23/07/15

Bosgne: tension diplomatiche sul referendum te part serbe

E torne a alçâsi la tension in Bosgne dopo che la Assemblee de Republika Srpska, la part serbe de federazion, e à fate buine a maiorance la propueste di tignî in Setembar un referendum sul sisteme judiziari statâl metût sot acuse massime par chel che al rivuarde i câs leâts al conflit che al à insanganât cheste part dai Balcans vincj agns indaûr. La consultazion e va a tocjâ aspiets regolâts dai acuardis di pâs di Dayton e duncje, in plui di fâ saltâ sù lis autoritâts federâls che le viodin tant che un pericul pe convivence des diviersis comunitâts bosgnachis, e à alarmât ancje chês internazionâls che le calcolin une violazion dai acuardis e une menace pe integritât statâl. La decision di tignî il referendum e torne duncje a piâ lis tensions etnichis, za fuartis pes vicendis leadis al inovâl dal maçalizi di Srebrenica. Al è però ancje cui che al segnale che il sisteme judiziari al varès pardabon bisugne di jessi riformât, e cui che il president de Republika Srpska Milorad Dodik al ponte cun cheste manovre dome a distrai la opinion publiche dai problemis economichis che a podaressin saltâ fûr propit ca di un pâr di mês.
Font: Balkan Insight, 16/07/15

Galizie: manifest unitari dai partîts a pro de lenghe

Ai 15 di Lui la organizazion Mesa pola Normalización Lingüística e à presentât un pat di unitât a pro de normalizazion de lenghe galiziane sotscrit di ducj i partîts de Galizie. Il document si propon di superâ lis diferencis ideologjichis par fâ de valorizazion de lenghe proprie un valôr condividût. La declarazion e à cjatât une poie che e va de aree nazionalitarie plui a çampe fintremai la diestre spagnoliste. Cun di fat, dongje di Anova, BNG, Terra Galega, Compromiso por Galicia, Podemos, Esquerda Unida, Converxencia XXI, Alternativa dos Veciños, Cerna, PsdeG-PSOE, al ultin moment si à zontât ancje il PP, partît al centri des critichis dal rest dal panorame politic galizian propit pes sôs azions negativis pe lenghe. La adesion di ducj i partîts a chest pat pal galizian e à duncje un alc di storic, ancje se la dirigjence di A Mesa e à dite a clâr che ce che al è plui impuartant al è che cumò si rispietin i impegns cjapâts cu la firme dal document.
Font: Galicia Confidencial, 15/07/15; CRTVG, 15/07/15

Paîs Catalans: metudis lis fondis pe liste sovraniste pai 27S

E je daûr a cjapâ forme la liste unitarie che intes elezions dai 27 di Setembar si propon di meti adun il front a pro de indipendence de Catalogne. La propueste svilupade dal president dal guvier catalan Artur Mas e dal segretari di ERC Oriol Junqueras e à cjatât une prime poie sei de plui part dai partîts sovraniscj che cumò a son clamâts a ratificâle, sei des realtâts associativis che a vuidin la bataie indipendentiste, ven a dî Assemblea Nacional Catalana e Òmnium Cultural. I prins nons de liste unitarie a partegnin a personalitâts de societât civîl impegnadis pe indipendence de Catalogne (a tacâ di Raül Romeva, Carme Forcadell e Muriel Casals), intant che i candidâts espression direte dai partîts sovraniscj a restin in secont plan. La liste par cumò e cjate la poie di CDC (Convergència, di gnûf autonome dopo de division di CiU), ERC, Demòcrates de Catalunya (la part sovraniste che si è gjavade de UDC dopo de division di CiU) e Moviment d’Esquerres (i socialiscj sovraniscj), ma nol è dite che no si vierzi ancje a altris sogjets politics. I unics dal front indipendentist a vê dite a clâr che a coraran par lôr cont a son chei de CUP, che a sburtavin par une liste dute cence politics. Chel istès, dopo dal vôt, a varessin di poiâ ancje lôr il percors istituzionâl za concuardât par rivâ ae indipendence.
Font: VilaWeb, 14-16/07/15; Naiz:, 15/07/15

