12/06/15

Paîs Basc: gnûf guvier de Navare cui spagnoliscj ae oposizion

Cambi storic in Navare là che la Comunitât e varà une gnove maiorance di guvier che e met adun la aree nazionaliste basche, formade di Geroa Bai e EH Bildu, e chê progressiste cun Podemons e Izquierda – Ezkerra. I spagnoliscj, sei di drete che di centri çampe, a restin invezit ae oposizion adun cu la diestre regjonaliste de UPN che par agns e à guviernât la Comunitât forâl. Cundut de disponibilitât di Geroa Bai a tirâ dongje ancje i socialiscj, chescj ultins a àn sielzût di no jentrâ intun progjet considerât masse “basc” e soredut di no acetâ nissun percors in comun cui indipendentiscj di EH Bildu. L’acuardi di guvier pe Comunitât al à favorît ancje chel pal Comun di Iruñea / Pamplona là che Joseba Asiron, di EH Bildu, al sarà il prossim sindic de citât cu la poie di Geroa Bai, Izquierda – Ezkerra e Aranzadi, la liste civiche leade a Podemons. Al è un risultât storic, ancje dal pont di viste simbolic, dal moment che Iruñea / Pamplona no je considerade dome la capitâl storiche de Navare ma ancje chê di dute Euskal Herria, o sei il Paîs Basc inte sô integritât.
Font: Naiz:, 05/06/15; El Pais, 01/06/15

Paîs Catalans: Baleârs, pussibil acuardi PSOE - Més - Podemos

A van indenant intes Baleârs lis tratativis par meti in pîts un esecutîf progressist che al cjapi in man il guvier des isulis dopo che intes elezions dai 24 di Mai la diestre spagnoliste (PP) e à pierdût la maiorance assolude passant di 35 a 20 deputâts. Lis tratativis a viodin adun i socialiscj (PSOE) che a puedin contâ su 14 elets, Podemos che al à otignût 10 deputâts, e i nazionalitaris di Més per Mallorca e di Més per Minorca che in dut a àn 9 parlamentârs. Cundut dal eletric che si à jenfri socialiscj e Podemos, si cîr di lavorâ suntun program di guvier che al meti adun i ponts programatics che chescj partîts a àn in comun. Tra i temis plui cjalts, là che Més al davuelç une funzion di mediazion, o vin il sisteme di finanziament de Comunitât autonome, un plan di lote ae puaretât, il redit minim garantît e struments pe trasparence.
Font: Diario de Mallorca, 05/06/15

Paîs Catalans: a risi la aleance progressiste tal Paîs Valenzian

Plui ingredeade la situazion intal Paîs Valenzian là che il progjet di une aleance progressiste jessût dopo des elezions al riscje di lâ sù pai stecs. La soluzion plui pratiche par vê un esecutîf salt, almancul sul plan dai numars, e jere chê di une aleance di guvier che e metès adun i socialiscj (PSPV) cui lôr 23 parlamentârs, i nazionalitaris di Compromís cui lôr 19 elets e Podemos/Podem cui lôr 13 deputâts. Achì però e je la assegnazion de incarghis, massime chê di president dal guvier, a creâ divisions.

France: Cjarte des lenghis, lis gnovis promessis di Hollande

Il president francês François Hollande si è impegnât pe ratifiche de Cjarte europeane des lenghis regjonâls o minoritariis. Intal rispuindi a di un deputât breton, Hollande al à dite che la ministre de justizie Christiane Taubira e à vût la incarghe di meti jù un progjet di leç pe ratifiche de Cjarte. La gnove e ven però cjapade cun cautele des organizazions impegnadis inte promozion des lenghis minorizadis dal stât francês sei par vie che, cuntun tempisim suspiet, e rive juste ae vilie di elezions, sei par vie dai precedents. Ancjemò tal 1999 il prin ministri Lionel Jospin al veve firmât la Cjarte, ma il president Jacques Chirac al veve impedît che e fos ratificade. Intal 2014 invezit la Assemblee francese e veve fat bon un test di ratifiche che però nol lassave spazi pes lenghis minorizadis intai rapuarts cu lis aministrazions publichis e che po si veve impantanât alì.
Font: Agence Bretagne Presse, 04/06/15; Jornalet, 05/06/15

