27/12/07

Zonte 03 07 (27/12/07)

Paîs Basc: 47 condanâts tal procès farse 18/98

Ai 19 di Dicembar, pôc prime di misdì, e je stade dade leture de sentence dal cussì clamât “macrosumario 18/98”, ven a dî il procediment judiziari plui grues che al à colpît il Paîs Basc daspò de fin dal franchisim. La sentence e je stade cjapade de Audiencia Nacional, l’orghin judiziari che al à cjapât il puest dal tribunâl pal ordin public franchist, sot de presidence di Ángela Murillo. Il tribunâl speciâl spagnûl al à condanât 47 dai 52 imputâts a di un totâl di 525 agns di preson e a multis di divierse misure. I condanâts a son membris di prin plan de societât civîl basche impegnâts inte difese dai dirits nazionâi di Euskal Herria (il Paîs Basc). Si trate di militants e lavoradôrs des associazions KAS, Ekin, Xaki (associazion nassude cun chê di fâ cognossi a nivel internazionâl la situazion basche e di puartâ solidarietât a chei altris popui tibiâts dal mont), de Fondazion Joxemi Zumalabe (nassude par dâ une man ai moviments sociâi di Euskal Herria), de societât Orain (cjase editore dal cuotidian Egin), e di altris realtâts associativis e economichis baschis. Cuintri di lôr la acuse e je di jessi membris o colaboradôrs de organizazion armade basche ETA. Te sentence si pues lei che “ni KAS, ni Ekin, ni Xaki a son une organizazion armade; no àn armis, parcè che il doprâlis nol è compit lôr ma dal braç armât di ETA, dut câs chestis realtâts a cjapin part ad in plen de unitât organizative e struturâl de organizazion teroriste ETA”. Par ducj i imputâts che a partegnin a chestis organizazions, duncje, a son stadis dadis penis che a van di 11 a 14 agns di preson dure. De Fondazion Zumalabe no si dîs che e je part di ETA, ma che i siei membris “a àn colaborât ae ativitât de organizazion teroriste ETA cun chê di stiçâ la disubidience civîl”. Par lôr lis penis a son ladis di 9 a 10 agns di preson. Pai dipendents de societât Orain e dal gjornâl Egin, si àn vudis situazions diferentis: José Luis Elkoro, par esempli, al è stât considerât membri dal “front negoziadôr” di ETA; di Xabier Salutregi si à dite che al jere deventât diretôr di Egin daspò di une audizion cu la dirigjence di ETA. La Audiencia Nacional e à ancje decidût di scancelâ e licuidâ il patrimoni des societâts Orain, Ardatza, Hernani Imprimategia, Publicidad Lema 2000, Erigane, MC Uralde, Untzorri Bidaiak Ganeko, Grupo Ugao, Gadusmar, e des associazions KAS, Ekin e Xaki. La sentence no si à poiade su provis reâls, come che a àn denunciât diviers osservadôrs internazionâi, si ben su declarazions e deduzions di membris des fuarcis di polizie cence nuie altri a tignîlis sù. No par nuie, par sostignî une afermazion, si fâs ûs dispès de frase “sentido común”, ven a dî “opinion comune”. Une sentence poiade duncje sul pinsîr unic de polizie, cence provis veris e cence tignî in nissune considerazion il lavôr de difese che e à smontât pas a pas lis tesis de acuse. Al moment de leture de sentence i imputâts a àn rispuindût cuntun “Gora Euskal Herria askatuta!” (vive il Paîs Basc libar) e cjantant l'imni “Eusko Gudariak”. La sentence e je stade contestade cun fuarce de plui part de societât basche (partîts politics, sindacâts, mieçs di comunicazion, associazions, citadins) che le judiche dome une sentence politiche cence nissune fonde juridiche. Come che a àn spiegât ben doi esperts che a cognossin une vore in sot la cuestion, Iñaki Egaña e Giovanni Giacopuzzi, cheste teorie puartade indenant cul procès 18/98 che “dut ce che al lavore pe autodeterminazion di Euskal Herria al è ETA” e je fûr de storie, parcè che “e dinee, prin di dut, che e esisti une forme divierse di fâ politiche che e puedi confrontâsi al pâr cun chês che a paronin inte nestre societât.” Propit par chest – a disin – e je stade condanade. Ancje se par fâlu, si è lât fûr e cuintri de leç che in teorie si varès vût di difindi.
[Font: Gara, 19-20-21/12/2007]


18/12/07

Pontade 03 08 (18/12/07) - 9

Galizie, Paîs Basc, Paîs Catalans: front comun pe promozion culturâl

Ai 10 di Dicembar i rapresentants plui alts de politiche culturâl de Galizie, de Comunitât Autonome Basche e de Catalogne a àn sotscrit un pat par promovi in maniere unitarie lis produzions culturâls des trê comunitâts. Il document al è stât batiât la “Declarazion di Compostela”, par vie che e je stade firmade a Sant Jacum di Galizie, o sei Santiago de Compostela. A sotscrivi la declarazion a son stâts i assessôrs pe culture des trê comunitâts, ven a dî Ánxela Bugallo pe Galizie, Miren Azkarate pe Comunitât Autonome Basche e Joan Manuel Tresserras pe Catalogne. La colaborazion e i scambis tal cjamp culturâl tra lis trê comunitâts e jere bielzà in vore di timp, ma cun chest pat si vûl fâ un pas indenant e, in plui di incressi i rapuarts za in at, si metarà adun une programazion unitarie par promovi intune la culture galiziane, chê basche e chê catalane, massime sui marcjâts forescj.
[Font: Galiza Hoze: 10/12/2007]


Pontade 03 08 (18/12/07) - 8

Paîs Basc: la ilegalizazion di Batasuna denant de Cort Europeane pai Dirits Umans

La gnove e zirade bielzà di cualchi zornade, ma ai 13 di Dicembar e je rivade la conferme uficiâl. Cun di fat, ta chê zornade, la Cort Europeane pai Dirits Umans e à informât il Guvier spagnûl di vê fat bon il ricors presentât dal partît de çampe indipendentiste basche, Batasuna, cuintri de sô ilegalizazion. Il moviment nazionalitari basc al veve domandât ae Cort di esprimisi su la violazion dal dirit ae libertât di espression (art. 10), di associazion (art. 11) e di presentâ ricors (art. 13), ricognossûts de Convenzion europeane sui dirits umans. Il tribunâl european al à fat buinis lis primis dôs domandis, ma e à decidût di no esaminâ l’ultin pont, ven a dî chel sul dinei a ricori cuintri de ilegalizazion che al sarès stât metût in at des autoritâts judiziariis spagnolis. Adun cun chel di Batasuna, la Cort Europeane e à fat bogns ancje i ricors di dôs listis e di trê candidâts bascs che ur jere stât impedît di presentâsi intes elezions dal 2003 e dal 2004. Cumò, par che il tribunâl di Strasburc si esprimi, si varà di spietâ cualchi mês. Dut câs, za il fat che a sedin stâts acetâts chescj ricors al met sot acuse lis autoritâts spagnolis par vê metût fûr leç Batasuna e altris sogjets politics bascs. Baste pensâ che la Cort Europeane e acete a pene l’un e mieç par cent des domandis che i vegnin presentadis.
[Font: Galiza Hoxe, 10/12/2007; Gara, 13/12/2007]


Pontade 03 08 (18/12/07) - 7

Paîs Basc: indenant cu la repression e cu la mobilitazion popolâr

Restìn inmò a fevelâ dal Paîs Basc. Un dai procediments judiziaris plui grues e plui innomenâts inviâts cuintri dal panorame nazionalitari basc al è il cussì clamât “macrosumario 18/98” che, tai ultins agns, al à colpît gjornâi, associazions, grups e personis di ogni sorte che a àn come unic element in comun chel di jessi impegnâts inte difese dai dirits nazionâi e linguistics dal popul basc. La acuse e je simpri la stesse, ven a dî che di jessi “organics” a ETA, ancje se no si àn provis reâls di leams tra i imputâts e la organizazion armade basche. Si trate di une vicende che e je deventade aromai la testemoneance plui penze de repression inviade cuintri dal moviment nazionalitari basc e, magari cussì no, e va dilunc a zontâ cjapitui gnûfs. L’ultin, si riferìs a di une gnove operazion di polizie, inviade ai 30 di Novembar, che e à puartât al impresonament di une cincuantine di imputâts de inchieste 18/98. Ancjemò une volte, la operazion e je stade compagnade di iregolaritâts e violazions de procedure judiziarie, baste pensâ, par esempli, che i avocats de difese a àn podût viodi la ordenance di arest dome daspò di trê dîs e mieç che i arescj a jerin scomençâts. Par denunciâ cheste gnove azion repressive, domenie ai 2 di Dicembar, e je stade inmaneade a Bilbo / Bilbao une manifestazion di proteste che e à clamât dongje passe 25 mil personis. Une cifre pardabon grande se si pense che la iniziative e je stade imbastide in mancul di doi dîs e a front di une clime pesante di intimidazion. Simpri par protestâ cuintri dal impresonament massîf leât ae inchieste 18/98, ai 13 di Dicembar si è davuelte une ore di siopar dai lavoradôrs che in diviersis localitâts baschis, tant che Usurbil, Andoain, e Goizueta, a àn puartât a un bloc totâl o cuasi des ativitâts. Intant dal siopar miârs di personis si son dadis dongje tes citâts baschis plui gruessis par manifestâ cuintri dai arescj.
[Font: Gara, 03-04-13/12/2007]


Pontade 03 08 (18/12/07) - 6

Corsiche: il tribunâl speciâl francês al condane Yvan Colonna

Il tribunâl speciâl francês al à condanât ae preson a vite il militant indipendentist cors Yvan Colonna cu la acuse di vê sassinât intal 1998 il prefet de Corsiche, Claude Érignac. Colonna al va dilunc a declarâsi inocent e i siei avocats a àn fat savê che a presentaran domande di apel. Il procès al jere scomençât ai 12 di Novembar, cuatri agns plui tart dal arest di Colonna. La sentence e je stade decidude dai siet judiçs che a formin il tribunâl speciâl, metût sù di pueste par reâts considerâts di stamp terorist e cence jurie popolâr. Il procès e la condane a mostrin diviers ponts scûrs, cun di fat a mancjin provis materiâls cuintri di Colonna, nissun dai testemonis dal sassinament lu al à ricognossût e ancje lis confessions otignudis di altris militants che a varessin partecipât al atac a son stadis ritiradis dai lôr autôrs che a denunciin di jessi stâts sburtâts a acusâ Colonna. Ancje par chestis resons, la vicende e je daûr a fâ di Colonna un simbul pal indipendentisim cors.
[Font: Libération, 13/12/2007; VilaWeb, 14/12/2007]