Gales: presentât il plan di rilanç dal galês de Cymdeithas

Ai 14 di Lui la organizazion Cymdeithas yr Iaith Gymraeg e à presentât la sô propueste di politiche linguistiche pe legjislature che si inviarà dopo des elezions pe Assemblee nazionâl galese dal 2016. A son trê i obietîfs che la propueste si propon di rivâi, ven a dî permeti ae int di podê doprâ pardabon la lenghe galese in ogni situazion, fermâ la diaspore di cui che al fevele par galês des areis là che la lenghe e je ancjemò maioritarie e incressi il numar di cui che le fevele a di un milion. “O crodìn che lis prossimis elezions a sedin centrâls pe lenghe parcè che, se no son dubis che il censiment dal 2011 al vedi mostrât la crisi dal galês, nol è il câs di pierdi la sperance, ma al covente invezit jessi determinâts a puartâ indenant une planificazion linguistiche clare” al à spiegât il puartevôs de organizazion Jaime Bevan. Lis propuestis svilupadis de Cymdeithas - che a van di une leç par che dutis lis scuelis a vedin il galês curicolâr ae nassite di centris par judâ la integrazion linguistiche di cui che nol cognòs ancjemò il galês – a divegnin sei di un confront dentri de organizazion, sei des consultazions cun altris grups e cun esperts dal setôr.
Font: Cymdeithas, 14/07/15

Ocitanie: ocitan tant che element di atrat te Tarn

La lenghe e la culture ocitane a son al centri de gnove campagne di promozion turistiche svilupade dal dipartiment de Tarn, o sei la provincie che e cjape dentri la citât di Albi. Manifescj e publicitâts leâts ae campagne a proponin peraulis di atrat par ocitan o par “francitan”, o sei il francês ocitanizât fevelât a nivel popolâr. Il materiâl turistic e il sît di promozion dal dipartiment a marchin la centralitât de lenghe e de culture ocitane, judicadis la clâf vere par cognossi e par capî chest teritori logât intal cûr de Ocitanie.
Font: Jornalet, 13/07/15

Cornualie: prins pas pe devoluzion di podês

Dopo dai impegns cjapâts in campagne eletorâl, il guvier britanic al tache a inviâ i gnûfs procès di devoluzion dai podês, no dome sui fronts cjalts de Scozie, dal Gales e de Irlande dal Nord, ma ancje par chel che al rivuarde la Cornualie, piçule nazion celtiche che a nivel istituzionâl e ven calcolade dome di contee de Ingletiere. L’acuardi imbastît dal esecutîf vuidât di David Cameron al previôt il trasferiment al Consei de Cornualie di competencis plui o mancul fuartis su traspuart public locâl, sanitât e servizis sociâi, progjets di svilup economic. Il Consei de Cornualie, cu la oposizion di laburiscj e UKIP, al à dât mandât al so president John Pollard di firmâ il pat, ma la propueste e lasse malapaiâts i aministradôrs locâi che ta chescj mês a vevin svilupât un progjet di devoluzion ben plui larc che il guvier britanic nol à esaminât. La maiorance dai conseîrs cornics e spere però che chest al sedi dome il prin pas di un percors che al permeti di incressi il nivel di autoguvier de Cornualie. Mebyon Kernow, il partît nazionalitari cornic, si mostre content che il teme dal autoguvier al sedi al ordin dal dì ancje a Londre, ma al va dilunc a domandâ la nassite di une Assemblee nazionâl de Cornualie sul model di chê galese in maniere di garantî a cheste comunitât nazionâl ancje un ricognossiment istituzionâl specific.
Font: Mebyon Kernow, 10/07/15; Cornish Guardian, 14/07/15; BBC, 16/07/15

