Scozie: inviade la campagne pal “sì” tal referendum su la indipendence

Il prin ministri scozês Alex Salmond (SNP) al à presentât a Edimburc la campagne “Yes Scotland” che e à chê di sburtâ i scozês a votâ a pro de indipendence de lôr nazion dal Ream Unît. La iniziative e à clamât adun une rapresentance di oms politics, de economie e de culture che a poin la indipendence scozese. Par dâi plui fuarce ae campagne si domande ai scozês di firmâ une declarazion a pro de indipendence; il prin a meti la sô firme al è stât il stes Salmond che al à lançât la sfide di un milion di firmis di tirâ sù prime dal referendum. Intant, dopo di chê inviade dal guvier britanic, si è sierade ancje la consultazion publiche sul referendum imbastide dal esecutîf scozês che al varà cumò di elaborâ i risultâts des 21 mil rispuestis rivadis (lis rispuestis ae consultazion inviade di Londre a jerin stadis 3 mil). Ancje cu la poie di chestis rispuestis i doi guviers a son cumò clamâts a confrontâsi par superâ lis divisions che ancjemò a restin su timps e mûts pal davuelziment dal referendum.

Font: BBC, 25/05/12

Austrie: programs radiofonics par sloven ancje in Stirie

In gracie dal gnûf ripetitôr di Murska Sobota cumò ancje la comunitât slovene de Stirie e podarà scoltâ lis trasmissions radiofonichis par sloven metudis adun de ORF e di Radio Agora. Daûr dai dâts uficiâi i slovens de Stirie a son sù par jù 2.200, ancje se altris stimis a calcolin che il lôr numar al sedi une vore plui alt. La comunitât slovene plui gruesse in Austrie e je però chê che e vîf in Carinzie.

Font: Novi Matajur, 23/05/12

Cossovo: scuintri jenfri FIFA e UEFA sul ricognossiment de nazionâl

Il comitât esecutîf de FIFA, organisim che al regole il mont dal balon a nivel mondiâl, al à dât il permès ai siei associâts di zuiâ partidis amichevulis cu la rapresentative dal Cossovo. Par solit chest al è l'ultin pas prime de jentrade di une rapresentative statâl inte federazion e duncje de sô partecipazion aes competizions internazionâls. La decision e à però cjatât la oposizion dure de Serbie e ancje dai vot membris de UEFA che a son inte FIFA che a àn ricuardât cemût che il regolament de federazion nol permeti la adesion plene di stâts che no son membris de ONU. La federazion serbe e à fevelât di decision "politiche" che e varà consecuencis pesantis su dute la regjon.

Romanie: riclam de FUEN su la riduzion dai dirits des minorancis

Intant dal so ultin congrès, la FUEN (Union Federâl des Nazionalitâts Europeanis), la plui impuartante organizazion di riferiment des minorancis nazionâls de Europe, e à pandût la sô preocupazion par chel che al è daûr a sucedi in Romanie. Cun di fat, il guvier rumen al veve comunicât la sô intenzion di vierzi une facoltât di medisine in lenghe ongjarese inte citât di Marosvásárhely / Târgu Mureş, une des areis là che la comunitât magjare e je plui numerose, ma po al à fat ziruc. La FUEN e domande al guvier rumen di lâ indenant cul dialic cu lis organizazions de comunitât ongjarese par evitâ che si fasin pas indaûr inte tutele des minorancis. Ogni pas indaûr intai dirits des minorancis – a disin i rapresentants de Union – al è un pas indaûr pe democrazie.