Pontade 03 08 (18/12/07) - 5

Paîs Catalans: il guvier valenzian al bloche i ripetitôrs de TV3

Vie pe gnot dai 9 di Dicembar il guvier valenzian al à blocât la ativitât dal ripetitôr de Carrasqueta che al trasmet il segnâl de emitente in lenghe catalane TV3 suntune part dal Paîs Valenzian. La organizazion Acció Cultural del País Valencià, che e veve metût sù l’implant, e considere l’at un “atac antidemocratic cuintri de libertât di espression e dal dirit ae pluralitât informative dai valenzians”. Cuintri de sierade dal ripetitôr a àn cjapât posizion ancje il Guvier catalan, e diviers partîts valenzians tant che il Bloc, Esquerra Unida e Esquerra Republicana. I prins doi partîts, dut câs, a àn ancje lamentât il compuartament de Gjeneralitât de Catalogne che e leve dilunc a sigurâ che no jerin problemis intes tratativis cul Guvier valenzian par compensâ la presince de TV3 intal Paîs Valenzian cun chê di Canal 9 in Catalogne. In ogni câs, ducj a àn dite che si trate di une azion pre eletorâl imbastide dal PP che al è cumò al guvier tal Paîs Valenzian. Al è zaromai di agns che il PP valenzian al puarte indenant une politiche anticatalane che si fonde prin di dut suntune azion di separazion des varietâts linguistichis catalanis che si fevelin intal Paîs Valenzian rispiet al catalan. Une azion che e cîr di dineâ la partignince dal so teritori ai Paîs Catalans là che, in plui dal Principât de Catalogne e dal Paîs Valenzian, a son dentri lis Isulis Baleârs, la Franja di Ponent che e je intal Aragon, la Catalogne Nord che e je intal stât francês, e la citât dal Alguer in Sardegne.
[Font: VilaWeb, 10/12/2007; Mon Divers, 11/12/2007]


Pontade 03 08 (18/12/07) - 4

Ladinie: imprescj informatics gnûfs pal ladin

Al è dai agns ’90 che inte Ladinie dolomitane si à tacât a lavorâ sui imprescj linguistics informatics pal ladin, sei intes sôs varietâts locâls, sei inte sô forme standard. Di cheste ativitât, inviade dal Istitut Cutural Ladin, si à svilupât il progjet TALL, o sei “Tratament Automatich del Lengaz Ladin”, che al è stât presentât ai 2 di Dicembar intant de assemblee gjenerâl dal istitût. TALL al met adun une part di corezion ortografiche, une di bancje dâts lessicâl e un motôr di ricercje terminologjic. Dentri o cjatìn duncje COLD, il coretôr ortografic gnûf che, in plui dal ladin standard, al permet di scrivi in maniere corete ancje il fassan, il badiot e il gardenês. Dentri di TALL al è ancje CORPUS LAD, ven a dî une bancje dâts che e ten dentri un grant numar di tescj par standard, fassan, badiot, gardenês, ampeçan e che, vie pal 2008, e cjaparà sù ancje i tescj fodoms. In fin, al è BLAD, un motôr di ricercje terminologjiche che al met adun i dizionaris des diviersis varietâts ladinis des Dolomitis cu lis racueltis lessicografichis metudis adun inte suaze dal progjet SPELL.
[Font: La Usc di Ladins, 01-08/12/2007]


Pontade 03 08 (18/12/07) - 3

Paîs Catalans: centenârs di miârs di citadins in place pal autoguvier

La manifestazion clamade dongje de Plataforma pel Dret de Decidir a Barcelone il prin di Dicembar par domandâ che la Catalogne e puedi decidi par so cont in materie di traspuarts e à vût une partecipazion grandonone. Pai organizadôrs a son stâts plui di 700 mil i citadins che a àn rispuindût al apel, invezit, pes fonts di polizie i manifestants a jerin sui 200 mil. In ogni câs, e je une des manifestazions plui grandis che si à vût a Barcelone di agnorums, cun int che e jere inmò che e spietave di podê partî dôs oris daspò che il cjâf dal corteu si veve mot. Ae iniziative a vevin dât la lôr poie ducj i partîts principâi dal panorame nazionalist e nazionalitari catalan e delegazions a son rivadis ancje dal Paîs Valenzian e des Baleârs. La manifestazion e je deventade une gnove ocasion par domandâ che la Catalogne e puedi decidi in plene libertât cemût organizâsi e guviernâsi. Simpri sul dirit di decidi di bessôi al è stât presentât ancje un manifest sotscrit di une sessantine tra sindics e aministradôrs dai Comuns de Catalogne.
[Font: VilaWeb, 01-03-04/12/2007; Avui, 01/12/2007]


Pontade 03 08 (18/12/07) - 2

Romanie: trê ongjarês elets tal Parlament european

A son trê i membris de minorance ongjarese in Romanie che a son stâts elets intal Parlament european intant des elezions che si son davueltis ai 27 di Novembar. Doi di lôr, Gyorgy Frunda e Csaba Sogor, a partegnin al moviment di riferiment de minorance ongjarese de Transilvanie, ven a dî la Union Democratiche dai Ongjarês de Romanie, che tes elezions e à cjapât il 5,52% des preferencis. Il tierç, invezit, al è il candidât indipendent László Tokés, che al à cjapât il 3,44% dai vôts e al à passât cussì il bloc al 2,83% fissât de leç eletorâl rumene pai candidâts indipendents. La rapresentance ongjarese tal Parlament di Strasburc e reste, duncje, compagne come numars, me e mude come composizion. Cun di fat, prime i trê deputâts a jerin ducj de Union Democratiche dai Ongjarês de Romanie. Il sucès di Tokés e il fat che in diviersis circoscrizions al vedi cjapât plui vôts che no i candidâts de Union, al à dât une scjassade no di pôc dentri dal moviment e al à puartât aes dimissions di plui di un dirigjent dal partît. La elezion di Tokés e je rivade ancje in gracie de poie di ciertis organizazions, tant che il Consei Nazionâl de Contee Szeckler, che no condividin ad in plen lis posizions de Union e che a domandin plui autonomie pes trê conteis che a formin la regjon storiche Szeckler. Si trate di une aree là che i ongjarês a marchin une cierte autonomie storiche e culturâl rispiet a chei altris membris de minorance ongjarese in Transilvanie.
[Font: Mon Divers, 28/11/2007; divers.ro, 03-13/12/2007]


Pontade 03 08 (18/12/07) - 1

Galizie: iniziativis gnovis pe lenghe galiziane

La organizazion galiziane A Mesa pola Normalización Lingüística e à metût sù une linie telefoniche e une direzion di pueste eletroniche di pueste pes denunciis o lis segnalazions leadis ae violazion o ae limitazion dai dirits linguistics intai uficis publics e intes aziendis. A Mesa e cjapade bielzà segnalazions di cheste fate, ma cumò e spere che cun chest servizi di pueste si rivi a vê un cuadri plui precîs de situazion dai dirits linguistics dai galizians.
Intant, la Segretarie gjenerâl de politiche linguistiche de Galizie e à imbastît une gnove iniziative par infuartî il galizian intal setôr imprenditoriâl. In Galizie a son passe 400 lis aziendis che a produsin e a vendin vin. Tal 2003 dome un pâr di lôr a vevin etichetis par galizian, in dì di vuê a ‘nd è 115, ma il Guvier autonomic al vûl incressi inmò di plui cheste cifre. Par chest, sot Nadâl, e sarà inviade une campagne sui mieçs di comunicazion che e varà tant che sproc “Deixa que o viño fale. Escolle un viño etiquetado en galego” (Lasse che il vin al feveli. Vierç un vin etichetât par galizian). Si vûl cussì premiâ chei produtôrs che a àn sielzût di promovi il lôr vin inte lenghe proprie dal paîs. Il progjet, a fasin savê dai uficis dal Guvier galizian, al è chel di slargjâ po chest stamp di intervent ancje in altris cjamps produtîfs.
[Font: Galiza Hoxe: 26/11/2007]


19/11/07

Pontade 02 08 (20/11/07) - 8

Paîs Basc: passe 2 mil jessudis par Enbata

Ta chestis setemanis al è jessût il numar 2000 dal setemanâl basc Enbata. Si trate di un risultât no di pôc par cheste publicazion che, par ducj chescj agns, e je stade un pont di riferiment impuartant par dut il panorame abertzale, o sei patriotic, di Iparralde, ven a dî il Paîs Basc setentrionâl che, dal pont di viste aministratîf, si cjate sot dal stât francês. Il prin numar de riviste al jere jessût vie pal Otubar dal 1960. In chê volte, il gjornâl al jere nassût tant che vôs dal moviment politic basc Enbata, che al rapresentave une vere scjassade intal panorame politic e sociâl di Iparralde, che par agns al jere stât considerât dome la perifarie dal Paîs Basc meridionâl (chel sot de dominazion spagnole): une sorte di fradi piçul che al veve di lâ daûr dal fradi grant che al jere par di là dal confin di stât. Cheste voie di scjassâ la situazion e jere clare bielzà dal non, cun di fat “enbata”, in lenghe basche, al è l’aiar fuart che al anticipe la burascje. Cuant che, ai 30 di Zenâr dal 1974, il moviment politic al ven sierât par ordin dal president francês Pompidou cu la acuse di menaçâ la integritât dal stât, ancje la riviste si ferme. Dut câs, tal zîr di un an, il setemanâl al torne a saltâ fûr, cuntun tai gnûf, no plui leât a di un grup politic specific, ma vôs de pluralitât dal moviment abertzale e osservatôr atent di ce che al sucêt intal Paîs Basc, massime in Iparralde.
(Font: Enbata, 25/10/2007)