Gales: mobilitazion cuintri dai tais a S4C

Il guvier britanic al à fevelât di coretîfs di pueste par evitâ consecuencis negativis pe radiotelevision publiche galese, ma la riforme dal sisteme di finanziament de BBC e va dilunc a preocupâ une vore il guvier e la Assemblee nazionâl dal Gales. Laburiscj, liberâi democratics e i nazionalitaris dal Plaid Cymru a domandin al esecutîf britanic garanziis che la manovre no puartarà a ridusi la programazion e i servizis ufierts viodût che tai ultins agns BBC Cymru Wales e S4C – la television par galês associade ae BBC – a àn za patît un tai di plui di un tierç dai finanziaments. Une vore critiche ancje la organizazion Cymdeithas yr Iaith Gymraeg che e atache il guvier di Londre ancje pal fat di vê cjapât lis sôs decisions suntun teme cussì delicât cence nancje scoltâ prime il parê des autoritâts politichis e televisivis galesis.
Font: Cymdeithas, 09/07/15; BBC, 10/07/15

Paîs Catalans: presentât il libri blanc de stampe par catalan

Un dai prins pas de Federazion des associazions dai editôrs par catalan, metude sù che nol è tant, al è stât imbastî e presentâ un libri blanc che al permet di cognossi la situazion dai passe 570 gjornâi, rivistis e mieç digjitâi publicâts par catalan. Si trate di une realtât che e da di vore a 2.459 personis e che e môf ogni an un faturât di passe 47 milions di euros. Par chel che al rivuarde i letôrs, il profîl medi al è di personis tra i 25 e i 54 agns di nivel sociâl medi o alt.
Font: Generalitat de Catalunya, 08/07/15

Cossovo: associazion dai comuns serps, tensions tal guvier

Gnove crisi tal guvier cossovan jenfri i rapresentants serps e chei albanês. Un tant cuant che no son nancje trê mês che i rapresentants de Srpska List, il partît di riferiment de comunitât serbe dal Cossovo, a àn tornât a ocupâ i lôr puescj intal esecutîf di Pristina dopo vê comedât i contrascj cun chei altris doi partîts de coalizion, o sei il Partît Democratic dal Cossovo (PDK) e la Leghe Democratiche dal Cossovo (LDK). Cumò la Srpska List e menace di tornâ a bandonâ l’esecutîf par vie des diferencis di vision su la associazion dai comuns serps. Chest organisim, previodût di acuardis internazionâi, al varès vût di nassi in Mai e invezit al è inmò dome su la cjarte. Il scuintri plui dûr però al è sui podês de associazion che pai serps a varessin di tocjâ ancje materiis economichis, urbanistiche e educazion, intant che pai albanês no varessin di lâ masse fûr de suaze normative za in vore.
Font: Balkan Insight, 08/07/15

Paîs Basc: plui spazi pal euskara dentri di EiTB

EiTB – la radiotelevision publiche de Comunitât Autonome Basche – e darà plui spazi al euskara tai notiziaris e tai programs informatîfs di ETB2 [bi], Radio Euskadi e Radio Vitoria. Lu à decidût la direzion de cjadene radiotelevisive dopo di une campagne svilupade di diviersis realtâts dal associazionisim basc. La linie di riferiment e sarà chê di rispietâ la sielte linguistiche dal intervistât. Chest al vûl dî che sui trê canâi radiotelevisîfs che a trasmetin par spagnûl, l’intervistât al podarà fevelâ ancje par euskara e lis sôs declarazions a laran po in onde sottituladis o dopleadis.
Font: El Correo, 06/07/15

Paîs Basc: il comun di Treviño pal euskara curicolâr a scuele

Il consei comunâl di Trebiñu / Treviño, isule aministrative dentri de Comunitât Autonome Basche che e fâs part de regjon Castilie e León, al à domandât al guvier regjonâl di garantî a ducj i students di podê studiâ la lenghe basche in orari curicolâr. A saran po i gjenitôrs a decidi se gjoldi di cheste oportunitât o pûr no. No si trate di nuie di straordenari, a ricuardin i aministradôrs locâi, dal moment che te Castilie e León cheste pussibilitât e je za garantide pal galizian inte aree dal Bierzo. Sul plan finanziari, a zontin, no varessin di jessi masse problemis dal moment che la Comunitât Autonome Basche dal sigûr e sarà disponibile a dâ une man.
Font: Diario de Soria, 06/07/15