Font: DAHR, 21/05/12

Paîs Basc: gnove mobilitazion di place pai presonîrs politics

Gnovis manifestazions intal Paîs Basc par rivendicâ i dirits dai presonîrs politics. Ai 19 di Mai, in rispueste ae clamade de associazion Herrira, cuasi 30 mil personis a àn jemplât lis placis di 245 localitâts dal Paîs Basc e di altris lûcs ator pal mont par difindi i dirits dai presonîrs e par domandâ ai guviers di Madrid e di Parîs di bandonâ il lôr imobilisim su cheste cuistion. Di fat, cundut de decision di ETA di meti fin ae lote armade, il guvier spagnûl e chel francês a van dilunc a doprâ misuris di ecezion cuintri dai presonîrs bascs. Baste pensâ che, daûr di ce che e previôt la legjislazion ordenarie, une cincuantine di presonîrs a varessin di vê za finît la lôr condane e invezit e reste ancjemò in galere, intant che une altre cuindisine a patissin di malatiis une vore seriis, ma chel istès no puedin saltâ fûr di preson. Cun di plui la politiche di dispersion e oblee lis fameis dai presonîrs a fâ viaçs ancje di 2 mil chilometris al colp par lâ a cjatâju: une situazion che intai ultins agns e je stade la cause de muart di 16 personis par vie di incidents di strade.

Font: Gara, 19 - 20/05/12

Paîs Catalans: nassût il Consei di politiche linguistiche dal aranês

Al è nassût il Consei di politiche linguistiche dal ocitan aranês. Lis fondis pal svilup di cheste gnove struture a son di une bande il statût di autonomie de Catalogne, e di chê altre la leç linguistiche dal 2010 che e ricognòs, e garantìs e e promôf l’ûs dal ocitan aranês in ducj i setôrs. Lis normis che a regolin la organizazion e il funzionament dal Consei a son stadis fatis buinis intant de riunion de comission bilaterâl che e viôt adun i rapresentants dal guvier catalan e dal comun di Aran. La Val di Aran, di fat, al è l’unic toc dal teritori de comunitât autonome de Catalogne là che si fevele par ocitan.

Font: Generalitat de Catalunya, 18/05/12

Asturiis: pussibile la introduzion curicolâr dal asturian intes scuelis

No esistin impediments juridics pe creazion di cors curicolârs di lenghe asturiane e pal svilup di une plante organiche di professôrs di pueste par chest insegnament intes scuelis primariis e secondariis. E je cheste la conclusion dal rapuart metût jù di esperts dal setôr su domande dal guvier asturian. In pratiche cumò la strade che si vierç e je chê di une tratative tra l'esecutîf asturian e il guvier di Madrid par rivâ a di une riforme de leç su la educazion dulà che, dongje dai dirits ricognossûts aes lenghis couficiâls tant che basc, catalan e galizian, si zontin ancje chei des lenghis minoritariis ricognossudis des comunitâts autonomis.

Font: Agencia EFE, 18/05/12

Galizie: 25 mil in place a S. Jacum pai dirits linguistics

Ai 17 di Mai uns 25 mil personis si son dadis dongje a Sant Jacum di Galizie (Santiago de Compostela) par manifestâ a pro dal galizian e cuintri dai atacs che cheste lenghe si cjate a vê di frontâ. Baste pensâ che il stes davuelziment normâl de manifestazion al è stât metût in pericul dai pidiments e dai dineis fats indenant de aministrazion comunâl vuidade de diestre spagnoliste (PP). La iniziative, inmaneade dal coordenament Queremos Galego, e à viodût la partecipazion di rapresentants sei dai partîts nazionalitaris, che de çampe statâl (tant che PSOE e IU). I atacs plui dûrs a son lâts cuintri dal PP, che cumò al guvierne la Galizie, acusât di limitâ i dirits linguistics dai galizians.