Pontade 02 08 (20/11/07) - 7

Paîs Basc: te CAB maiorance a pro de consultazion proponude di Ibarretxe

Inte Comunitât Autonome Basche, la maiorance dai citadins e sarès a pro de consultazion che il president dal guvier autonomic, Juan José Ibarretxe, al vûl imbastî ai 25 di Otubar dal 2008 in mert al statût politic e aministratîf che la Comunitât e vûl dâsi. Cun di fat, daûr di un studi comissionât dal guvier de CAB, il 59% dai citadins al è dacuardi che si ledi al referendum ancje se il guvier spagnûl lu proibìs. Il 65% des personis e declare che dal sigûr e larès a votâ. La maiorance e je ancje dacuardi tal dî che la consultazion si à di fâ ancje se ETA no proclame une gnove tregue. I plui cjalts a pro de iniziative a son i intervistâts jenfri i 18 e i 29 agns.
(Font: Mon Divers, 24/10/2007)


Pontade 02 08 (20/11/07) - 6

Bretagne: campagne de UDB pe riunificazion dal paîs

Chel di tornâ a meti adun tune uniche realtât aministrative la Bretagne, e je une des bataiis storichis dal nazionalisim breton. Tal 1941, par vie di un decret di Pétain, il dipartiment de Loire-Atlantique, che al à par capitâl la citât di Naoned / Nantes, al è stât distacât de regjon aministrative de Bretagne e metût sot di chê dal Pays de la Loire. Si trate di une crevadure che no je mai stade acetade dai bretons: une inchieste fate che al è pôc e mostre che il 70% dai abitants de Loire-Atlantique a son a pro de riunificazion. Ta chescj ultins agns, cun di plui, sei l’esecutîf dal dipartiment, sei il Consei regjonâl de Bretagne a àn votât documents che a domandin di tornâ a meti adun ducj i dipartiments storics bretons. Ta chestis zornadis, la Union Democratique Bretonne (Union Democratiche Bretone) e à inviât une campagne publicitarie a pro de riunificazion. Il sproc de campagne, che si lu lei su ducj i manifescj picjâts ator pal paîs, al è “Cuatri regjons fuartis invezit di sîs regjons debulis”. Cun di fat, il progjet al è chel di meti man ai confins aministratîfs di dute la aree e di tornâ a meti adun, in plui de Bretagne, ancje la Normandie, il Paîs de Loire, e la regjon de Vandee, dal Poitou e de Charente. Pe UDB si trate di dî a clâr che lis robis a puedin cambiâ e che la unitât aministrative de Bretagne no je un tabù.
(Font: European Free Alliance, 12/11/2007)


Pontade 02 08 (20/11/07) - 5

Bretagne: cun Redadeg e nas une corse pe lenghe bretone

In Bretagne si è daûr a lavorâ par meti sù la prime edizion de Redadeg, ven a dî une corse che e scjavaçarà dut il paîs cun chê di promovi l’ûs de lenghe bretone e di tirâ sù bêçs par finanziâ lis Diwan, o sei lis scuelis bretonis a imersion. Il progjet al è ispirât ae Korrika basche, manifestazion inviade inmò tal 1980, che si davuelç ogni doi agns corint par dîs zornadis ator pal Paîs Basc, e che e jere stade cjapade di model ancje de Correllengua catalane. La edizion bretone e partirà ai 30 di Avrîl de citât di Naoned / Nantes e e larà indenant par trê dîs e par trê gnots traviersant diviersis localitâts de Bretagne par un totâl di sù par jù 600 chilometris. L’obietîf al è chel di tirâ sù 60 mil euros - tra sponsorizazions, ufiertis dai partecipants e materiâl vendût - par finanziâ lis scuelis Diwan che si cjatin intune situazion economiche dificile. Cun di fat, il progjet dal ministri Jack Lang di finanziâ chestis scuelis cun fonts statâi, al è fer di agns par vie de azion cumbinade dal Consei di Stât e dai sindacâts francês di categorie. In dì di vuê, viodude la dificoltât di mantignî in vore chestis scuelis, a son dome 12 mil i fruts che a puedin gjoldi dal insegnament bilengâl, a front di 210 mil personis che si stime che a sepin fevelâ par breton. Cun numars di cheste fate la lenghe e riscje di lâ al mancul.
(Font: Eurolang, 14/11/2007)


Pontade 02 08 (20/11/07) - 4

Paîs Catalans: sît informatîf multimediâl pe RiT di Andorra

Cun Novembar al sarà plui facil viodi ce che al sucêt intal piçul Principât di Andorra. La Radio Television dal stât pirenaic, di fat, e à rignuvît il so sît e, in plui dai tescj des gnovis, e à metût a disposizion lis informazions su la atualitât ancje in formât audio e video. Cu la nassite dal portâl informatius.ad si slargje cussì il panorame informatîf in lenghe catalane.
(Font: Mon Divers, 14/11/2007)


Pontade 02 08 (20/11/07) - 3

Gales: S4C e à finît 25 agns

La television in lenghe galese S4C e à fat fieste ta chestis setemanis pai siei 25 agns di vite. Lis sôs trasmissions a jerin tacadis il prin di Novembar dal 1982 daspò di une grande campagne popolâr che e veve obleât il guvier conservadôr de Thatcher a dâ ai galês une television inte lôr lenghe proprie. Une campagne inviade inmò vie pai agns ’60, ma che e veve cjapât fuarce massime tor de fin dai agns ’70 sot de direzion de Cymdeithas yr Iaith Gymraeg (Societât pe lenghe galese). Par sostignî che bataie, centenârs e centenârs di galês a jerin finîts sot procès par vê partecipât ae ocupazion di studis televisîfs e di implants di trasmission, e par vê pidimentât o boicotât i canâi televisîfs inglês. Ta chescj agns S4C e à dât une grande man par incressi l’ûs dal galês, i siei programs plui di sucès a rivin ancje a 100 mil spetadôrs e doi dai films produsûts di cheste emitente a son stâts segnalâts tant che miôr film forest ai Oscars hollywoodians. Cumò, dut câs, la atenzion e je pontade su cemût movisi intai prossims agns framieç dai efiets causâts al mont de television de rivoluzion satelitâr e digjitâl.
(Font: Eurolang, 08/11/2007)


Pontade 02 08 (20/11/07) - 2

Frisie: sezion di Omrop Fryslân su YouTube

La emitente frisone Omrop Fryslân e à inviât un so canâl di pueste su YouTube, il sisteme doprât di miârs e miârs di personis ator pal mont par meti sù in rêt dai videos curts e che si calcole che al vedi vincj milions di visitadôrs par mês. Si trate dome di une cerce in curt dai programs di informazion, sportîfs o culturâi produsûts di Omrop Fryslân, dal moment che la plui part des trasmissions si pues bielzà cjatâle sul so sît ( www.omropfryslan.nl ). La idee e je chê di rivâ al public plui larc pussibil – al à spiegât il diretôr de emitente frisone, Hans Snijder, ae agjenzie di stampe Eurolang – po, se ae int i plâs, e vignarà a viodi il rest sul nestri sît. Su YouTube, dongje de sezion di Omrop Fryslân ( www.youtube.com/omropfryslan ), e je daûr a jessi imbastide une sezion par videoclips frisons su www.youtube.com/klipkar e une pai tocs sunâts dal vîf dai grups musicâi frisons su www.youtube.com/noardewyn .
(Font: Eurolang, 07/11/2007)


Pontade 02 08 (20/11/07) - 1

Frisie: conference internazionâl sul multilinguisim

Dai 21 ai 23 di Novembar, inte citât frisone di Ljouwert / Leeuwarden, si davuelç la conference internazionâl sul “avignî des politichis europeanis pal multilinguisim e l’aprendiment des lenghis” metude adun dal centri Mercator. E sarà la ocasion par discuti des politichis linguistichis pal svilup des lenghis minoritariis europeanis, massime par chel che al rivuarde lis strategjiis par insegnâ e imparâ lis lenghis. Pe ocasion, in Frisie, e sarà ancje une rapresentance furlane.
(Font: Adum, circolâr 2007)

05/10/07

Zonte 02 07 freebatasuna


Paîs Basc: impresonade la dirigjence di Batasuna
Vie pe gnot dai 4 di Otubar la polizie spagnole e è arestât la dirigjence dal moviment indipendentist basc Batasuna intune operazion che si è davuelte tra Olaberria e Segura (che e je stade dal dut isolade intant de azion di polizie). Lis personis impresonadis a son: Rufi Etxeberria, Joseba Permach, Mikel Zubimendi, Imanol Iparragirre, Xabier Albisu, Egoitz Apaolaza, Iban Berasategi, Angel Elkano, Juan Joxe Petrikorena, Marisa Alejandro, Aner Petralanda, Ana Lizarralde, Joana Regueiro, Ibon Arbulu, Patxi Urrutia, Jon Garai, Juan Cruz Aldasoro, Arantxa Santesteban, Asier Arraiz, Maite Diaz de Heredia, Maite Fernandez de la Bastida, Haizpea Abrisketa, e Jean-Claude Agerre. Chest impresonament massîf si zonte ai arescj di diviers rapresentants di prin plan dal moviment de çampe indipendentiste basche che si vevin vût ta chescj mês, a tacâ di chel dal puartevôs di Batasuna, Arnaldo Otegi, par rivâ a chei metûts in vore tes ultimis zornadis come tal câs di Joseba Alvarez (membri dal diretîf di Batasuna), Oihana Agirre (une des dirigjentis de organizazion Askatasuna), e Asier Tapia (un dai referents dal setôr zovanîl dal moviment indipendentist basc). L’unic dirigjent di Batasuna che nol è stât arestât intant de operazion di polizie al è Pernardo Barrena, che si cjatave a Iruñea / Pamplona par altris impegns politics. Simpri te serade dai 4, lis fuarcis di polizie a àn blocât ancje l’acès ae sede di Donostia dal partît indipendentist EHAK par une percuisizion. Daûr de operazion al è un ordin dal judiç Baltasar Garzón, ma za tes zornadis stadis la stampe spagnole e veve riferît la intenzion dal guvier di Madrid di inviâ une gnove azion repressive cuintri dal moviment de çampe indipendentiste basche. Come a dî che il mandant vêr par chescj arescj al è rivât dret dal guvier spagnûl vuidât dal prin ministri socialist José Luis Rodríguez Zapatero.
Cheste – e je la vôs compate che si jeve de çampe nazionalitarie basche – e je une declarazion di vuere al progjet indipendentist. Pal segretari gjenerâl dal sindacât nazionalitari LAB, Rafa Díez, si trate di operazions judiziariis dal dut arbitrariis che il lôr fin unic al è chel di criminalizâ e perseguitâ l’indipendentisim basc. Il sindacât al à clamât dongje par joibe che e ven une zornade di proteste. La presidente di Eusko Alkartasuna, Begoña Errazti, e à condanât cun fuarce cheste operazion che – e à zontât – e puarte indenant la stesse politiche di criminalizazion des ideis puartade indenant sot dal guvier Aznar. Il moviment nazionalitari Aralar al à fevelât di barbarie politiche e judiziarie, al à domandât la liberazion di ducj i arestâts e al à dite che une democrazie vere no criminalize lis ideis. Une condane dai arescj e je rivade ancje dal assessôr pe justizie de Comunitât Autonome Basche, Joseba Azkarraga, che al à fevelât ancje di operazion cun finalitât eletoralistiche. Un judizi negatîf su la operazion al è stât dât ancje dai dirigjents di Ezker Batua (la sezion basche di Izquierda Unida). Plui clipe la prime reazion dai rapresentants dal PNV.
Par denunciâ cheste operazion e par domandâ la liberazion dai arestâts si à inviade daurman ancje une campagne su internet inviade dal blog
www.free-batasuna.blogspot.com . Il manifest de iniziative al è curt e sempliç:
Denant dal arest di une vincjine di rapresentants de çampe indipendentiste basche, o vin inviât une campagne di denuncie. Se tu sês dacuardi cul manifest, dati dongje ancje tu. Baste meti un post tal to blog, tai messaçs istantaniis, te pueste eletroniche, su Myspace, su Fotolog, o v.i. cu la peraule freebatasuna.
Manifest: Par une soluzion democratiche, lis peraulis a son di masse: freebatasuna .
(Font: Gara, 05/10/07)

