi.

Font: Bòrd na Gàidhlig, 18/10/16

Montenegro: minorancis decisivis pal gnûf guvier

La clâf pe formazion dal gnûf guvier dal Montenegro e passe pai deputâts espression des minorancis nazionâls. Cun di fat, lis elezions che si son tignudis ai 16 di Otubar a àn infuartît la posizion dal prin ministri in scjadince Milo Djukanović cence dâi però la pussibilitât di guviernâ di bessôl. Il so Partît Democratic dai Socialiscj (DPS) al à otignût 36 elets, cinc in plui de volte stade, a front di un Parlament formât di 81 deputâts. I siei aleâts Sociâi Democratics (SD) i puartin altris doi parlamentârs. A fâi cuintri a son lis cuatri fuarcis principâls de oposizion, ven a dî il Front Democratic (DF, cun 18 elets), la coalizion Ključ (o sei “clâf”, cun 9 elets), il moviment Montenegro Democratic (DCG, cun 8 elets) e il Partît Sociâl Democratic (SDP, cun 4 elets) che a metin adun un totâl di 39 deputâts. Chescj partîts a contestin la regolaritât des elezions, segnadis di cetantis denunciis di brois e di coruzion dai eletôrs. Par decidi se sostignî un gnûf guvier Djukanović o formâ cu lis oposizions un esecutîf di transizion par preparâ il teren par elezions regolârs, a son cussì fondamentâi i 4 deputâts des minorancis, o sei i 2 dal Partît Bosgnac (BS) e chei elets tes filis de coalizion albanese (AO) e de Iniziative Civiche Cravuate (HGI).

Font: Balkan Insight, 17-18/10/16

Corsiche: mobilitazion par Battini, Verdi e Tomasini

Ai 15 di Otubar tra lis 2 e lis 3 mil personis a àn sfilât pes stradis di Bastia par protestâ cuintri de condane di trê zovins militants cors – Nicolas Battini, Ghjaseppu Maria Verdi e Stéphane Tomasini – acusâts di un atac cuintri de sotprefeture di Corti. Ae mobilitazion a àn partecipât rapresentants di dutis lis animis dal nazionalisim cors – a partî dai presidents dal esecutîf e de Assemblee corse, Gilles Simeoni e Jean-Guy Talamoni – ma ancje personalitâts politichis dai partîts di ispirazion francese. Par ducj, di fat, lis penis assegnadis ai trê zovins a son dal dut fûr di proporzion rispiet ai reâts che a son acusâts e a dan fuarce a cui che al fevele di condanis di stamp politic. Dopo de manifestazion un grup di militants radicâi si è scuintrât a dilunc cu la polizie, intant che uns pôcs di fantats de Ghjuventù Indipendentista e à inviât un siopar de fam.

Font: Alta Frequenza, 17/10/16

Paîs Basc: in 25 agns euskalduns cressûts dal 10% te CAB

A son stât presentâts i prins risultâts de seste inchieste sociolinguistiche, che ogni cinc agns e ufrìs la fotografie dal stât di salût de lenghe basche. Pe prime volte la investigazion e à cjapât dentri ancje la Navare e Ipar Euskal Herria, o sei la part dal Paîs Basc sot aministrazion francese, ma par cumò a son stâts comunicâts dome i risultâts riferîts ae Comunitât Autonome Basche. Achì il 33,9% de popolazion cun plui di 16 agns (uns 630 mil personis) al è euskaldun, o sei che al è in stât di fevelâ par basc, in cressite dal 2% rispiet a cinc agns prime e dal 10% intai ultins vincjecinc agns. Il 19,1% de popolazion (356 mil) al à une cognossince passive de lenghe, ven a dî che le capìs ma no le fevele, intant che il 47% al è monolingui spagnûl. I dâts a mudin però in maniere significative a seconde de provincie basche interessade, cun di fat i euskalduns in Gipuzkoa a son il 50,6%, in Bizkaia il 27,6% e in Araba il 19,2%. A son in cressi sei i dâts sul ûs cuotidian de lenghe, pe prime volte ancje dentri des fameis, e su la voie che si ledi indenant a saborâ il so ûs. Il dât plui impressionant al reste dut câs chel dai zovins tra i 16 e i 24 agns, là che intal 1991 chei che a fevelavin par basc a jerin dome il 25% e vuê a son il 71,4%.