Font: Praza Pública, 17/05/12; Nationalia, 18/05/12

Gales: consultazion sui nivei di tutele dai dirits linguistics intai ents publics

La gnove comissarie pe lenghe galese, Meri Huws, e à inviât une consultazion par tirâ sù parês e propuestis sui nivei di tutele dai dirits linguistics che i ents publics e ciertis aziendis di publiche utilitât a saran clamâts a garantî. La leç di politiche linguistiche che e à metût sù la figure dal comissari e previôt ancje une incressite dal nivel dai dirits linguistics che chescj sogjets a àn di ufrî ai citadins. Si fevele di aministrazions publichis, ospedâi, tribunâi, ma ancje di aziendis des telecomunicazions, compagniis di servizis, impresis di traspuart public e aziendis pe edilizie residenziâl.

Corsiche: propueste pal insegnament imersîf dal cors

Almancul une scuele cun insegnament imersîf dal cors par ogni dipartiment de isule. Al è ce che al domande il coletîf Parlemu Corsu che par sburtâ cheste domande e à inmaneât par sabide ai 2 di Jugn un incuintri a Savaghju cu la partecipazion di delegâts che a rivin di altris comunitâts minorizadis dal stât francês (alsazians, bascs, bretons, catalans e ocitans) dulà che si àn za esemplis di scuelis a imersion inte lenghe proprie di chei teritoris. Pal puartevôs dal coletîf, Migheli Leccia, chê di Parlemu Corsu no je une utopie, ma une propueste concrete che e judarà i fruts a saltâ fûr des logjichis dal monolinguisim.

Font: Alta Frequenza, 16/05/12

Paîs Basc: delegazion di ETA pronte pal dialic, no di Madrid e Parîs

Al è soredut un messaç indreçât aes autoritâts europeanis il comunicât fat rivâ di ETA ae agjenzie France Presse tor de metât di Mai. Cun di fat, intal test si invide lis istituzions comunitariis a poiâ il procès inviât par dâ une soluzion definitive al conflit basc. Ancjemò ai 20 di Otubar dal an passât la organizazion basche e veve anunciât la fin de lote armade, ma l’imobilisim mostrât fin cumò dai guviers spagnûl e francês nol jude a fâ pas indenant su cheste strade e al va dilunc a mantignî situazions che no àn plui nissune justificazion tant che lis misuris di ecezion cuintri dai presonîrs bascs e il dinei di ativitât legâl par diviersis organizazions politichis de çampe indipendentiste. Intal so comunicât ETA e invide ducj i sogjets politics e sociâi bascs a inviâ un dialic che al permeti di superâ lis resons dal conflit e di vierzi un senari di pâs e di libertât pal Paîs Basc. Euskadi Ta Askatasuna e fâs po savê di vê nomenât une delegazion par imbastî un dialic diret cui guviers spagnûl e francês.

Sardegne: consegnadis lis firmis par un referendum su la indipendence

“Sêstu dacuardi, daûr dal dirit internazionâl des Nazions Unidis, che il popul sart al otegni la sô libertât par mieç de indipendence?” Al è chest il test de domande che il moviment politic Malu Entu al volarès indreçâ ai citadins de isule par mieç di un referendum. 13 mil firmis cjapadis sù intai ultins mês par poiâ il referendum a son za stadis consegnadis alì de cort di apel di Casteddu / Cagliari. La Regjon autonome e à di fat la pussibilitât di davuelzi dai referendums consultîfs pûr che a vedin la poie di almancul 10 mil citadins. Cumò si varà di spietâ la rispueste in mert ae legjitimitât de domande referendarie. Diviers moviments sarts a son a pro de indipendence – di iRS a Sardigna Natzione, di A Manca pro s’Indipendentzia a ProgReS – ma no ducj a crodin che chest al sedi il moment just par proponi un referendum di cheste fate.

