Irlande: a Belfast paradis oranzistis segnadis de violence

A jerin sù par jù 550 lis paradis inmaneadis ai 12 di Lui ator pe Irlande dal Nord des diviersis lozis dal Ordin di Orange par celebrâ la vitorie dal 1690 su la Bóinne / Boyne che, massime dal pont di viste simbolic, e veve segnât la supremazie britaniche protestante in Irlande. Cundut dal caratar setari di chestis marcjadis, te plui part dai câs no si àn vûts incidents. Situazion diferente invezit a Béal Feirste / Belfast là che la comission pes paradis e veve decidût di scurtâ une des marcjadis in program par evitâ che e passàs pal cuartîr a maiorance nazionaliste irlandese di Ard Eoin / Ardoyne. Une decision che e veve cjatât la poie de comunitât nazionaliste, ma e veve jevât critichis de bande dai politics unioniscj e dal Ordin di Orange che al veve invidât i siei membris a protestâ. Magari cussì no, lis protestis a son deventadis dal moment violentis cun scuintris tra polizie e militants unioniscj che a son lâts indenant par diviersis gnots. Intes violencis a son restâts ferîts plui di setante poliziots e ancje un deputât unionist (Nigel Dodds dal DUP).

Font: BBC, 12-14/07/13

Paîs Catalans: ofensive cuintri de lenghe denunciade de SOCS

La Societât Catalane di Sociolinguistiche e à inviât a diviers organisims sientifics internazionâi un document là che e segnale i atacs puartâts des istituzions spagnolis ae lenghe catalane. Intal test si dîs che, no dome no son rispietâts i acuardis internazionâi pe tutele de diversitât linguistiche e des minorancis, ma si metin in at proviodiments legjislatîfs che a pidimentin o a scancelin ancje dirits che za a jerin come tal câs de leç Wert su la riforme dal sisteme scolastic statâl, des leçs dal guvier des Baleârs e di chel valenzian su la cognossince dal catalan intes scuelis e intes aministrazions publichis, e de leç su lis lenghis dal Aragon là che si va fintremai a scancelâ il non "catalan". Ducj elements che a vegnin po segnalâts ancje al comitât di esperts dal Consei de Europe che al à di preparâ il rapuart su la metude in vore intal stât spagnûl de Cjarte europeane des lenghis regjonâls o minoritariis.

Font: VilaWeb, 11/07/13

Corsiche: ricognossût il domini .corsica

No je une estension leade ae identitât linguistiche e nazionâl, come tal câs dal .cat (Catalogne), dal .eus (Paîs Basc) o dal .bzh (Bretagne), ma chel istès e rapresente il ricognossiment di une realtât cuntune sô identitât specifiche. Si fevele dal domini .corsica ricognossût dal ICANN, l’organisim internazionâl che al regole e al controle i lis estensions su internet. A puartâ indenant il percors par otignî chest ricognossiment e je stade la Coletivitât Teritoriâl de Corsiche che e ponte cussì a incressi la visibilitât e la specificitât de isule ancje su la rêt.

Font: Alta Frequenza, 10/07/13

Paîs Catalans: cjadene umane pe indipendence, ben lis adesions

Une cjadene umane a pro de indipendence che e scjavaci dute la Catalogne inte zornade dai 11 di Setembar, fieste nazionâl catalane. E je cheste la gnove iniziative imbastide de Assemblee Nazionâl Catalane par manifestâ ancjemò une volte la volontât di indipendence de maiorance dai catalans. Si trate di cuvierzi une trate di plui o mancul 400 chilometris cuntun numar stimât di personis che al podarès lâ di 250 a 280 mil. Lis iscrizions par partecipâ a son tacadis ai 3 di Lui e, juste par dâ une cerce de sensibilitât dai catalans su chest teme, tal zîr di une setemane a jerin za 80 mil lis adesions rivadis. Se il numar di personis par dâ vite ae iniziative nol varès duncje di jessi un probleme, al è po di zontâ che za si resone su la pussibilitât di inmaneâ cjadenis umanis pe indipendence ancje in altris parts dai Paîs Catalans e in altris localitâts ator pal mont là che a vivin comunitâts catalanis.