Font: EiTB, 14/10/16; Deia, 14/10/16

Irlande: finanziarie 2017 cence risorsis in plui pal gaelic

La presentazion de leç finanziarie pal 2017 fate indenant dal guvier irlandês e à fat saltâ sù lis realtâts associativis impegnadis pe lenghe gaeliche. Intal document, di fat, no si à metût dentri nancje lis fondis pal plan di invistiment proponût di uns otante tra organizazions pe lenghe e sogjets atîfs intal Gaeltacht, o sei lis areis là che si à ancjemò une buine presince de lenghe irlandese. Il plan, in plui di favorî e slargjâ lis oportunitâts pal ûs sociâl de lenghe, al varès creât cuasi 1.200 puescj di vore. Dal 2008 a vuê il guvier al à smiezât lis risorsis pe agjenzie pe lenghe Foras na Gaeilge e par chê che e gjestìs il lavôr intes areis gaelicofonis, Údarás na Gaeltachta. Tal belanç pal 2017 no si à metût nancje un euro in plui su chestis vôs e chest al vûl dî che, no dome no si varà la pussibilitât di inviâ il plan di invistiment, ma che si varan di ridusi ancjemò i servizis linguistics ufierts.

Font: CnaG, 12/10/16

Stât francês: gnove propueste di leç pes lenghis minorizadis

Une gnove propueste di leç su lis lenghis minorizadis e je stade presentade te Assemblee francese. A fâle indenant cheste volte al è stât il grup parlamentâr socialist cun prime firmatarie la deputade bretone Annie Le Houérou. Il test al previôt, tra l’altri, che tes areis là che si fevele une lenghe proprie i students a puedin sielzi di vê des materiis insegnadis ta cheste lenghe, di sburtâ la segnaletiche bilengâl, di poiâ i mieçs di comunicazion in lenghe minorizade ancje cu la assegnazion di frecuencis radio specifichis. Dificil però che si rivi pardabon insom: une propueste di leç su lis lenghis minorizadis e jere za stade blocade sul prin tacâ di chest an e tal Parlament francês nol somee che cumò la clime e sedi cui sa ce divierse, cun di plui a mancjin i timps tecnics par sierâ il percors dal proviodiment tra Assemblee e Senât prime che e finissi la legjislature.

Font: France3 Midi-Pyrénées, 11/10/16

Paîs Basc: in Navare a cressin i adults che a studiin l’euskara

Inte suaze de scree dai gnûfs cors pal insegnament de lenghe basche ai adults in Navare, si à ricuardât che il numar dai students che la stagjon stade al à frecuentât chescj cors intai istitûts publics al è cressût di passe il 8%. Des 5.319 personis che si son zovadis di chest sisteme par studiâ l’euskara, la plui part si è poiade su struturis publichis e, plui in detai, 1.687 sui cors par lavoradôrs publics di Euskarabidea, 1.111 sul istitût Zubiarte e 881 su lis scuelis di lenghis di Iruñea / Pamplona.

Font: La Informacion:, 11/10/16

Paîs Catalans: plui fonts pes sottitulazions par catalan

Il guvier catalan (Generalitat) e la agjenzie Catalunya Film Festivals a àn rignuvît la convenzion che a àn in vore dal 2008 par saborâ la sottitulazion cinematografiche par catalan. I fonts a disposizion pal 2016 a son 115 mil euros, 5 mil in plui dal an passât, e a permetaran di sottitulâ uns 600 tra films e curtmetraçs, o sei sù par jù il 70% de ufierte cinematografiche di chest an. Di cuant che la convenzion e je stade inviade a son stâts sottitulâts 1.130 cines e 3.537 curts.