04/10/07

Zonte 01 07 (04/10/07) - 07

Paîs Basc: indenant la repression cuintri dal moviment nazionalitari

Tal daspomisdì di martars ai 2 di Otubar lis fuarcis di polizie spagnolis a àn arestât a Donostia Joseba Alvarez (mahaikide, o sei membri dal diretîf di Batasuna, e responsabil dal partît pai rapuarts cul forest) e Oihana Agirre (une des referentis principâls de organizazion Askatasuna che si bat pai dirits dai presonîrs politics bascs). Il lôr arest al è rivât su mandât dal judiç Baltasar Garzón cu la acuse di “reiterazion di ativitât criminâl” par vie che a vevin partecipât, adun cun centenârs di altris personis, ae manifestazion che si veve davuelte ai 9 di Setembar stâts a Donostia par domandâ il rispiet dai dirits dai presonîrs politics bascs. Intant de manifestazion, che e jere stade dispierdude de polizie cun cjariis che a vevin causâts disinis di ferîts, al jere za stât arestât un altri rapresentant dal moviment indipendentist basc, Juan Mari Olano. Simpri ai 2 di Otubar, la polizie francese e à arestât in Iparralde (Paîs Basc setentrionâl), su mandât des autoritâts judiziaris spagnolis, Asier Tapia, un dai referents dai moviments zovanîi che si batin pe indipendence dal Paîs Basc. Joseba Permach, un dai pôcs dirigjents di Batasuna, inmò in libertât al à declarât che il guvier spagnûl, acusât di jessi daûr di chescj arescj, al fale se al pense di fermâ cu la repression la ativitât de çampe indipendentiste basche. Il PSOE e il prin ministri spagnûl, José Luis Rodríguez Zapatero, – al à zontât Permach – a san rispuindi ae domande di autodeterminazion che e rive dal Paîs Basc dome cu la cubie “Costituzion (tal sens che no si acete di discuti nissune opzion no scrite su la Costituzion spagnole) e repression”. L’arest di Joseba Alvarez al è stâts compagnât di incidents violents tra la polizie e i abitants dal cuartîr vieri di Donostia che a cirivin di impedî l’arest dal mahaikide di Batasuna.

Intant e je daûr a rivâ a 10 mil adesions l'apel in rêt cuintri dal impresonament dal puartevôs di Batasuna Arnaldo Otegi. Par aderî si pues lâ sul sît: www.arnaldoaskatu.org .

(Font: Gara, 02-03/10/07)


Zonte 01 07 (04/10/07) - 06

Paîs Catalans: un servizi pe telefonie mobile par catalan

Il Guvier catalan al à metût sù un sît internet par ducj i utents che a doprin o a àn chê di doprâ celulârs indotâts di programs in lenghe catalane. Sul sît, che si lu cjate ae direzion www.elteumobil.cat , si pues cjatâ la liste dai modei e des marcjis di telefonins che a ufrissin i lôr servizis par catalan. Cun di plui, tal sît a son disponibii ancje un pôcs di fonts, sunariis e zûcs leâts ae lenghe e ae culture dai Paîs Catalans. Dut câs, chest ultin servizi, in forme inmò plui slargjade, si lu cjatave za di timp sul sît www.smscatala.cat .

(Font: Galiza Hoxe, 03/10/07)


Zonte 01 07 (04/10/07) - 05

Paîs Basc: domande par uficializâ l’euskara tal Parlament european

Al à scugnût inventâsi un probleme tecnic, l’eurodeputât basc Mikel Irujo (Eusko Alkartasuna), par rivâ a fâ un intervent curt inte sô lenghe, l’euskara, intant de sentade dal Parlament european dai 26 di Setembar. Cun di fat, viodût che la lenghe basche no je tra chês uficiâls dal Parlament european, al riscjave che i fos gjavade la peraule. Tal so intervent Irujo al à domandât che l’euskara al sedi ricognossût tant che lenghe uficiâl in Navare, in Iparralde (Paîs Basc francês) e intal Parlament european. La Union – al à dite l’eurodeputât basc – e interven par difindi i dirits umans ator pal mont, ma po no difint i dirits linguistics dai siei citadins, come minim si trate di un compuartament contraditori.

(Font: Gara, 27/09/07)


Zonte 01 07 (04/10/07) - 04

Ladinie dolomitane: e je nassude “Gana”, la vôs des ladinis

Si insiore il panorame de informazion in lenghe ladine. Cun di fat, cun Setembar al è jessût il prin numar di “Gana. La Usc dles Ladines” riviste ladine al feminin, nassude di une cueste dal sfuei storic de comunitât ladine dolomitane “La Usc di Ladins”. La riviste – come che si pues lei tal prin editoriâl – “e je stade metude adun massime pes feminis, cun argoments che i plasin e i interessin aes feminis frontâts dal lôr pont di viste”. Il comitât di redazion, di fat, al è dut al feminin e al è formât di Olimpia Rasom, Ingrid Runggaldier, Wilma Runggaldier, Magdalena Gasser e Lucia Gross. Si trate di une riviste patinade, curade dal pont di viste grafic e siore di fotos. Tal prin numar, dongje des rubrichis che a compagnaran i letôrs (viodût che nol è dite che a leile a vedin di jessi dome lis feminis) ancje tai numars a vignî, si cjate un dossier dedicât aes feminis e al lavôr.

Al è ancje di dî che, chest Astât, “La Usc di Ladins” e à rignuvît la sô presince su la rêt. Ta cheste maniere ancje chei che no cjapin a cjase lôr il setemanâl ladin a àn a disposizion une version informatiche dal gjornâl avonde siore.

Il sît si lu cjate ae direzion: www.lauscdiladins.com .

(Font: La Usc di Ladins, 22/09/07)


Zonte 01 07 (04/10/07) - 03

Galizie: il galizian al cres intes gnovis tecnologjiis

Dome inte dade che e va dai 10 di Mai ai 15 di Jugn di chest an a son passe 42 mil i galizians che a àn discjariât la version di OpenOffice in lenghe galiziane. Par capî miôr l’impat che dut chest al à, si pues pensâ che se dutis chestis personis invezit di discjariâ chest software libar a vessin comprât Microsoft Office (che in Galizie al ven vendût te sô version di base sù par jù a 200 euros), la multinazionâl americane e varès vuadagnât passe 8 milions di euros in pôc plui di un mês! Dut câs, intal stes periodi, a son stadis dome 3.040 lis personis che a àn discjariât la version par galizian di Mozilla Firefox. Une reson, dade de riviste informatiche che e à publicât i dâts, par spiegâ cheste diference di cifris e podarès jessi leade al fat che, in realtât, il program nol è za biel che pront par galizian, ma daspò di vêlu discjariât intune altre lenghe si à di meti sù un altri pacut informatic che al fasi la sô traduzion par galizian.

L’assessorât pe industrie dal Guvier galizian al à dât la incarghe ae Associazion Galiziane dai Inzegnîrs des Telecomunicazions (AETG) di meti adun il prin Dizionari enciclopedic galizian des tecnologjiis de informazion. La opare, che e à vût un finanziament di passe 167 mil euros, e sarà metude adun cul jutori de “Real Academia Galega” e de Universitât di Vigo. Par rivâ insom cu la vore la AETG e à trê agns di timp. Il Dizionari – al à spiegât il Guvier galizian – al è une vore impuartant sei pes impresis, sei pai students e pai professôrs che, ta cheste maniere, a varan sot man un imprest che ur permeti di doprâ ad in plen la lôr lenghe intal cjamp de informazion e des gnovis tecnologjiis. In rêt, invezit, al è za disponibil un prin dizionari informatic par galizian, par spagnûl e, in forme video, ancje pal lengaç dai segns (che si pues viodilu achì).

L’assessorât pe culture e pal sport dal Guvier galizian al à invezit decidût di sburtâ a nivel internazionâl la produzion leterarie de Galizie. Par fâlu e à sielzût dôs stradis: chê de partecipazion simpri plui fuarte tes fieris internazionâls dal libri e chê di internet. Par chel che al rivuarde la prime strade, l’assessorât al à za proviodût a sostignî la presince dai prodots editoriâi galizians intes fieris dal libri dal Uruguay (Setembar), di Barcelone (Otubar), di Frankfurt (Otubar), di Guadalajara (Novembar), da La Habana (Fevrâr), di Bologne (Març – Avrîl), di Buenos Aires (Avrîl – Mai), di Londre e di Rio de Janeiro. In curt e sarà po disponibile in rêt, ae direzion www.readgalicia.com , une selezion di cuasi 200 oparis de leterature galiziane contemporanie. Sul sît a saran ducj i riferiments par contatâ lis cjasis editoris interessadis e si cjataran ancje tocs des oparis cuntune traduzion par inglês.