Font: La Nuova Sardegna, 11/05/12; Il fatto quotidiano, 12/05/12

Macedonie: protestis di place pai arescj di albanês

In Macedonie a van dilunc lis protestis di place leadis ae vicende dal sassinament di cinc macedons intun cuartîr di perifarie di Skopje. Tai dîs dopo de scuvierte dai cuarps cence vite dai cinc, grups di macedons si vevin scuintrâts cu la polizie intant che a cirivin di atacâ i cuartîrs di Skopje a maiorance albanese. Il prin di Mai a jerin stâts arestâts uns vincj albanês e cinc di lôr si vevin ricjatâts acusâts di sassinament e di terorisim. I arescj a vevin discjadenât la proteste de comunitât albanese che e acusave lis autoritâts di vê metût in preson dai inocents e di piturâ di teroriscj ducj i albanês. Altris acusis a jerin leadis al tratament che i arestâts, e massime lis feminis, a vevin vût di patî. Ai 11 di Mai la proteste e veve puartât in place cuasi 10 mil albanês, pe plui part zovins, che a vevin manifestât denant dal tribunâl e dal palaç dal guvier di Skopje. La zornade e jere stade segnade ancje di diviers episodis di vandalisim e di cualchi ferît. I manifestants a domandin ancje une comission internazionâl indipendente che e garantissi la imparzialitât de inchieste sul sassinament dai cinc macedons e des acusis motis ai arestâts. La situazion e je une vore cjalde e e riscje di tornâ a inviâ un scuintri viert tra la comunitât macedone e chê albanese, che e rapresente la plui grande minorance dal paîs.

Font: Balkan Insight, 11/05/12

Cravuazie: condane pai atacs cuintri dai rom

Il comitât parlamentâr cravuat pes minorancis al à pandût la sô condane pes declarazions di stamp razist indreçadis cuintri dai rom. Tai ultins timps i atacs cuintri dai rom a son simpri di plui e aromai no si fermin dome aes peraulis. Al è ce che al è sucedût, par esempli, a Skabrnja dulà che une famee rom e je stade obleade a lassâ lis sôs proprietâts dopo di une lungje schirie di menacis fatis indenant ancje dal sindic dal paîs che al à fat savê che a Skabrnja nol sarà mai puest ni pai serps, ni pai rom. Declarazions e compuartaments raziscj a rivin di fat ancje di rapresentants des istituzions e di cui che al varès di fâ rispietâ la leç, tant che il comandant de polizie di Osijek. E se la ministre pai forescj e à condanât cheste gnove ondade di razisim, altris rapresentants dal guvier cravuat a àn mostrât sintiments di asse o di dispresi pai rom.

Font: Balkan Insight, 10/05/12

Serbie: une disine i deputâts des minorancis intal Parlament di Belgrât

Intes elezions parlamentârs che si son davueltis in Serbie ai 6 di Mai adun cul prin turni des presidenziâls, il partît che al à cjapât plui vôts (74) al è stât chel che al poiave la candidature di Tomislav Nikolić ae presidence. Par chel che al rivuarde lis diviersis minorancis nazionâls presintis intal paîs, il risultât miôr al è stât chel de Aleance dai Ongjarês de Voivodine (VMSZ) che e à otignût cinc deputâts intal parlament di Belgrât. Il Partît di azion democratiche dal Sandžak (SdaS), che al nas dal grim de minorance bosgnache, al è elet doi dai siei rapresentants. Un sôl deputât invezit pe coalizion “Sve zajedno” (Ducj adun), che e met dongje piçui moviments bosgnacs, cravuats, ongjarês e slovacs, e un pe Coalizion dai Albanês de Valade di Preševo (KSlP / KAPd). Partîts rapresentatîfs di comunitâts minoritariis a jerin però rapresentâts ancje in cualchidune des coalizions principâls. Al è il câs de Aleance Democratiche dai Cravuats in Voivodine (DSHV), che e poiave la candidature a president di Boris Tadić e che e à otignût un deputât, e dal Partît Democratic Bosgnac dal Sandžak (BdsS), che al à aderît ae coalizion che e sostignive Čedomir Jovanović e che al à elet un parlamentâr.