Font: La Informacion, 07/10/16

Paîs Catalans: referendum su la indipendence tal 2017

Intant de riunion dal Parlament de Catalogne dai 6 di Otubar la maiorance indipendentiste formade di Junts pel Sí e de CUP e à fate buine une risoluzion che e previôt di inmaneâ un referendum vincolant su la indipendence al plui tart dentri dal Setembar dal 2017, ancje tal câs che no si cjati un acuardi in proposit cul guvier spagnûl. Il document al previôt ancje di meti sù dentri de fin dal an une comission che e viodi dai lavôrs par imbastî la consultazion, ma ancje un comitât di esperts catalans e internazionâi par monitorâ il percors par rivâ ae indipendence e un coordenament di dutis lis fuarcis politichis e sociâls a pro dal procès di autodeterminazion. Catalunya Sí que es Pot si è astignude su chest test, ma e à votât adun cun Junts pel Sí une seconde risoluzion che e impegne il guvier a lavorâ par un referendum su la indipendence, cence indicazions di date, che al puedi cjatâ un ricognossiment internazionâl. Dutis e trê lis fuarcis sovranistis catalanis a àn po votât adun par modificâ la leç di stabilitât dal belanç in maniere di dâi prioritât aes politichis sociâls sul paiament dal debit. L’acuardi su lis risoluzions al nas dal percors di distension tra la coalizion nazionalitarie di Junts pel Sí e i indipendentiscj anticapitaliscj de CUP inviât cul vôt di fiducie de setemane prime al president dal guvier Carles Puigdemont.

Font: El Punt Avui, 07/10/16; Naiz:, 06-07/10/16; VilaWeb, 06/10/16

Paîs Basc: indenant il confront sul gnûf guvier de CAB

Ai 5 di Otubar, une volte sierât il prin zîr di consultazions cun chei altris partîts, i rapresentants dal Partît Nazionalist Basc (PNV) a àn fat il pont su lis prospetivis pe formazion dal prossim guvier de Comunitât Autonome Basche dopo des elezions dai 25 di Setembar che a àn viodût propit il PNV tant che fuarce plui votade (37% dai vôts e 28 elets) e clamade duncje a imbastî il gnûf esecutîf.

Europe: a bon lis liniis dal protocol di Donostia

La prime setemane di Otubar il comitât sientific dal protocol di Donostia al à stazât lis propuestis rivadis vie pe Vierte e pal Astât di centenârs di realtâts sociâls espression des comunitâts minorizadis de Europe e lis à metudis jù intun document unitari. L’intindiment al è chel di svilupâ un protocol par garantî i dirits linguistics. Il lavôr al è partît de Declarazion universâl dai dirits linguistics di Barcelone in maniere di passâ di un test che al met dongje la liste dai dirits a di un che al propon invezit misuris concretis par dâi sostance a chei dirits. Ai 25 di Otubar il comitât organizadôr (che al met adun Linguapax International, CIEMEN, ELEN, UNPO, ECMI e Pen International) al proviodarà a staronzâ il test fat bon dal comitât sientific. La presentazion publiche dal protocol e je in program ai 17 di Dicembar a Donostia.

Font: Protokoloa.eus, 05/10/16

Paîs Catalans: iniziative par promovi la lenghe tal cumierç

La fondazion PuntCat, intune cu la direzion pe politiche linguistiche dal guvier catalan, e à inviât il program Comerçlocal.cat indreçât a dutis lis ativitâts comerciâls plui piçulis ativis in Catalogne. La iniziative e ufrìs la pussibilitât a chestis impresis di comprâ cuntun cost une vore bas un spazi intal domini .cat e di meti sù sore nuie un sît par catalan par promovi la lôr ativitât. In cheste maniere si vûl dâi une man aes realtâts comerciâls plui piçulis e, tal stes timp, sburtâ la visibilitât de lenghe catalane in rêt e la sô presince tal mont de economie.