(Font: Galiza Hoxe, 28/08/07-01/10/07)


Zonte 01 07 (04/10/07) - 02

Gales: fonts europeans par une rêt des minorancis

L’Ufici pe lenghe galese (Bwrdd yr Iaith Gymraeg – Welsh Language Board) al à otignût un finanziament di mieç milion di euros de Comission europeane par meti in rêt e infuartî i rapuarts tra lis lenghis minoritariis de Europe. Il progjet – che al à non “Network to Promote Linguistic Diversity (Rêt par promovi la diviersitât linguistiche) – al è l’unic dedicât aes lenghis minoritariis a vê cjapât bêçs inte suaze dal Program european pal aprendiment continuatîf 2007 – 2013. Ae iniziative, dongje dal Ufici pe lenghe galese, a cjapin part 18 organizazions impegnadis inte promozion des lenghis che a partegnin a di une disine di nazionalitâts minorizadis o di minorancis nazionâls europeanis (bretons, catalans, estons, finlandês, galês, irlandês, ocitans, ongjarês, slovens e svedês). Pal president dal Ufici pe lenghe galese, Meirion Prys Jones, il progjet al darà a guviers locâi e organizazions une struture internazionâl di riferiment par scambiâsi informazions e bogns esemplis di politiche linguistiche.

(Font: Welsh Language Board, 17/09/07)


Zonte 01 07 (04/10/07) - 01

Slovens dal stât talian: il Novi Matajur al è in rêt

Il Novi Matajur, setemanâl di riferiment dai slovens de provincie di Udin, si pues cjatâlu cumò ancje in rêt ae direzion www.novimatajur.it . Ogni setemane si puedin lei lis gnovis plui impuartantis publicadis dal gjornâl, ma ancje la prime pagjine in formât Pdf, un calendari dai apontaments principâi che a interessin la comunitât slovene e altris servizis ancjemò.

(Font: Novi Matajur, 06/09/07)


21/08/07

Pontade 15 07 (21/08/2007) - 8

Paîs Basc: Sanz al torne ae presidence de Navare

Come che si veve bielzà anticipât, i socialiscj i àn splanade la strade pal guvier de Navare ae diestre spagnoliste. Cun di fat, ae seconde votazion, Miguel Sanz al è stât elet di gnûf president de Navare cui 24 vôts de UPN e de CDN. Dut câs, la sô elezion e je stade pussibile dome in gracie des 11 schedis blancjis e dal vôt di astension rivâts dai 12 parlamentârs socialiscj. Cuintri de rielezion dal candidât de diestre a vevin votât invezit i moviments nazionaliscj bascs rapresentâts de coalizion Nafarroa Bai (12 deputâts) e la çampe radicâl (IUN, cui siei 2 parlamentârs). I socialiscj de Navare (PSN) a àn duncje ubidît ai ordins rivâts de direzion centrâl dal Partît Socialist Spagnûl (PSOE). Cheste situazion, dut câs, e riscje di puartâ ae roture il PSN. Za diviers membris dal diretîf a àn presentât lis lôr dimissions – tant che Irene Lapuerta, Mariano Cerezo, Lourdes Montero, Teresa Iradiel e María Luisa Osta – e si fevele aromai de nassite di un gnûf partît progressist de Navare che nol vegni a compromès cu la diestre spagnoliste.
Dal moment che il gnûf esecutîf si cjate a guviernâ cence vê la poie de maiorance dal Parlament de Navare, al à fat viodi di jessi disponibil a colaborâ ancje cun altris fuarcis politichis e a sbassâ il nivel di scuintri su ciertis cuestions, come chê de lenghe basche. Cun di fat, il gnûf ministri pe educazion, Carlos Pérez-Nievas (de CDN), al à za declarât la sô intenzion di meti sù un Istitût pe politiche linguistiche a pro dal euskara e di normalizâ la situazion dal model scolastic D, ven a dî là che l’insegnament al ven fat in lenghe basche.
(Font: Gara, iparralde.eu, 11-18/08/07)


Pontade 15 07 (21/08/2007) - 7

Scozie: il plan dal SNP pe indipendence

Il prin ministri scozês Alex Salmond al à presentât al public il document metût adun dal so partît – il Scottish National Party – tant che fonde pe discussion sul avignî istituzionâl de Scozie. Si trate di un test che al à par titul “Choosing Scotland’s Future” e che al fronte lis stradis principâls pal cambiament costituzionâl dal paîs cui diviers pro e cuintri di ogni propueste. A son trê lis alternativis plui significativis, ven a dî une incressite minime dai podês devolûts, une riforme radicâl dal implant de devoluzion cuntun aument grues dai podês dal Parlament scozês, e la indipendence. Il SNP al sburte par cheste ultime opzion e al à chê di imbastî un referendum pe indipendence dentri dal 2010, dut câs il document presentât al ten cont ancje di chês altris stradis e al è un invît viert a ducj i citadins a discuti. Par chest al è stât metût sù ancje un sît internet – che si lu cjate ae direzion www.anationalconversation.com – là che si pues discuti sul argoment.

Intant, daûr di une inchieste comissionade dal cuotidian Daily Mail, al ven fûr che, daspò des elezions, il SNP al à cressût inmò di plui il so consens framieç dai scozês, che pal 48% a mostrin di poiâ chest partît. Simpri daûr de stesse inchieste, al ven fûr che, in dì di vuê, dome il 31% de popolazion e votarès a pro de indipendence de Scozie.
(Font: SNP, Gara, Galiza Hoxe, VilaWeb, 14/08/07)


Pontade 15 07 (21/08/2007) - 6

Isulis Åland: cu la indipendence si larès in miôr

Daûr di un studi jessût cualchi zornade indaûr, la indipendence e zovarès sei a nivel economic, sei a nivel sociâl aes Isulis Åland, un grup di isulis dal Mâr Baltic là che la maiorance de popolazion e je di nazionalitât svedese, ma che dal pont di viste politic a partegnin ae Finlande. Lis isulis za in dì di vuê a gjoldin di une une gruesse autonomie che, intai fats, e fâs dai finlandês la vere minorance. Dut câs, daûr dal studi, al ven fûr che la gjestion totâl dal sisteme di tassazion al darès plui fuarce ae economie locâl, al darès stabilitât ae incressite economiche, e al permetarès di miorâ i servizis sociâi e la difese dal ambient. La indipendence – si pues lei intal studi – e vignarès a costâ 53 milions di euros, ma il redit totâl al passarès dai 293 di vuê a 333 milions di euros.
(Font: European Free Alliance, 08/08/07)


Pontade 15 07 (21/08/2007) - 5

Corsiche – Sardegne: progjet comun pes nazions cence stât

E sarà presentade in maniere uficiâl in Setembar aes autoritâts europeanis une mozion sotscrite di diviersis organizazions indipendentistis cun chê di ricognossi il dirit ae autodeterminazion des nazions cence stât. Il document, presentât prime in Sardegne te suaze de “Festa Manna” inmaneade dal moviment politic “indipendèntzia Repùbrica de Sardigna” (iRS), e po in Corsiche intant de edizion 2007 des “Ghjurnate de Corti”. Il document, in plui di iRS (Sardegne), al è stât sotscrit di Corsica Nazione Indipendente, Ghjuventù Indipendentista (Corsiche), Esquerra Republicana de Catalunya, Joventut Independentista (Paîs Catalans), e de Scottish Independence Convention, che e met adun diviers moviments indipendentiscj scozês. La mozion si svilupe su trê ponts che si domande aes istituzions europeanis di cjapâ sù, ven a stâi: ricognossi e fâ rispietâ il dirit ae autodeterminazion des nazions cence stât che a son dentri te UE; definî e regolâ il procès democratic che lis nazions cence stât a àn di imbastî par deventâ indipendentis; acetâ le jentrade automatiche tes istituzions comunitariis dai gnûfs stâts che a nassaressin daûr di chest troi.
(Font: iRS, Galiza Hoxe, 06/08/07)


Pontade 15 07 (21/08/2007) - 4

Galizie: in Setembar si dan dongje lis campagnis pai dominis web

Si daran dongje in Setembar in Galizie, a Santiago de Compostela, i comitâts che a son nassûts in diviersis nazions cence stât de Europe ocidentâl par sburtâ la nassite di dominis web che a fasin riferiment ae lôr comunitât nazionâl e no al stât là che a son dentri. In particolâr, a dâsi dongje a saran i grups in vore in Bretagne, in Gales, intal Paîs Basc e in Galizie. A dâi plui fuarce a cheste bataie al è il sucès bielzà otignût dai catalans che a àn rivât a fâsi ricognossi il domini .cat che, in dì di vuê, al rivuarde passe 22 mil sîts internet e che si calcole che al vedi puartât a di un aument dal 33% de lenghe catalane in rêt. Lis campagnis ta chei altris paîs a son daûr a cuistâ simpri plui sostance. Par esempli, in Gales, la propueste di meti sù il domini .cym, in plui di cjatâ dacuardi ducj i partîts rapresentâts te Assemblee Nazionâl Galese e à vût il vie libare ancje dal Dipartiment pe industrie e pal cumierç dal guvier britanic. A pro di un domini web indipendent pal breton al varès cjapât posizion fintremai il president francês Sarkozy, tant che in Galizie la poie pal domini .gal e je rivade ancje de sezion locâl dal PP, par solit su posizions spagnolistis.
(Font: Eurolang, 12/08/07)