Ocitanie: sucès de azion rivendicative di Dàvid Grosclaude

Ai 3 di Jugn Dàvid Grosclaude, conseîr regjonâl de Aquitanie e president dal Partit Occitan, al à fermât il siopar de fam che al veve inviât vot zornadis prime tant che forme di pression sul guvier francês che di un an al tignive blocât il decret pe creazion di un Ufici public pe lenghe ocitane che lis Assembleis regjonâls de Aquitanie e dai Pireneus di Mieç a vevin decidût di meti sù. Dopo vê cirût in dutis lis manieris di sblocâ la situazion, Grosclaude al veve inviât un siopar de fam che in plui di cjatâ une grande poie framieç de comunitât ocitane al à puartât su la cuistion la atenzion internazionâl. Ancje in gracie dal scjas jevât de iniziative, no dome la ministre francese pe educazion e pe culture e à comunicât in maniere uficiâl la nassite dal Ufici dentri dal Astât, ma e à ancje fat savê che il stât al parteciparà sei al so funzionament, che al so finanziament.
Font: Jornalet, 04/06/15; VilaWeb, 04/06/15; EFA, 04/06/15

Gales: finanziâts altris sîs centris pal galês

Il prin ministri dal Gales, Carwyn Jones, al à comunicât che a saran sîs i gnûfs centris culturâi pensâts par saborâ l’ûs dal galês. Si trate di struturis indotadis di diviers servizis e spazis di incuintri là che lis personis a àn la pussibilitât di cjatâsi par fevelâ par galês. I sîs centris, che a van a zontâsi ai cuatri za in vore, a saran logâts a Ynys Môn / Anglesey, Bangor, Caerdydd / Cardiff, Aberteifi / Cardigan, Pontardawe e Tregaron. Pe lôr nassite il guvier galês al à metût a disposizion un milion e mieç di euros.
Font: BBC, 03/06/15

Paîs Basc: violazions dai dirits linguistics, denunciis cressudis

Elebide, il servizi pe garanzie dai dirits linguistics de Comunitât Autonome Basche, al à presentât il so rapuart anuâl. Dilunc vie dal 2014 lis segnalazions di violazion dal dirit di doprâ l’euskara a son stadis 342, il 15% in plui dal an prime. Pal esecutîf basc, cheste incressite e je leade plui al aument de cussience dai propris dirits framieç dai citadins che no al cressi reâl des violazions. Des denunciis rivadis, 107 a segnalin violazions fatis dal guvier basc o di organisims che i fasin riferiment diret, 102 a integnin aministrazions e uficis comunâi, 71 sogjets privâts, 40 la aministrazion centrâl dal stât e 18 i uficis provinciâi.
Font: EiTB, 03/06/15

Stât francês: riforme de scuele, garanziis pes lenghis

Une delegazion de Federazion pes lenghis regjonâls dentri dal insegnament public (FLAREP) si è cjatade cui rapresentants dal ministeri francês pe educazion par confrontâsi su la riforme dal sisteme de istruzion superiôr che si inviarà chest an che al ven e che e menace di margjinalizâ inmò di plui lis lenghis minorizadis. I rapresentants dal ministeri a àn fat savê che in curt e sarà dade fûr une circolâr par specificâ il pês di chestis lenghis dentri de riforme e a àn dât sigurazions sul fat che no si larà a ridusi, ma a infuartî la lôr presince dentri de scuele. Intant de riunion i delegâts de FLAREP a àn po tornât a domandâ che ae liste des lenghis za ricognossudis pal insegnament superiôr – o sei basc, breton, catalan, cors, ocitan e todesc – si zontin ancje il flamant e il francoprovençâl.
Font: Agence Bretagne Presse, 01/06/15

Carelie: associazion zovanîl sot de lint di Mosche

Daûr de stampe finlandese, Nuori Karjala, organizazion zovanîl de Carelie russe, e riscje di jessi calcolade di “agjent forest” de bande des autoritâts russis. Cheste categorie e ven doprade par indicâ lis organizazions no governativis che a cjapin finanziaments che a rivin di paîs forescj o che a davuelzin ativitâts politichis pôc agradidis a Mosche. Une volte identificadis tant che “agjents forescj” lis organizazions si cjatin a patî limitazions une vore penzis aes lôr ativitâts. La posizion di Nuori Karjala e je cumò sot dal tamês dal ministeri rus de justizie. Nol risulte che la organizazion e vedi cjapât bêçs dal forest, ma a metile a risi e sarès la visite di une delegazion de sezion zovanîl di un partît finlandês che, ancjemò tal 2013, e jere stade compagnade a viodi il Parlament e altris sîts di interès de Carelie.
Font: Finugor, 01/06/15