Font: Serbian Government, 10/05/12; RIK, 07/05/12

Gales: tutele linguistiche scjarse tes aministrazions dal Sud

Daûr di une inchieste comissionade de Societât pe Lenghe Galese (Cymdeithas yr Iaith Gymraeg) e puartade indenant dal ex diretôr dal Ufici pe lenghe galese, Marc Phillips, al ven fûr un cuadri no masse positîf par chel che al rivuarde i servizis linguistics garantîts des aministrazions dal Gales meridionâl. Intune valutazion che e cjape dentri capacitâts linguistichis dal personâl, azions intal cjamp educatîf e nivel dai servizis linguistics ufierts a saltâ fûr miôr e je la capitâl Caerdydd / Cardiff cuntun judizi positîf pal 64%. E se nissun dai comuns esaminâts al rive ai nivei di tutele che la leç e previodarès, la situazion piês si le à intes citâts di Casnewydd / Newport e di Merthyr Tudful / Merthyr Tydfil che a rivin sì e no al 20% inte scjale di valutazion. La plui part des aministrazions e ufrìs un nivel superficiâl di servizis – a comentin i rapresentants de Cymdeithas – invezit a Caerdydd si à une strategjie clare e che si va dilunc a miorâ. Ta cheste logjiche, par esempli, plui che lavorâ su lis traduzions, ce che al covente al è incressi il lavôr fat daurman par galês.

Font: Cymdeithas ir Iaith Gymraeg, 08/05/12

Paîs Basc: vitorie di Hollande ancje in Ipar Euskal Herria

Intal secont turni des elezions presidenziâls francesis, il candidât socialist al è stât il plui votât ancje in Ipar Euskal Herria, o sei il Paîs Basc setentrionâl. E je la prime volte che intes provinciis baschis francesis (Lapurdi, Nafarroa Beherea e Zuberoa) la maiorance e vote par un candidât di çampe. Intun teritori là che, par tradizion, la çampe e à plui consens, Hollande al è rivât fintremai al 62,83% des preferencis, ma ancje in localitâts là che par solit a jerin plui fuartis lis diestris, tant che la capitâl Baiona / Bayonne, il candidât socialist al à cjapât la maiorance dai vôts (59,26%).

Font: Gara, 07/05/12

Scozie: nazionaliscj e laburiscj a vincin tes aministrativis

Lis elezions aministrativis che si son davueltis ai prins di Mai in Scozie a àn premiât sei il Partît Nazionalist Scozês (SNP) che i laburiscj. I citadins a jerin clamâts a sielzi i aministradôrs des 32 provinciis scozesis cui lôr passe 1.200 conseîrs. Par vie dal gnûf mecanisim eletorâl proporzionâl dome 9 provinciis a àn savût daurman cui che lis guviernarà, intant che par dutis chês altris, là che nissun partît al à vût une maiorance assolude, si à di spietâ che des tratativis tra i partîts a jessin des aleancis di guvier. Sul front des percentuâls di vôt e dai conseîrs elets, il risultât miôr al è chel dal SNP che al à otignût une medie dal 32,7% des preferencis e 424 elets, 57 in plui des elezions stadis.

Gales: sucès laburist tes aministrativis, nazionaliscj in dificoltât

In Gales lis elezions aministrativis dai prins di Mai a segnin il sucès dai laburiscj, che a otegnin il lôr risultât miôr dal 1996 incà. Il vôt al à interessât 21 des 22 provinciis galesis, viodût che lis elezions te Ynys Môn / isule di Anglesey, cumò intes mans di un comissari nomenât dal guvier, si davuelzaran chest an che al ven. I laburiscj a àn concuistât 576 dai cuasi 1.200 puescj di conseîr a disposizion, ven a dî 231 in plui des elezions stadis, e la maiorance assolude in 10 provinciis, che a podaran duncje guviernâ cence bisugne di cirî aleancis, e tra chestis o cjatìn ancje i trê centris principâi dal Gales dal Sud, ven a dî Abertawe / Swansea, Casnewydd / Newport e Caerdydd / Cardiff. Tra i sucès plui impuartants pai laburiscj si à propit chel otignût intal teritori de capitâl galese che prime al jere intes mans dai liberâi democratics.