Pontade 15 07 (21/08/2007) - 3

Galizie: la Vuardie Civîl in difese dal bilinguisim

La cjolte di posizion cuintri dal ûs de lenghe galiziane di une des organizazions sindacâls dal cuarp des Vuardiis Civîls, la UFGC (Union Federâl des Vuardiis Civîls), e à inviât reazions sei a nivel politic, sei dentri dal stes cuarp di polizie. Cun di fat, une altre organizazion di categorie, la ASIGC (Associazion Indipendente de Vuardie Civîl), e à invidât a no dâi masse pês a di une organizazion che e rapresente pôcs di lôr e e à ricuardât che la plui part des Vuardiis Civîls de Galizie e cognòs e e dopre la lenghe proprie de comunitât. Magari cussì no, soredut par resons anagrafichis, tancj di lôr no son stâts inscuelâts par galizian e, duncje, a àn problemis cuant che si trate di doprâlu in forme scrite. Par chest – e dîs la ASIGC – al covente dâur cors di formazion par galizian. La UGC – Galicia (Union des Vuardiis Civîls de Galizie), la organizazion plui rapresentative de categorie, e je po intervignude cuntun comunicât là che e à difindût a fuart il bilinguisim in vore in Galizie, fevelant dal galizian come lenghe che e unìs e che e à di jessi patrimoni di ducj, e i à fat cuintri in maniere une vore dure a chei che a contestin l’ûs de lenghe proprie de comunitât. Intal test si fevele des declarazions rivadis de UFGC come di “nostalgjie precostituzionâl che no si pues tolerâ” e si ur domande di “bandonâ la lôr agressivitât reazionarie e lis lôr ideis fassistis cuintri dal galizian”, e cun di plui si invidin i responsabii dal cuarp di polizie a cjoli “precauzions par che no jentrin plui personis che no son bogns di vivi in democrazie”.
(Font: Galiza Hoxe, 10-13-14/08/07)


Pontade 15 07 (21/08/2007) - 2

Gales: si slargje l’ûs public dal galês

In gracie dal gnûfs plans di politiche linguistiche, l’ûs dal galês al è daûr a cressi intal setôr public. A dîlu a son i risultâts di une inchieste indipendente puartade indenant dal Centri pes Ricercjis Europeanis dal Gales su comission dal Ufici pe lenghe galese (Bwrdd yr Iaith Gymraeg – Welsh Language Board). La ricercje e à cjapât dentri sîs citâts – Amlwch, Bangor, Rhuthin, Machynlleth, Cardigan e Ammanford – là che si à controlât la presince di segnaletiche, materiâl informatîf, modui e pagjinis web par galês, ma ancje la lenghe che i dipendents dai uficis publics a dopravin par rispuindi ai utents che a vevin denant o che a telefonavin. Par puartâ indenant il studi i ricercjadôrs si son presentâts come utents normâi. Il risultât al è che il 73% dai servizis dipendents dal guvier e il 69% di chei des aministrazions locâls a son disponibii par galês o in forme bilengâl. Une vore sodisfat par chescj risultâts si à declarât il president dal Ufici pe lenghe galese, Meirion Prys Jones, che al à ancje ricuardât cemût che tai ultins cinc agns i plans di politiche linguistiche intai uficis publics a sedin dopleâts. Plui dificile la situazion intal setôr privât, là che al reste inmò tant ce fâ par incressi l’ûs de lenghe galese.
(Font: Welsh Language Board, 02/08/07)


Pontade 15 07 (21/08/2007) - 1

Romanie: metudis lis fondis par un Istitût pes minorancis

Il guvier rumen al à dite di sì ae nassite di un Istitût pal studi des problematichis des minorancis nazionâls in Romanie. L’organisim al varà nature publiche e al fasarà riferiment al Dipartiment statâl pes relazions interetnichis. L’Istitût – che al sarà logât a Cluj / Kolozsvár – al viodarà di inchiestis e ricercjis su la storie, la culture, la lenghe, la religjon, la situazion demografiche des minorancis nazionâls, e al proponarà liniis di indreçament par miorâ la lôr situazion.

Intant, il ministri rumen pe educazion, Cristian Adomnitei, al à dât fûr une circolâr là che si previôt che intal curriculum di storie dai istitûts superiôrs e des universitâts si feveli ancje de storie di dutis lis minorancis nazionâls che a vivin in Romanie. Il ministeri al à za fat savê che al darà fûr i materiâi che a coventin par puartâ indenant cheste iniziative, pensade par incressi la cussience de diviersitât culturâl dal paîs.

(Font: divers.ro, Eurolang, 04-09/08/07)


07/08/07

Pontade 14 07 (07/08/2007) - 8


Paîs Basc: i socialiscj a lassin la Navare ae diestre

La diestre spagnoliste e tornarà al podê in Navare e a splanâi la strade i àn pensât i socialiscj. Tes ultimis elezions, UPN e CDN, i doi partîts de diestre che a jerin stâts al guvier te legjislature stade, a vevin pierdût la maiorance assolude e a vevin vût di contentâsi di 24 deputâts; la sezion navare dal Partît Socialist (PSN) e veve cjapât 12 parlamentârs, la çampe radicâl (IUN) a ‘nt veve otignûts doi e i moviments nazionaliscj bascs, che si vevin dâts dongje te coalizion Nafarroa Bai (NaBai), a vevin concuistât 12 deputâts. Daspò di doi mês di negoziazions e someave vierzisi la strade di une aleance di guvier formade di socialiscj, nazionaliscj bascs e çampe radicâl, ma la dirigjence centrâl dal Partît Socialist (PSOE) e à scancelât ogni sperance di cambiament pe Navare. Cun di fat, a Madrid, il diretîf dal partît al à ribaltât la soluzion sielzude dal PSN e al à imponût la strade de astension cuant che si larà a votâ pal gnûf guvier. Ven a dî che cu lis 12 schedis blancjis dai deputâts socialiscj, Miguel Sanz al tornarà a cjapâ in man la presidence de Navare cu la maiorance relative che i rive de coalizion tra UPN e CDN. La decision dal diretîf centrâl dal partît, e à lassât scaturîts no dome i militants, ma ancje diviers dai cuadris dirigjents dal PSN che a àn domandât il cjâf dal segretari regjonâl, Carlos Chivite, e dal candidât ae presidence, Fernando Puras, acusâts di poiâ la linie imponude di Madrid. Chest ultin al à cussì decidût di dimetisi di deputât e al à visât la dirigjence dal PSOE che la decision cjapade a Madrid e riscje di crevâ il PSN. Il segretari dal PSOE, José Blanco, al à za dite che cui che nol seguìs la strade dade de direzion centrâl al sarà parât fûr. Cun cheste cjolte di posizion, i socialiscj spagnûi a dimostrin ancjemò une volte che a àn miôr vignî a pats cu la diestre post franchiste, che poiâ la volontât di autoguvier che e va dilunc a cressi intai teritoris storics che a formin il Paîs Basc.

(Font: Gara, iparralde.eu, 06-07/08/07)

Pontade 14 07 (07/08/2007) - 7


Corsiche: “Ghjurnate de Corti”, messaç dal FLNC e divisions politichis

Si à davuelte tal fin di setemane a pene passât la edizion 2007 des “Ghjurnate de Corti”, apontament là che si dan dongje i plui impuartants moviments indipendentiscj de Europe ocidentâl. La edizion di chest an des “Ghjurnate” e je stade la ocasion par viodi un videomessaç dal FLNC – UC (Front di Liberazion Nazionâl Cors – Union dai Combatents), ven a dî la organizazion armade corse plui impuartante. Intal messaç, il grup armât al vise che la uniche strade par saltâ fûr de crisi e je chê di inviâ des negoziazions tra il stât francês, il moviment di liberazion nazionâl e lis diviersis realtâts che a formin la societât corse, ma al ricuarde ancje che la sô determinazion e il so impegn pe indipendence de isule a son inmò salts, e al clame i zovins ae lote. Lis “Ghjurnate”, dut câs, a àn mostrât ancje une division tra lis diviersis animis dal panorame nazionalist che si vevin dadis dongje te Unione Naziunale: di une bande “Corsica Nazione Indipendente”, organizadore dal apontament, che e à confermât il so impegn pe indipendence; di chê altre bande il PNC (“U Partitu di a Nazione Corsa”) e “A Chjama Naziunale”, che no si son fats viodi ae iniziative e a àn mostrât di no agradî la posizion dai compagns di coalizion. Jean-Guy Talamoni, che al è ae vuide di CNI, dongje di dâ la plene solidarietât al FLNC – UC, al à rivendicât une clare linie politiche indipendentiste che no à di confondisi cul autonomisim o il nazionalisim moderât di chei altris moviments, e al à presentât un progjet politic in 25 ponts che al varès di jessi la fonde par tratâ cul guvier di Parîs. I dirigjents dal PNC e di ACN, Jean-Christophe Angelini e Gilles Simeoni, a àn cjapât lis distancis dal moviment armât e a sburtin par une politiche nazionaliste moderade.

(Font: Le Monde, Libération, Galiza Hoxe, 06/08/07)

Pontade 14 07 (07/08/2007) - 6


Galizie: cun Setembar la certificazion linguistiche gnove

Cun Setembar al scomençarà a jentrâ in vore in Galizie il gnûf sisteme di certificazion linguistiche che al sarà organizât su cinc nivei. Dongje de cognossince dai aspiets gramaticâi, fonetics, ortografics e lessicâi, i “Celga”, ven a dî i Certificâts di Lenghe Galiziane, a tignaran cont ancje di cierts elements sociâi e culturâi leâts ae lenghe proprie de Galizie. Si partìs dal “Celga 1” che al previôt la cognossince dai elements elementârs de lenghe galiziane par rivâ fintremai al “Celga 5”, là che si domandin cognossincis linguistichis sul nivel dai laureâts in filologjie galiziane. Cun Setembar a tacaran i esams par vê i prins cuatri nivei di certificazion. Lis provis pal cuint nivel, invezit, a scomençaran dome cul 2008. Di chest an che al ven il sisteme al jentrarà in vore ad in plen e si tignaran doi esams al an par ogni nivel. Dut câs, diviersis realtâts tra chês in prime linie pe promozion dal galizian, a àn contestât il sisteme e a àn fevelât di ocasion pierdude. Di fat, “A Mesa pola Normalización Lingüística”, la Associazion dai scritôrs in lenghe galiziane (AELG), il Coordenament dai lavoradôrs pe normalizazion linguistiche (CTNL) e la Associazion sociopedagogjiche galiziane (AS-PG) a judichin che il gnûf sisteme nol garantissi pardabon lis competencis linguistichis, massime par chel che al rivuarde i lavoradôrs de aministrazion publiche.