Paîs Basc: plui euskara ancje tai istitûts professionâi

La responsabile pe educazion de Comunitât Autonome Basche, Arantza Aurrekoetxea, e à anticipât che intal an scolastic 2015 – 2016 ancje intai istitûts professionâi al sarà a disposizion il model B, o sei chel bilengâl basc – spagnûl. Fin cumò la formazion professionâl si podeve frecuentâ o cul model A, dut par spagnûl cul euskara dome come materie di studi, o cul model D, dut par basc cul spagnûl dome come materie. Inte intenzion dal esecutîf de Comunitât, la introduzion di chest model e varès di judâ a incressi ancjemò di plui il numar di zovins che al studie par euskara.
Font: 20 minutos, 31/05/15

Irlande: gaelic in pericul ancje intal Gaeltacht

Daûr dai risultâts di une ricercje comissionade di Údarás na Gaeltachta, la agjenzie statâl che si ocupe dal svilup dal Gaeltacht, o sei des areis de Republiche de Irlande là che il gaelic al è ancjemò fevelât in maniere significative, tal zîr di une disine di agns l’irlandês al riscje di no jessi plui la prime lenghe nancje ta chestis areis. Cun di fat, za in dì di vuê, dome in 21 des 155 circoscrizions che a formin il Gaeltacht l’irlandês al è fevelât ogni dì di plui dal 67% de popolazion. Chel dal doi tierçs al è considerât il soiâr fondamentâl par che une comunitât e mantegni vive une lenghe. La gnove e je stade comentade cun preocupazion ancje dal comissari pe lenghe irlandese, Rónán Ó Domhnaill, che al à domandât un intervent plui fuart de bande dal stât sei sul plan normatîf, sei cul sigurâ che ducj i funzionaris publics che a operin ta chestis comunitâts a davuelzin la lôr ativitât par gaelic.
Font: RTE, 29/05/15; BBC, 29/05/15

Russie: mancul insegnants e tescj pes lenghis minorizadis

Il president de associazion dai popui ugrofinics de Russie al à segnalât la diminuzion di insegnants abilitâts a doprâ lis lenghis nativis intes scuelis primariis e de infanzie di chestis comunitâts. Un tant al dipent di une riforme dal sisteme educatîf che e à puartât a sierâ diviersis sezions dai istitûts pedagogjics là che chescj insegnants a podevin formâsi e cjapâ la abilitazion. In plui de formazion dal personâl, un altri probleme segnalât al è chel de mancjance di un numar suficient di tescj scolastics intes lenghis ugrofinichis feveladis inte Federazion Russe.
Font: Finugor, 28/05/15

Scozie: impegn britanic pal aument des compartecipazions

Lis autoritâts britanichis si zuin massime la cjarte de tassazion e dal stât sociâl par cirî di rispuindi al marum dai scozês che, dopo vê crodût aes promessis dai partîts unioniscj (Conservadôrs, Laburiscj e Liberâi Democratics), intes ultimis elezions a àn afidât ai indipendentiscj dal SNP 56 dai 59 puescj che la Scozie e à intal Parlament di Londre. Intant dal discors programatic tignût denant dal Parlament, il gnûf esecutîf al à presentât ancje i ponts centrâi de leç di devoluzion scozese. Tra i podês che a saran assegnâts aes autoritâts di Edimburc o cjatìn la pussibilitât di incressi fin al 40% il nivel des tassis sul redit e di tignîsi il 100% di chês scuedudis in Scozie, di otignî il 10% des impuestis sul valôr zontât paiadis in Scozie, ma ancje gnovis competencis sul plan dal stât sociâl sostignudis di 2 miliarts e mieç di sterlinis, il control sui programs par judâ la int a cjatâ lavôr e il podê di intervignî sui beneficis pes personis anzianis, pai disabii e pai puars. Nol è dite però che chestis promessis a contentin il SNP ancje parcè che, cumò che il guvier britanic al cîr di definî rapuarts diferents cun Bruxelles, al pues meti su la taule des tratativis ancje il pês di une Scozie che in grande maiorance no acetarès la jessude de Union Europeane.
Font: BBC, 27/05/15 - 02/05/15