Font: Generalitat de Catalunya, 04/10/16

Bosgne: elezions, nazionaliscj plui fuarts te Republika Srpska

Intes elezions aministrativis che si son tignudis ai 2 di Otubar in Bosgne, il vincidôr principâl al è stât Milorad Dodik, il president de Republika Srpska, o sei la part serbe de federazion. I candidâts dal so partît, la Aleance dai Sociâl Democratics Indipendents (SNSD), a àn vinçût in passe 30 comuns, 11 in plui de volte stade. Ta cheste maniere Dodik, che tai ultins timps nol à platât la sô intenzion di slontanâ la Republika Srpska dal rest de federazion, al infuartìs ancjemò di plui la sô posizion. Il Partît Democratic Serp (SDS), il so aversari principâl, al è restât invezit dome cun 8 sindics, nancje un tierç di chei che al veve te legjislature stade. Tal rest de federazion i bosgnacs dal Partît de Azion Democratiche (SDA) a àn otignût 33 comuns (12 in mancul), la Union Democratiche Cravuate (HDZBiH) 16 e il Partît Sociâl Democratic (SDP) 8. Lis elezions a son stadis segnadis de tension massime a Srebrenica, là che intal 1995 lis miliziis serbis a vevin sassinât passe 7 mil personis. In dì di vuê il comun al è cjapât dentri te Republika Srpska, ma pes aministrativis a puedin votâ ancje i bosgnacs che cumò a vivin inaltrò. Chest i veve permetût di vê simpri un sindic bosgnac, ma cu lis ultimis elezions il plui votât al è stât il candidât serp e la mancjance de conferme dal risultât par zornadis a dilunc, no à zovât a cuietâ la situazion.

Font: Balkan Insight, 03-05/10/16

Paîs Catalans: domandâts agns di bant par Mas, Ortega e Rigau

La avocadure dal stât spagnûl e à domandât di condanâ a dîs agns di bant di ogni incarghe publiche l’ex president dal guvier catalan, Artur Mas, e a nûf agns la ex presidente vicjarie Joana Ortega e la ex assessore Irene Rigau. Pes autoritâts spagnolis, di fat, a son colpevui di “disubidience” e di “prevaricazion” par vie che no varessin rispietât la ordenance dal tribunâl costituzionâl di no favorî in nissune maniere il davuelziment de consultazion popolâr su la indipendence de Catalogne che si veve tignude ai 9 di Novembar dal 2014. In ocasion de riunion dal Parlament de Catalogne dai 6 di Otubar Junts pel Sí, CUP e Catalunya Sí que es Pot a àn votât un document unitari di poie a ducj i rapresentants istituzionâi che si cjatin imputâts par vie de lôr ativitât inte suaze dal procès pe autodeterminazion catalane.

Font: El Punt Avui, 03/10/16; Naiz:, 03/10/16

Montenegro: alfabet cirilic discriminât tes scuelis

Di cumò indenant in Montenegro dutis lis comunicazions scritis dentri dal sisteme scolastic e chês indreçadis ai students e ai lôr gjenitôrs a saran scritis cul alfabet latin. Dome tal câs di une domande esplicite de bande des fameis o dai insegnants si doprarà l’alfabet cirilic, ma no son pôcs i câs di gjenitôrs e professôrs che a son stâts “invidâts” a lassâ pierdi par evitâ consecuencis negativis. Pes realtâts associativis e politichis de minorance serbe si trate di une situazion di discriminazion palese che e va cuintri de avualiance dai doi alfabets previodude de Costituzion. La gnove diretive su lis comunicazions scolastichis e va a saborâ lis tensions partidis ancjemò tal 2007 cuant che su la Costituzion si veve fevelât di lenghe montenegrine e lenghe serbe, in pratiche la stesse lenghe ma la prime scrite cun alfabet latin e la seconde in cirilic. La progressive limitazion de presince dal cirilic e à rindût la minorance serbe simpri plui malcuiete, ma e à ancje jevât fantasimis storichis framieç di une part dai montenegrins. Di fat il cirilic al è stât gjavât des scuelis dome dôs voltis: intal 1916 intant de ocupazion austriache e intal 1941 intant de ocupazion taliane.