Font: VilaWeb, 10/07/13

Paîs Basc: mobilitazion intal Nord pes ikastolas

A son coventadis la ocupazion par trê dîs dai locâi de sede provinciâl dal Partît Socialist a Baiona / Bayonne e la menace di gnovis manifestazions de bande de organizazion Seaska, che e met adun professôrs e gjenitôrs dai fruts che a frecuentin lis scuelis a imersion in lenghe basche (ikastolas), par otignî un incuintri tra i rapresentants dal guvier francês e i delegâts di cheste e di altris organizazions des scuelis parificadis che a doprin une lenghe minoritarie. Al centri dal incuintri e je la cuistion dal finanziament di chestis scuelis che intal stât francês a son lis unichis là che basc, ocitan, catalan, breton e alsazian a son dopradis tant che lenghis di insegnament. A discjadenâ il probleme al è stât il prefet vicjari di Baiona che al à blocât il decret di finanziament decidût dal comun di Hendaia / Hendaye pe costruzion di une gnove scuele in lenghe basche su la fonde de cussì clamade leç Falloux, une leç dal 1850 che no previôt pes scuelis privadis la pussibilitât di finanziaments de bande dai ents locâi. Si trate di un proviodiment che nissun al veve mai doprât par intervignî su cheste materie, ma che al rapresente cumò un precedent che al riscje di blocâ un canâl finanziari fondamentâl pe esistence di chestis realtâts no dome intal Paîs Basc dal Nord (Ipar Euskal Herria), ma ancje ta chês altris comunitâts minorizadis dal stât francês.

Font: Le Journal du Pays Basque, 09/07/13; SudOuest France, 10/07/13

Ongjarie: celebrazions pe zornade dai slovacs

Ai 7 di Lui e je stade celebrade a Palhaza la Zornade dai slovacs de Ongjarie. Ae manifestazion a àn partecipât ancje doi ministris dal guvier magjâr par manifestâ la volontât di amistât tra lis dôs comunitâts. Une amicizie, si à dite, che si palese ancje intal plen rispiet de identitât nazionâl de minorance che tai ultins dîs agns e je cressude dal 70% e che in dì di vuê e conte plui o mancul 30 mil membris. Pai rapresentants dal esecutîf ongjarês chest rispiet al è stât infuartît cu la gnove leç che e permet a dutis lis 13 minorancis nazionâls ricognossudis di vê dai rapresentants garantîts intal Parlament. Intant des celebrazions e je stade po ricuardade ancje la impuartance de colaborazion tra i doi stâts pal rispiet de minorance slovache in Ongjarie e di chê ongjarese in Slovachie. Teme che al è stât po frontât ai 9 di Lui a Budapest dai doi prins ministris Viktor Orban e Robert Fico.

Font: Finugor, 07/07/13

Scozie: la tv gaeliche BBC Alba e va dilunc a cressi

Daûr dal ultin rapuart uficiâl su la ativitât di BBC Alba, il canâl televisîf par gaelic scozês che al à tacât la sô ativitât intal 2008, la dade 2012 – 2013 e je stade la miôr fin cumò par chel che al rivuarde i dâts di scolte. Il numar dai spetatôrs al è di fat cressût di 436 mil a 637 mil par setemane, ven a dî dal 10,6% al 15,6% de audience totâl. A cressi però e je stade ancje la vision par mieç dai gnûfs imprescj tecnologjics, tant che iPlayer, là che lis visions di programs a son stadis plui di 4 milions, o sei cuasi il dopli dal an prime. Intal rapuart dut câs a son segnalâts ancje i elements che al covente comedâ tant che la dibisugne di incressi i programs par fruts e di sbassâ il numar des replichis, ma ancje la mancjance di seriis dramatichis origjinâls. Par chest ultin pont, e à dite la presidente de MG Alba (che e gjestìs il canâl in lenghe gaeliche adun cu la BBC) Maggie Cunningham, une ispirazion e pues rivâ des seriis televisivis danesis che a àn vût un bon sucès ancje in Scozie. Pe Cunningham, par judâ BBC Alba a cressi ancjemò, lis prioritâts a son duncje leadis al svilup di materiâi multimediâi, programs par fruts e seriis dramatichis. Cun di plui, si larà dilunc a scambiâsi esperiencis e a colaborâ cun chês altris televisions che a trasmetin in lenghe minoritarie (tant che la galese S4C e la irlandese TG4).