Irlande: gnovis iniziativis, ma ancje gnûfs problemis pal gaelic

Il ministeri irlandês pes areis gaelichis al à comunicât la partence di gnovis iniziativis a pro dal gaelic inte suaze de strategjie pe lenghe irlandese pe dade 2010 – 2030. Si trate di dodis azions pensadis par judâ lis fameis dal Gaeltacht, o sei lis areis là che il gaelic al à ancjemò une presince significative, che a àn chê di tirâ sù i lôr fruts par irlandês. Si tacarà cuntune campagne par spiegâ i vantaçs dal cressi i fîs par gaelic che e scomençarà za a partî dai servizis pe maternitât. Si previodin po jutoris e servizis in plui pes scuelis gaelichis, pai cjamps estîfs e pai cors di formazion indreçâts ai fantats che a fevelin par irlandês. Materiâi e risorsis linguistichis a saran po metûts a disposizion par mieç di un gnûf portâl digjitâl. Cun di plui il Gaeltacht al sarà dividût in 19 areis di planificazion linguistiche in maniere di svilupâ intervents plui specifics daûr des esigjencis diviersis di ogni teritori.

Galizie: “Sermos Galiza”, gnûf mieç di informazion par galizian

Si infuartìs inmò di plui la presince di mieçs di comunicazion in lenghe galiziane. Finide la dade là che i gjornâi ta cheste lenghe si vevin cjatâts a sierâ un daûr di chel altri, cumò la tindince e je cambiade e, dopo de nassite di Praza Pública e Dioivo, al rive ancje Sermos Galiza, un gnûf mieç di informazion digjitâl par galizian che, a tacâ dai 17 di Mai, al jes ancje intes ediculis sot forme di setemanâl. Chest progjet al à podût inviâsi in gracie de poie di 900 azioniscj e si svilupe cul lavôr di cinc gjornaliscj. Si calcole che par dâi stabilitât e continuitât si varà di rivâ ai 3 mil abonâts. Dopo dal formât digjitâl e di chel su cjarte, il prossim pas in program al è chel di imbastî une radio.

Font: El Pais, 25/04/12

Aragon: associazions in cjamp in difese dal catalan

Lis associazions culturâls de cussì clamade Franja (la fasse orientâl dal Aragon là che si fevele par catalan) a domandin che a sedin garantîts i struments pe difese e pe promozion de lenghe catalane e di chê aragonese. Prin di dut a domandin un ricognossiment istituzionâl e un intervent che al rindi curicolâr l'insegnament di chestis lenghis intes scuelis dai teritoris là che a son dopradis. Pes associazions de Franja al covente po che il guvier dal Aragon al svilupi une azion informative che e rindi cussients i citadins de impuartance e dal valôr di chestis lenghis.

Font: ABC, 24/04/12

Paîs Catalans: a cressin i spetatôrs dal cine par catalan

Intal ultin an i spetatôrs dal cine dopleât par catalan si son cuasi cuintuplicâts. Cun di fat, se tra l’Otubar dal 2010 e l’Avrîl dal 2011 a jerin stadis 61 mil lis personis che a jerin ladis al cine a viodi films par catalan, tra l’Otubar dal 2011 e l’Avrîl dal 2012 la cifre e jere cressude fin a tocjâ i 283 mil spetatôrs. Chest aument al è leât ae incressite de ufierte di films dopleâts par catalan intes salis cinematografichis, massime in gracie dal acuardi sotscrit tra il guvier catalan e lis cjasis produtoris plui impuartantis. Pal assessôr pe culture, Ferran Mascarell, chest al dimostre che cuant che la ufierte e je buine il marcjât pai films par catalan al è.

Font: Europa Press, 20/04/12