Font: Balkan Insight, 30/09/16

Gales: cul 2021 il galês no sarà plui “lenghe seconde”

Il ministri pe lenghe galese Alun Davies al à comunicât in maniere uficiâl denant de Assemblee nazionâl dal Gales che cul 2021 intes scuelis al sarà eliminât l’insegnament dal galês come lenghe seconde par fâi puest al ûs curicolâr slargjât de lenghe proprie in ducj i istitûts dal paîs. La comunicazion e rive a distance di trê agns de jessude dal rapuart comissionât dal guvier a di un espert indipendent là che si proponeve di superâ il sisteme de “lenghe seconde” par vie che nol garantive ai students la pussibilitât di imparâ ben la lenghe. Il guvier galês al jere zaromai di mês sot pression par vie des mobilitazions e des azions diretis metudis in at de organizazion Cymdeithas yr Iaith Gymraeg par gjavâ il model de “lenghe seconde”. La stesse linie e jere stade cjapade sù ancje dai nazionalitaris dal Plaid Cymru.

Font: Cymdeithas, 30/09/16

Ocitanie: nons regjonâi, il Consei di stât al lasse fûr i catalans

La gnove regjon nassude de fusion jenfri Lenghedoc – Roussillon e Misdì – Pireneus e à non Ocitanie. La decision definitive e je stade cjapade dal Consei di Stât francês che al à taiât vie la adietivazion “pirenaiche mediteranie” che la aministrazion locâl e veve zontât par vie che la regjon e cjape dentri dome une part de comunitât nazionâl ocitane. L’orghin statâl nol à tignût cont nancje des protestis rivadis de Catalogne Nord là che si domandave che il non de gnove regjon al cjapàs dentri dutis lis dôs identitâts che a formin chest teritori, o sei chê ocitane ma ancje chê catalane.

Font: Jornalet, 29/09/16

Corsiche: sucès de manifestazion pe amnistie

A son stadis sù par jù 10 mil lis personis che ai 24 di Setembar a àn partecipât a Ajacciu ae manifestazion inmaneade de organizazion Associu Sulidarità par domandâ la amnistie pai presonîrs politics cors e la fin de persecuzion dai militants in clandestinitât. Citadins, rapresentants di disinis di realtâts associativis, di sindacâts, di partîts e des istituzions de isule, a partî dai presidents dal esecutîf e de Assemblee de Corsiche, a àn sfilât daûr dai strissons “amnistia” e “libertà per i patriotti” tune des manifestazions popolârs plui partecipadis inte storie resinte de isule. La mobilitazion in Corsiche si è però cjatade denant il cidin totâl de stampe francese e dal guvier di Parîs.

Font: Alta Frequenza, 26/09/16

Paîs Catalans: manifest di Randa pe lenghe comune catalane

Lis organizazions Òmnium Cultural, Obra Cultural Balear e Acció Cultural del País Valencià, a àn dât fûr ai 25 di Setembar il manifest di Randa a pro de lenghe catalane. Il document, che al cjape il non de localitât de isule di Maiorche là che al è stât firmât, al domande che lis istituzions de Catalogne, dal Paîs Valenzian e des Baleârs a lavorin in maniere coordenade a pro de lenghe proprie e che a puartin denant dal Parlament european e dal Consei de Europe lis violazions de Cjarte europeane des lenghis regjonâls o minoritariis metudis in at intai ultins agns dal PP, in particolâr il dinei a ricognossi il catalan come lenghe comune des trê comunitâts, lis politichis educativis cuintri dal catalan e i atacs aes azions di tutele linguistiche imbastidis a nivel locâl.

Font: El Nacional, 25/09/16