Font: BBC, 05/07/13

Cossovo: i serps a metin sù une Assemblee indipendente

Lis autoritâts cossovanis a àn comunicât che lis prossimis elezions aministrativis si tignaran ai 3 di Novembar. Intal comunicâ la gnove, la presidente Atifete Jahjaga, e à indreçât un invît particolâr ae popolazion dai cuatri comuns dal Cossovo setentrionâl a maiorance serbe par che e ledi a votâ. Cun di fat intal 2009 i citadins di Kosovska Mitrovica, Leposavić / Leposaviq, Zvečan / Zveçan e Zubin Potok a vevin boicotât lis elezions comunâls inmaneadis dal guvier di Pristina, par partecipâ invezit a elezions aministrativis separadis imbastidis cu la poie des autoritâts di Belgrât. L’acuardi cjatât che nol è tant dai doi paîs sot de mediazion de UE, là che ai cuatri comuns ur ven garantît un bon nivel di autonomie, nol à però rivât a mudâ la posizion de comunitât serbe dal Cossovo. Cussì ai 4 di Lui, a Zvečan, cu la partecipazion dai aministradôrs dai cuatri comuns e je stade metude sù la Assemblee provisorie dal Cossovo e de Metohija.

Paîs Catalans: tes Baleârs esams massime par catalan

L’ûs dal catalan intai esams di acès pe universitât intes Baleârs al è daûr a stabilizâsi tor dal 80%. Dal 1992, prin an là che i students a àn podût doprâ ancje il catalan, l’ûs de lenghe proprie des isulis al è simpri cressût e intal 2012 si veve tocjât l’81,1%. Chest an la cifre si è sbassade dal 0,7%, ma e conferme une presince avonde salde disore dal 80%. Plui intal specific, gjavâts i esams di lenghe che a vegnin tignûts simpri te lenghe studiade, il 35,5% dai students al à tignût i siei esams ducj par catalan, il 55,3% par catalan e par spagnûl e a pene il 9,2% dome par spagnûl.

Font: Diario de Mallorca, 03/07/13

Irlande: plans par gaelic e scots, publicadis lis rispuestis de int

La ministre pe culture, pes arts e pal timp libar de Irlande dal Nord, Carál Ní Chuilín, e à rindût publichis lis rispuestis fatis indenant dai citadins, des organizazions e des istituzions sul stampon dal plan strategjic pe lenghe gaeliche irlandese e pal scots. I doi documents a jerin tra i ponts dal program di guvier 2011 – 2015 de Irlande dal Nord cun chê di slargjâ l’ûs di chestis lenghis inte societât. Lis consultazions publichis si vevin sieradis ai 27 di Novembar cun passe 270 rispuestis/propuestis sul plan pal gaelic e pôc mancul di 140 sul plan pal scots.

Font: Gaelport, 03/07/13

Gales: no de Cymdeithas al galês come seconde lenghe

I students dal Gales a àn ducj di vê almancul un tierç dal lôr curriculum scolastic insegnât par galês. A domandâlu e je la Cymdeithas yr Iaith Gymraeg (Societât pe Lenghe Galese) che e propon une riforme dal sisteme scolastic cu la eliminazion dal studi dal galês come seconde lenghe. Cul sisteme atuâl di fat al è dificil rivâ a fâ dai progrès significatîfs, a spieghin, e cussì un tierç dai students une volte rivât a 16 agns nol rive a otignî nissune certificazion linguistiche par galês e nol è nancje stiçât a doprâ cheste lenghe fûr de scuele. La Cymdeithas e domande duncje l’ûs veicolâr dal galês par un tierç dal curriculum, un percors di formazion gnûf pai insegnants che ur permeti di jessi ducj in stât di insegnâ par galês e di slargjâ a dut il Gales il model cumò in vore intal Gwynedd pal insegnament de lenghe a chei fruts che ancjemò no le cognossin.

Font: Cymdeithas, 01/07/13