(Font: Galiza Hoxe, 31/07/07)

Pontade 14 07 (07/08/2007) - 5


Irlande dal Nord: finide la campagne militâr britaniche

I 31 di Lui a son stâts la ultime zornade de cussì clamade “Operation Banner”, ven a dî la campagne militâr britaniche in Irlande dal Nord. Si trate de operazion plui lungje inte storie dal esercit britanic: di fat e jere tacade in maniere uficiâl intal 1972, cundut che i prins reparts a vevin tacât a rivâ inmò tal 1969. L’esercit britanic al jere stât mandât tes Sîs Conteis cun chê di cuietâ la situazion, daspò de ofensive de polizie nordirlandese e dai grups paramilitârs unioniscj cuintri dal moviment pai dirits civîi che si bateve par che ae popolazion nazionaliste irlandese a fossin garantîts i stes dirits de comunitât lealiste. Dut câs, i militârs britanics, che sul imprin a vevin vût il bon acet dai nazionaliscj, a jerin deventâts in curt un altri imprest di repression cuintri de comunitât nazionaliste. Cun di fat, diviers dai episodis plui sanganôs de storie resinte de Irlande dal Nord a àn vût come protagoniscj reparts dal esercit britanic: a tacâ dal “Bloody Sunday”, cuant che ai 30 di Zenâr dal 1972 parecjadutiscj britanics a coparin 13 civîi che a vevin partecipât a di une marcje pai dirits civîi a Derry. La smilitarizazion de Irlande dal Nord al è un dai ponts dai acuardis di pâs, e la fin uficiâl de campagne militâr scomençade tal 1972 e je un pas ta cheste direzion. Rispiet ai 20 mil militârs britanics che si cjatavin tes Sîs Conteis cuant che si à inviât il procès di pâs, la fin de operazion e à puartât chest numar a 5 mil unitâts. Une riduzion che si à svilupade ta chescj agns, ancje se no simpri in maniere liniâr, come che a àn plui voltis denunciât i rapresentants de comunitât nazionaliste.

(Font: Gara, 31/07/07)

Pontade 14 07 (07/08/2007) - 4


Irlande: il guvier al incrès l’inglês tes scuelis gaelichis

La ministre irlandese pe educazion, Mary Hanafin, e à comunicât che lis Gaelscoileanna, ven a dî lis scuelis là che l’insegnament al ven fat dut par gaelic, a varan di doprâ la lenghe inglese bielzà dal prin an scolastic. Fin cumò, i fruts a tacavin a doprâ l’inglês cuant che a rivavin ai 7/8 agns e no za dal prin an di scuele. La misure e jentrarà in vore cul prossim an scolastic. Lis Gaelscoileanna a operin fûr dal Gaeltacht, ven a dî lis areis là che il gaelic al è ancjemò fevelât di une part significative de popolazion. Cun di plui, chescj istitûts a son pôcs – dome une cincuantine in dut – e a son logâts in zonis là che la lenghe dal ambient e je l’inglês e, duncje, la scuele a imersion e je la uniche maniere par imparâ pardabon il gaelic. Par chest la decision dal guvier e je stade une vore criticade de rapresentance unitarie di chestis scuelis e di dutis lis associazion impegnadis te promozion de lenghe irlandese. Tant plui che, intant de campagne eletorâl, lis fuarcis politichis cumò al guvier a vevin mostrât une posizion ben divierse.

(Font: Galiza Hoxe, 30/07/07)

Pontade 14 07 (07/08/2007) - 3


Grecie: critichis de OSCE su la gnove leç sui media

La gnove leç sui mieçs di comunicazion fate buine dal Parlament grêc ai 7 di Lui e pidimente a fuart la concession di licencis aes emitentis radiofonichis plui piçulis o che a doprin une lenghe minoritarie. In proposit al è intervignût ancje Miklos Haraszti, il rapresentant de OSCE su la libertât dai mieçs di comunicazion, che al à criticât la gnove leç greghe. Pe OSCE, di fat, par mantignî il pluralisim inte informazion, al è impuartant che dutis lis comunitâts a vedin acès ai mieçs di comunicazion e a puedin puartâ il lôr contribût.

(Font: OSCE, 27/07/07)

Pontade 14 07 (07/08/2007) - 2

Romanie: iniziative tal Parlament european pe Universitât Bolyai

I parlamentârs europeans che a partegnin ae comunitât ongjarese de Romanie a son daûr a fâ zirâ un ordin dal dì par che il Parlament di Strasburc al cjapi posizion su la rinassite de Universitât Bolyai (Kolozsvár – Cluj). Par che il Parlament european al puedi frontâ la cuestion intune des sôs riunions plenariis a coventin lis firmis di 393 deputâts dentri de fin di Otubar, ma al somee che i parlamentârs rumens a sedin daûr a cirî di impedî chest risultât. La Universitât di lenghe ongjarese Bolyai e je stade scancelade inmò tal 1959. Une volte colât il regjim di Ceausescu, i ongjarês de Transilvanie a àn domandât che e tornàs a nassi. L’ongjarês al è presint in diviersis istituzions universitariis de Romanie, ma la Universitât statâl Bolyai no je inmò tornade al so puest. Par chest, i eurodeputâts de comunitât ongjarese rumene a cirin di zuiâ ancje la cjarte des istituzions europeanis.

(Font: Eurolang, 23/07/07)

Pontade 14 07 (07/08/2007) - 1


Ladinie dolomitane: racuelte di firmis par poiâ la unificazion ladine

Ai 28 di Otubar, i citadins che a son a stâ tal teritori ladin storic de Provincie di Belun, ven a dî i comuns di Cortina d’Ampezzo (Anpezo), Colle S. Lucia (Col) e Livinallongo (Fodom), a saran clamâts a dî se a vuelin lassâ la Regjon Venit par passâ cu la Provincie Autonome di Bolzan. La domande di inviâ il referendum e je stade fate indenant des trê aministrazions comunâls in cunvigne cu lis unions ladinis che a operin sul teritori, ven a stâi la “Union dei Ladìs d’Anpezo”, la “Union de i Ladign da Col”, e la “Union di Ladins da Fodom”. Vuê come vuê, di fat i Ladins dolomitans si cjatin dividûts tra dôs Regjons e trê Provinciis. La situazion di tutele cun lidrîs plui fondis e je chê dai Ladins che a son a stâ inte Provincie Autonome di Bolzan. Inte Provincie Autonome di Trent, la tutele dai ladins e je partide plui tart e cun plui fature, ma tai ultins dîs agns e à fat pas indenant pardabon grues. Pai ladins de Provincie di Belun, invezit, la situazion e je pardabon dificile. Di cualchi zornade e je ancje la pussibilitât di manifestâ la poie al referendum pe unificazion de comunitât ladine storiche sot di une uniche aministrazion regjonâl. Par fâlu, baste lâ sul sît www.amiscdlaladinia.info metût sù dal Comitât dai amîs de Ladinie unide, coordenât di Marco Pizzinini.

(Font: Noeles, amiscdlaladinia.info)


02/08/07

Pontade 13 07 (24/07/2007)


Grecie: leç che e pidimente lis radios di minorance

Il guvier grêc al à fat bon ai prins di Lui une leç che e regole il setôr radiotelevisîf e che e va a pidimentâ inmò di plui la ativitât des emitentis radiofonichis plui piçulis o che a trasmetin in lenghe minoritarie. Il test al à vût la poie de maiorance di diestre, ma al è stât contestât di dutis lis fuarcis di oposizion. In buine sostance il proviodiment al previôt dute une schirie di limitazions par concedi lis frecuencis radiofonichis. La leç, dut câs, e interesse dut il panorame radiofonic grêc, dal moment che dutis lis licencis a varan di jessi rignuvidis. Par vê une concession al covente versâ une garanzie di 100 mil euros e vê almancul une vincjine di dipendents, ven a dî che si scancele ogni pussibilitât pes emitentis plui piçulis e che no àn capitâi grues daûr di lôr. Cun di plui si previôt che la lenghe principâl par podê trasmeti e vedi di jessi il grêc. Ta cheste maniere si va a colpî ancje chês emitentis de Tracie che a doprin la lenghe turche. Fin cumò, il turc al jere l’unic lengaç che al gjoldeve di une cierte tolerance de bande des autoritâts greghis, che, pal rest, no ricognossin la esistence di nissune minorance e che za tai agns stâts a vevin colpît cun fuarce ogni tentatîf di dâi visibilitât aes comunitâts di minorance sui mieçs di comunicazion.


Gales: trê i ministris nazionaliscj tal guvier gnûf

Il partît laburist al veve vinçût lis ultimis elezions pe Assemblee Nazionâl Galese, ma nol veve rivât a concuistâ la maiorance assolude dai parlamentârs. Par cheste reson, daspò di une lungje tratative, i laburiscj a vevin sotscrit une aleance cui nazionaliscj dal Plaid Cymru. La setemane stade, intal guvier galês, a son cussì jentrâts ancje trê ministris che a rivin di chest partît. I siet ministris laburiscj che a vevin formât il prin guvier di minorance a son restâts al lôr puest, ma si à vût un cambiament intes deleghis. Par chel che al rivuarde i rapresentants dal Plaid Cymru: Ieuan Wyn Jones, dongje di jessi ministri pe economie e pai traspuarts, al è deventât vice prin ministri; Rhodri Glyn Thomas, al à vût il ministeri pal patrimoni storic e culturâl; e Elin Jones e à vût la deleghe pai afârs agricui.


Paîs Basc: television par basc ancje in Iparralde

Il Consei superiôr dal audiovisîf al à autorizât la nassite, cun Setembar, di 18 canâi pe television digjitâl di tiere in Iparralde, ven a dî la part dal Paîs Basc che si cjate sot dal stât francês. Di chê altre bande dal confin, il guvier de Comunitât Autonome Basche al à dite di sì a 57 canâi televisîfs digjitâi. Tra i cuatri grups che a àn vût cheste concession al è ancje “Hamaika”, che si è dât dongje intal Setembar stât, metint adun societâts che a operin in diviers cjamps de comunicazion, ven a dî television, radio, telefonie e editorie. Tra chescj ancje i cuotidians “Gara” e “Deia”, il “Journal du Pays Basque” che al opere in Iparralde, e “Berria”, l’unic cuotidian di plante fûr par euskara. Il grup “Hamaika” al à vût in concession cuindis canâi che a trasmetaran par basc su dut il teritori des provinciis baschis di Gipuzkoa, Biskaia e Araba. Dut câs, tra i canâi dal grup, che a varessin di partî tal zîr di un an, si ‘nt previôt ancje un pal bacin Oarso – Bidasoa. Cheste television locâl in lenghe basche, duncje, no si fermarà sul confin di stât che al taie in doi il Paîs Basc, ma e rivarà ancje in trê comuns di Iparralde, ven a dî Hendaye, Biriatu e Behobie.


Galizie: “Nós”, nazionalisim e gastronomie intune

Tantis voltis il nazionalisim al ven associât a argoments une vore pençs, ma in realtât in diviersis comunitâts a son tancj i grups di militants o simpatizants nazionaliscj che si dan dongje par ocupâsi di ativitâts culturâls, sportivis o ancje ludichis. Un esempli interessant, di chest pont di viste, al rive de Galizie, là che e je nassude la Societât Gastronomiche nazionaliste “Nós”. Par podê jentrâ te gnove associazion si domandin dome dôs carateristichis, ven a dî jessi nazionalist e gjoldi intal mangjâ. La assemblee di fondazion dal grup si è davuelte, come che al jere facil di pensâ, ator di une taule plene di specialitâts gastronomichis galizianis.


Romanie: i ongjarês a cirin la unitât eletorâl

Tai agns daspò de colade dal regjim ditatoriâl di Ceausescu, i ongjarês de Romanie si vevin organizâts ator da Union Democratiche dai Ongjarês in Romanie, une sorte di cartel politic e organizatîf che al meteve adun lis diviersis animis de comunitât magjare che e vîf in Transilvanie. Tai ultins agns, dut câs, la Union, cundut che e reste il moviment di riferiment pai ongjarês de Romanie, e à pierdût diviers tocs. Il câs plui grues al è stât chel rapresentât dal Consei Nazionâl dai Ongjarês in Transilvanie, vuidât di Laszlo Tokes. Marko Bela, che al è ae vuide de Union, al cîr di tornâ a tirâ dongje chest moviment e chês altris realtâts che a son ladis par cont lôr. L’obietîf, di fat, al è chel di presentâsi aes elezions europeanis cuntun moviment unitari. Si calcole che i ongjarês che a vivin in Romanie a sedin un milion e mieç, ven a dî il 6,5% de popolazion rumene. Dome se si sta ducj adun – al dîs Bela – si pues sperâ di passâ il soiâr eletorâl.

Pontade 12 07 (10/07/2007)


Paîs Basc: aministrazion di stamp coloniâl a Lizartza

Si à za vût fevelât des elezions aministrativis intal Paîs Basc e ancje de situazion critiche leade al anulament di cetantis listis leadis ae çampe indipendentiste basche. Cumò che a son daûr a insediâsi lis aministrazions locâls che a divegnin di chel vôt, si puedin viodi ancjemò miôr i risultâts di cheste politiche di discriminazion. Un dai câs plui evidents al è chel che si à vût intal Comun di Lizartza. Intant des ultimis elezions, i citadins di chest Comun basc a vevin dât 186 vôts ae liste dal moviment nazionalitari ANV che e jere stade anulade des autoritâts spagnolis, altris 142 citadins a vevin sielzût di votâ schede blancje par protestâ cuintri de esclusion des listis che a varessin volût votâ. La liste dal PP, la diestre spagnoliste, e veve cjapât dome 27 vôts ma, ta cheste situazion là che a ciertis opzions politichis ur è stât proibît di partecipâ al vôt, a son stâts avonde par vê la maiorance relative: une maiorance che intai fats no rapresente nancje il 10% dai citadins di Lizartza. Ta cheste suaze paradossâl, il sindic dal PP, Regina Otaola, e à cjapât possès dal municipi compagnade de polizie che e à tignût lontans chei stes citadins che la gnove aministrazion e varès di rapresentâ. Tra i prins ats de gnove Zonte comunâl si à vût la esposizion de bandiere spagnole inte sale dal Consei comunâl: at che al è stât pussibil dome in graciis de presince massive de polizie in asset antisomosse. Un at simbolic che al ricuarde plui une concuiste, che no l’insediament di une aministrazion democratiche.


Gales: guvier gnûf cun plui fuarce pe lenghe

Lis elezions che si vevin vudis in Mai par rignuvî la Assemblee Nazionâl Galese a vevin tornât a dâ la vitorie ai laburiscj, che di agnorums a rapresentin la prime fuarce politiche in Gales, ma no ur vevin dât un numar di parlamentârs suficient par podê guviernâ di bessôi come che a vevin fat te legjislature stade. Daspò di lungje schirie di contats, ae fin si à cjatade la fate par une coalizion di guvier che e met adun i laburiscj cul Plaid Cymru, ven a dî il partît nazionalist galês, e che si fonde suntun acuardi di program unitari. Dongje di vê otignût la disponibilitât a inviâ, dentri di cuatri agns, un referendum par domandâ ai citadins galês se a vuelin che a cressin i podês de Assemblee Nazionâl, il Plaid Cymru al à concuardât cui laburiscj ancje une schirie di misuris a pro de lenghe galese. Tra i ponts di chest acuardi, di fat, si à la parificazion di status tra galês e inglês, la poie al ricognossiment dal galês tant che lenghe di lavôr de Union Europeane, la nassite di un organisim par investigâ su la violazion dai dirits linguistics, il jutori par svilupâ un cuotidian in lenghe galese e par che al sedi metût sù il domini internet “.cym” par ducj chei sîts che si ricognossin tal ûs de lenghe proprie dal Gales. La associazion “Cymdeithas yr Iaith Gymraeg”, che di timp e je impegnade par rivâ a di une gnove leç sul galês che e intervegni in maniere plui radicâl pal svilup de lenghe, e à cjapât at dai elements a pro de lenghe galese che a son dentri tal program politic de coalizion di guvier, ma e à dite che prime di judicâ al è miôr spietâ di viodi alc di concret.


Scozie: ritarts te partence dal canâl televisîf gaelic

In Scozie al è un ciert marum pal ritart inte partence dal prin canâl televisîf par gaelic che al varès vût di scomençâ la sô ativitât cul principi di chest an, ma che invezit al è ancjemò ret e fer. A fâsi puartevôs di chest marum al è stât Angus McNeil, parlamentâr dal SNP elet te circoscrizion des Isulis Ocidentâls, ven a dî inte zone là che e je plui fuarte la presince dal gaelic scozês. Tal Març dal 2007, il precedent esecutîf scozês al veve metût 3 milions di sterlinis pal progjet, previodint, a tacâ dal 2008, un contribût di 12 milions di sterlinis par an. A chest proposit, no son mancjadis lis polemichis, in Ingletiere, ma ancje in Scozie, sui coscj de operazion, judicâts masse alts. Par une iniziative come cheste, a àn rispuindût chei che a lavorin sul progjet, baste cjalâ la situazion de television galese S4C (Sianel Pedwar Cymru), cjapade propit di model di riferiment pal canâl televisîf par gaelic, là che si investìs cetant di plui.


Cjanton dai Grisons: il standard rumanç grison al devente uficiâl

Cundut che za di agns il Cjanton svuizar dai Grisons al à une maiorance todescje che e je daûr a cuistâ simpri plui teren, il caratar trilengâl dal teritori al è stât confermât in Jugn di un referendum popolâr che al à vût il 53,9% di sì. La percentuâl di adesions ae leç linguistiche e à cjatât, come che al jere facil di spietâsi, plui bon acet tes zonis là che la lenghe rumance – che cul dolomitan e il furlan e forme la famee linguistiche ladine – e je plui fuarte. La gnove leç linguistiche e rint il rumanç grison, te sô forme standard, lenghe uficiâl di doprâ te aministrazion dal Cjanton e ta chê judiziarie. Si infuartìs cussì il procès di standardizazion za inviât di cualchi an intal Cjanton dai Grisons, là che si fevelin varietâts plui marcadis che no, par esempli, in Friûl. La esperience madressude ta chescj agns e à dimostrât che par difindi il rumanç, massime denant dal todesc, si veve di infuartî l’ûs di un standard unic che, dut câs, nol larà a scancelâ lis varietâts locâls.


Ladinie dolomitane: ae fin di Otubar i referendums par cambiâ Regjon

Il ministeri talian pal interni al à comunicât che si davuelzaran ai 28 di Otubar di chest an i referendums par cambiâ Regjon intai trê Comuns ladins storics che a son inte Provincie di Belun. Si trate dai Comuns di Cortine, Col e Fodom che fin ae prime vuere mondiâl a jerin adun cun chei altris Comuns ladins sot dal imperi asburgjic. Al è di agns che e va indenant la bataie par tornâ a meti adun la comunitât ladine sot di une uniche aministrazion regjonâl, daspò che il fassisim le veve dividude in trê Provinciis diviersis. In dì di vuê, i ladins des Dolomitis si cjatin dividûts tra trê Provinciis e dôs Regjons. La domande di passâ cul Trentin – Sud Tirôl e à sì resons economichis e aministrativis, ma si fonde soredut suntune comunance storiche, linguistiche e culturâl. Par inviâ l’iter pal passaç di Regjon, intai referendums al varà di votâ sì pal cambiament il 50% plui un dai citadins cun dirit di vôt. Si trate duncje di une maiorance cualificade e no semplice come par altris referendums: un sisteme che al à za pidimentât a fuart il risultât dai vôt popolâr in diviers comuns furlans dal Mandament di Puart che a vevin domandât di passâ cu la Regjon Friûl VJ.


Gjermanie – Danimarcje: berdeis su la segnaletiche bilengâl

Daûr de disponibilitât dal ministeri pes infrastruturis, e je pussibilitât di incressi la presince de segnaletiche stradâl bilengâl intal stât dal Schleswig – Holstein, in Gjermanie, là che a vivin minorancis frisonis e danesis, e là che si fevelin ancje varietâts bassis todescjis. Te zone là che e vîf la comunitât frisone la presince de segnaletiche bilengâl e je za avonde significative e la gnove, duncje, e e interesse massime danês e bas todescs. Chescj ultins a àn cjapât cun sodisfazion la gnove. La situazion e je un tic plui ingredeade, invezit, pai danês. Cun di fat, par solit, lis misuris di tutele pai danês de Gjermanie a van al pâr cun chês pai todescs che a vivin tal Sud de Danimarcje, ma ta chest stât la pussibilitât di meti cartei bilengâi te jentrade dai cuatri Comuns là che e vîf une significative minorance todescje e je stade cjapade tant che une provocazion, massime dai partîts de diestre nazionaliste. Al è duncje dificil, par cumò, che si puedi rivâ a di un tant.